Yakoba 2 - Kulimama Kwakupya

Kushiwulula ha shihota

¹ Bawushinda wami, ngo bakakukulupila muli Mwene wetu Yeshu Kilishitu Mwene wawuwahe, hinga mwikala na shihota na bantu.

² Ndaba ndi ku shikungulukilo shenu kukeza muntu uli na kambalaminwe ka ngolinde na bivwalo byabiwahe, kami ndi kukeza mukakushepwa na bivwalo byabibi,

³ nanenu mukulemeeka ou ukuvwala bivwalo byabiwahe, nakwamba kukwendi ngayi, “Ikala muno mu shibaka sha shiwahe,” nakwamba ku mukakushepwa ngayi, “Imana oku obe,” hinga ngayi, “Ikala kuno ku malyatilo a mawulu ami,”

⁴ nka muli na shihota mukati kenu, kami munafutuku bakakuyata na bihanganiko byabibi.

⁵ Yuvwililenu, bawushinda wami bakuhakiwa! Nka Nyambi unahata bakakushepwa ba litunga lino benge bakakuheta mu kukulupila na bakakukona wene ou akulupishile kukwabo bakumuhaka?

⁶ Ngoboni enu munakende bakakushepwa. Nka bakakuheta bakumiyandisha na kumikokela ku nkuta?

⁷ Nka nibo bakuhandula lizina elye lyaliwahe mukutumbiwa nalyo?

⁸ Ndi mukwinzalisha ndayano za Wene, ngonehe byatikitiwile ngayi, “Haka ndambo yobe nehi walihaka obe mwine,” mukutenda shiwahe.

⁹ Ngoboni ndi mukuhota bantu, mukutenda wubi na kuyatiwa ku ndayano ngo bakakushanuka.

¹⁰ Ndaba nimwendi ukuholeka ndayano nimwazo, ngoboni akiluku mu shuma shimo uli na mulandu ku nimwazo.

¹¹ Ndaba ou wambile ngayi, “Hinga mutenda wunjenge,” wambile kami ngayi, “Hinga uziha.” Nohobene ndi ukubula kutenda wunjenge, ngoboni ukuziha, unafutuku kwinga mukakukiluka ndayano.

¹² Ambenu noho, na kutenda noho ngo aba bakayatiwa na ndayano za kushoboloka.

¹³ Ndaba ukayatiwa na kubula nceshe, ou unabulu kuyuvwa nceshe, nceshe zikulishamba ha kuyata.

¹⁴ Kukuyavwa nahiti, bawushinda wami, hinga muntu ukwamba ngayi unakulupili, ngoboni ukubula milimo? Kati kukulupila kukutwesha kumupulwisha ndi?

¹⁵ Ndi kawushinda wa mulume hinga wa mukazi uli na wuvwu, na kubula byakulya bya ha mutena.

¹⁶ Na umo kukwenu ukwamba kukwabo ngayi, “Yenu na kumwena, tukuminenu na kwikuta!” Ngoboni kubapana mufwako byuma bya kuyavwila ku lutu kukuyavwa nahiti?

¹⁷ Nahiyo kukulupila ndi kukubula milimo, kunafu, ndi kukwikala inkayako.

¹⁸ Kampe muntu ukwamba ngayi, “Obe uli na kukulupila, nanami nili na milimo.” Nikakumbula ngayi, “Moneshe kukulupila kwobe kwakubula milimo. Nanami nikakumonesha kukulupila kwami na milimo yami.”

¹⁹ Obe ukukulupila ngayi kuli Nyambi umo, ukutenda shiwahe, mayimbwe kami akukulupila na kukanka.

²⁰ Ngoboni, obe muntu wowa, kampe ukushinga kulimuka ngayi kukulupila kwakubula mulimo kunafu ndi?

²¹ Nka Abulahama tatiyetu wolokeshiwile na milimo oho apehelelele Ishake mwanendi ha shihanda?

²² Kati mukumona ngayi kukulupila kwatendele hamo na milimo yendi na kukulupila kwendi kwa lembulukile na milimo ndi?

²³ Byatikitiwile byambile ngayi, Abulahama wakulupilile Nyambi, pe ndaba ya kukulupila, Nyambi wamumonene ngayi wakwoloka, kami niye watumbiwile ngayi muhoni wa Nyambi.

²⁴ Nohobene mukumona ngayi muntu ukwolokeshiwa na milimo, kaliha na kukulupila pele.

²⁵ Nahiyo kami Lahabi, niye mukalwiholwiho wolokeshiwile na milimo oho ekalile na kutambula bakakuhokela, kami wabafumishile na nzila yashenge.

²⁶ Ndaba ngo lutu lwakubula moyo lunafu, nahiyo kami kukulupila kwakubula milimo kunafu.