Taitashi 2 - Kulimama Kwakupya

Kulongesha kwakupwisha

¹ Ngoboni obe longesha byakufwanina kulongesha kwakupwisha.

² Tongweza balume bashikulwane ngayi benge bakubomba, bakakutenda byakulubuluka, bakabihanganiko bya ngana, bakakukulupila kwakupwisha, bakashishemo, nabaka lunzewe.

³ Kami tongweza bambuyama bashikulwane ngayi bekale na biheka byabiwahe. Hinga benga bakakubangila, hinge bakakukolwa. Banafwanini kulongesha byuma byabiwahe,

⁴ mwanga batweshe kulongesha tuhombeli ngayi bahake bakokwabo, na bana babo.

⁵ Babalongeshe ngayi bekale na bihanganiko bya ngana, balilame, benge bakakulama shiwahe minkanda yabo, bekale na shishemo, kami baombatale ku bakokwabo, ngayi lizu lya Nyambi libule kuhanduliwa.

⁶ Nohobene ambila bandumbana ngayi benge bakakulima.

⁷ Mu byuma nimwabyo, obe winge mukakutenda byabiwahe ngayi mwanga bamonene kukwobe. Ebye ukulongesha binge byakupwisha, kami ulongeshe na maleema.

⁸ Wambe mazu akupwisha, ngayi kubule wakunyanciwa, pe baya bakukulwisha mwanga bayene, ndaba bakabula shuma shashibi sha kwamba hahetu.

⁹ Longesha bandungo ngayi baombatale bahekulyabo, mwanga babawahililishe mu byuma nimwabyo, kami hinga balikanangana nabo.

¹⁰ Hinga bayibila bahekulyabo, ngoboni bikati nimwabyo bamoneshe wuwahe na kupwisha, mwanga mu byuma nimwabyo, bamoneshe wuwahe wanebye banalilongeshe bya Nyambi Mupulwishi wetu.

¹¹ Nyambi unamoneshe nceshe zendi za kupulwisha bantu nimwabo.

¹² Nceshe zendi zikutulongesha ngayi tukane mashewinizi ha bya Nyambi na kukana mahungu a bya muno mu kaye, mwanga tulilame, twikale na bihanganiko byakwoloka, twinge bakakulemesha Nyambi muno mu kaye,

¹³ oho tukutatilila Mutena wa mfuywezi uya tukulumbeza oho kukaholoka wuwahe wa Nyambi wamunene na Mulamwini wetu Yeshu Kilishitu.

¹⁴ Ou walitupwile niye mwine ndaba yanetu, ngayi atukulize ku wubi nimwawo, pe watuyeleshele ngayi twinge bantu bendi niye mwine, baya bakuzundamina kutenda milimo yayiwahe.

¹⁵ Ebye nibyo byuma unafwanini kulongesha. Bashumankanishe kami bakalihile na ngovu nimwazo. Hinga witabila ngayi muntu wamina akuyinishe.