Taitashi 1 - Kulimama Kwakupya

¹ Ami Paulu, mukamilimo wa Nyambi, na ntumwana wa Yeshu Kilishitu. Nahatiwile ngayi niyavwe bakakukulupila baya anahata Nyambi, mwanga nibatwaminine mu kalimukisho kakupwisha ka nyoyelo ya Wunyambi.

² Ncango zami zili ha shikulupisho sha wumi wa mwayile myaka. Nyambi wakubula mahalo, wakulupishile ou wumi wa mwayile myaka oho kaye shilolo kalengiwe.

³ Ngoboni ha bikati byabiwahe unawuhololo mu lizu lyendi, elye apanikile kukwami, elye nikushimikila na ndayano za Nyambi Mupulwishi wetu.

⁴ Kuli Taitashi, mwanami wakupwisha mu kukulupila omu tuli nimwetu hamo. Mwanga Nyambi Tate na Mwene Kilishitu Yeshu Mupulwishi wetu bakupane nceshe na kumwena.

Mulimo wa Taitashi mu Kilete

⁵ Nakushiyile mu Kilete ngayi mwanga utende byuma biya byabulile kumaninina. Kuhata bakulwane mu munzi nimwawo, ngonehe nakutongwezele.

⁶ Mukulwane nafwanini kwinga wakubula shihepwa, mulume wa mukazi umo, muntu uli na bana bakakukulupila, kaliha bakuwubenkanyi, hinge kubula kwombatala.

⁷ Ndaba mukulwane wa litengo nengi mukakutwaminina milimo ya Nyambi, nafwanini kwinga wakubula shihepwa. Kaliha nafwanini kwinga wa mukali, hinge mukakupilama nawangu. Kaliha nafwanini kwinga mukakukolwa, hinge mukamangunga, hinge mukamutongo wa mali.

⁸ Ngoboni enge mukakukobelela bayeni, mukakuhaka byuma byabiwahe, nafwanini kwinga mukakulilama, enge wakwoloka na wakuyela na kushangama.

⁹ Nafwanini kukakatila lizu lyakupwisha ngonehe lyalongeshiwile, mwanga atweshe kushumankanisha baminendi na lizu lyakupwisha na kushiwulula baya bakulikanangana.

¹⁰ Ndaba kuli bantu babengi bakamafutufutu, baya bakakwamba byowa, na bakakwongeza, shinene baya bakwitabila bya Bayunda.

¹¹ Banafwanini kumweneshiwa, ndaba balinakushanwisha litala nimwalyo, oho balinakulongesha byuma byakubula kufwanina. Bakutenda ebye ndaba bali na mutongo wa mali.

¹² Umo wa bamiluwe babo unamba ngayi, “Bakakilete benga ba mahalo shikati nimwasho, twanzama twatubi, na bakawuvwa wa mutongo.”

¹³ Wupaki ou wakupwisha. Nohobene bakalihile shikuma, ngayi bekale na kukulupila kwakupwisha,

¹⁴ mwanga babule kuyuvwilila ku tushimpu twa Bayunda, na ku ndayano za bantu bakukana kupwisha.

¹⁵ Ku bakakuyela, byuma nimwabyo byenga byakuyela, ngoboni ku bakakutenda byabibi na bakakubula kukulupila, kowa shuma shakuyela. Ngana zabo na bihanganiko byabo byabibi.

¹⁶ Bakwamba ngayi bakulimuka Nyambi, ngoboni bakumukana na milimo yabo. Ndaba bakakutenda bya mazilo, bakakubula kwombatala, bakakukana mulimo nimwawo wawuwahe.