Ngalatiya 1 - Kulimama Kwakupya

¹ Ami Paulu, ntumwana, unahatiwi kaliha ngayi na shifungo sha bantu, hinge ndi kupitila mu muntu, ngoboni kupitila muli Yeshu Kilishitu na Nyambi Tate ou wamushangwile ku bafu.

² Bawushinda nimwabo bali hamo nanami kuno bakushangwisha matengo a mu Ngalatiya.

³ Mwanga Nyambi Tate na Mwene wetu Yeshu Kilishitu bamipane nceshe na kumwena.

⁴ Ou walipanine niye mwine ndaba ya wubi wetu, ngayi atulamwine ku wubi ou uli muno mu kaye kuya na shifungo sha Nyambi Tatiyetu.

⁵ Kukwendi kwikale wuwahe wa mwayile myaka! Ameni.

Ncango zaziwahe zenga zimo

⁶ Nakomoko ngayi munafumu na wanguwangu kukwendi ou wamihanine mu nceshe za Kilishitu, mulinakuya ku ncango zashenge,

⁷ kaliha ngayi ncango zashenge, ngoboni kuli bamo bakushinga kumikabakanisha, kami bakushinga kushanwisha ncango za Kilishitu.

⁸ Ngoboni hinge ndi etu hinge ndi lingeloyi linafumu muyilu, ukushimikila kukwenu ncango zakulishiya na ziya twashimikilile kukwenu, mwanga enge wakukutiwa.

⁹ Ngonehe tunamba, nishili kubokelaho kami ngayi, ndi muntu wamina ukushimikila ncango zashenge zakulishiya na ziya mwatambwile mwaka, uya muntu mwanga enge wakukutiwa.

¹⁰ Kati ami nikushinga kuyamiziziwa ku bantu ndi kuli Nyambi? Hinge nikushinga kuwahilisha bantu ndi? Shinga nikushinga kuwahililisha bantu, shinga kaliha nili mukamulimo wa Kilishitu.

Wuntumwana wa Paulu eshi wezile

¹¹ Bawushinda nikushinga mulimuke ngayi eze ncango zaziwahe nashimikilile kukwenu, kaliha zengile zakufuma ku muntu.

¹² Ndaba kaliha nazitambwile ku muntu, kami kowa muntu wandongeshele ziya ncango, ngoboni Yeshu Kilishitu niye waholwele ziya ncango kukwami.

¹³ Ndaba mwayuvwile nyinkalo yami ya mwaka oho nengile mukakukonka kukulupila kwa Bayunda, na neshe nayandishile shikuma litengo lya Nyambi, nashingile kulilobesha.

¹⁴ Mu zintendelo za Shiyunda napitakanine bambayi babengi baya twahemuwililile hamo. Naliyakile shikuma ku shihemwa sha batatizami.

¹⁵ Ngoboni Nyambi ou wahatile oho shilolo nihemuwe, ou wanyihanine na nceshe zendi, wawahililile

¹⁶ ha kuholola Mwanendi kukwami, ngayi mwanga nikamushimikile ku Bakamatunga. Kaliha nayile ku muntu wamina ngayi akantongweza ebye nafwanina kutenda,

¹⁷ kami kaliha nakankalalilile ku Yelushalema ngayi nikamone baya bengile bantumwana kumbili yami, ngoboni nayile ku Alebya, niho kami nabokele ku Ndamashika.

¹⁸ Munyima ya myaka yihatu, niho nakankalalilile ku Yelushalema nakumona Pita, nekalile nendi matena likumi na mutanu.

¹⁹ Kaliha nalimonene na bantumwana bamina, ndele tuhu Yakoba mukonzo wa Mwene.

²⁰ Ebye ninamitikitili byakupwisha, Nyambi halimuka ngayi kaliha bya mahalo.

²¹ Kunyima yanebye nayile ku matunga a Shiliya na ku Shilisha.

²² Ha shikati shiyo, bakamatengo a Kilishitu a mu Yundeya, kaliha bandimukile.

²³ Ngoboni bayuvwilenga tuhu ebye bambilenga bantu bamina ngayi, “Uya mulume watuyandishilenga, hano ulinakushimikila kukulupila kuya ashingile kulobesha.”

²⁴ Niho bayemezele Nyambi ndaba yanami.