Milimo 8 - Kulimama Kwakupya

¹ Na Shaulu wetabilile ngayi Shetefwano afwe. Ha mutena uyo, batatikile kuyandisha shikuma litengo mu Yelushalema. Bakakukulupila nimwabo bapanzaninine mu matunga a mu Yundeya na mu Shamaliya, kwashalile tuhu bantumwana.

Shaulu ukuyandisha litengo

² Balume bakakulipana kuli Nyambi bashimbile Shetefwano bakamufundile, kami bamulilile shikuma.

³ Ngoboni Shaulu washingile kunongesha litengo, wenginine mu matala nimwawo, wafumishile balume na bambuyama bakakukulupila hamunkanda, wabengizile mu tolongo.

Ncango zaziwahe zikushimikiwa mu Shamaliya

⁴ Nohobene bakakukulupila aba bapanzanine, bashimikilile lizu nimwako oku bayile.

⁵ Fwilipu wayile ku munzi wa Shamaliya, washimikilile Kilishitu kukwabo.

⁶ Na mutima umo, likunge lya bantu bayuvwishishile ebye ambilenga Fwilipu, oho bamuyuvwile na kumona bikomokesho ebye atendele.

⁷ Mayimbwe afuminenga ku bantu babengi hiabilikiza na lizu lyalinene, kami bakakalepa babengi na bakupenga banyongomanine.

⁸ Pe kwekalile kuwahilila kwakunene mu munzi uyo.

⁹ Ngoboni kwekalile muntu umo watumbiwile Shimoni, watendelenga malele mu munzi wa Shamaliya bikati bya kunyima, pe bantu nimwabo bamukomokelenga. Waliyemezelenga niye mwine ngayi wamunene.

¹⁰ Bantu nimwabo mu munzi bamuyuvwilenga kubalika ku babashe kutwala ku babanene bambilenga ngayi, “Ou muntu uli na ngovu za Nyambi zikutumbiwa ngayi, ‘Ngovu Zazinene.’ ”

¹¹ Pe bamuyuvwilenga, ndaba shengile shikati shashitali abongezelenga na malele.

¹² Ngoboni baya bakulupilile Fwilipu oho ashimikilenga bya Wene wa Nyambi na lizina lya Yeshu Kilishitu, bazubilishiwile balume na bambuyama.

¹³ Na Shimoni kami wakulupilile, niho azubilishiwile. Wekalile na Fwilipu, pe oho amonene bikomokesho na bimonekesho byatendiwilenga wakomokele.

¹⁴ Oho bantumwana aba bekalile mu Yelushalema bayuvwile ngayi Bakashamaliya banatambulu lizu lya Nyambi, batumine Pita na Yowano kukwabo.

¹⁵ Oho bakumine babalombelelele ngayi batambule Moyo Wakuyela.

¹⁶ Ndaba Moyo Wakuyela oho shilolo akume hali umo kukwabo, ngoboni bazubilishiwile tuhu mu lizina lya Mwene Yeshu.

¹⁷ Niho Pita na Yowano bakambikile maboko wabo hahabo, pe batambwile Moyo Wakuyela.

¹⁸ Shimoni amonene ngayi Moyo Wakuyela unapanikiwi ku bakakukulupila oho bantumwana banakambiki maboko hahabo, wapanikile mali kuli Pita na Yowano,

¹⁹ wambile ngayi, “Mpanikenu nanami eze ngovu, ngayi ou nimwendi nikakambika maboko mwanga atambule Moyo Wakuyela.”

²⁰ Ngoboni Pita wambile kukwendi ngayi, “Mali wobe anonge hamo nanobe, ndaba ukuhanganika ngayi ukutwesha kutambula shishemo sha Nyambi na kulanda na mali!

²¹ Mbalila hinge shitapilo mu nou mulimo ufwabyo, ndaba mutima wobe kaliha uli shiwahe ku meho a Nyambi.

²² Nohobene tenguluka ku kuluwa kwobe, kami lombela kuli Mwene, ngayi shinga shikutwesheka akuyatile hanebye bihanganiko bya mu mutima wobe.

²³ Ndaba namono ngayi uli na mwili shikuma kami uli mu tolongo ya wubi.”

²⁴ Niho Shimoni akumbwile Pita na Yowano ngayi, “Ndombelelenu kuli Mwene ngayi ebye munamba hinga bitendiwa hahami.”

²⁵ Haya oho bapanine wupaki wabo na kushimikila lizu lya Mwene, Pita na Yowano babokele ku Yelushalema, hibashimikila ncango zaziwahe mu minzi yayingi ya mu Shamaliya.

Fwilipu na shilolo wa ku Etopya

²⁶ Lingeloyi lya Mwene lyambile kuli Fwilipu ngayi, “Katuka, yanga ku mabukubuku, ku nzila yikufuma ku Yelushalema kuya ku Ngaza, nzila ya libelelengwa.”

²⁷ Wakatukile, wayile. Waliwanine na ntatula* wa ku Etopya, wengile shilolo wamunene, ou walaminenge wuheti nimwawo wa Kandashi mwene wa mbuyama wa litunga lya Etopya. Uya muntu wafuminenga ku Yelushalema kuya ayile na kulemesha Nyambi.

²⁸ Wabokelenga kukwabo, hinga ekala mu koloyi yendi, halaba mu libuka lya muluwe Ishaya.

²⁹ Niho Moyo wambile kuli Fwilipu ngayi, “Yanga kwakwipi na yiya koloyi.”

³⁰ Fwilipu wetukilile ku koloyi, pe wayuvwile uya muntu halaba mu libuka lya muluwe Ishaya. Wamwipwile ngayi, “Hiwuyuvwishisha ebye ukulaba ndi?”

³¹ Shilolo wakumbwile ngayi, “Nikutwesha kuyuvwishisha nahiti ndi kowa wakundubulwila?” Wanyepele Fwilipu ngayi akandame mu koloyi, ekale nendi.

³² Walabilenga mazu atikitiwa ngayi, “Ngo mbelele ukutwaliwa na kuzihiwa ngonehe amwenanga mwana mbelele ndi balinakumusheha wushako, kaliha wambile shimina.

³³ Walilimbwilishile, pe kaliha bamuyatile na kupwisha. Kati yani ukutwesha kutontolola mukoka wendi? Ndaba wumi wendi hano hanci unamana.”

³⁴ Shilolo wepwile Fwilipu ngayi, “Nikukunyepa ntongweze, kati muluwe mu mazu awa ukulitoya niye mwine ndi ukutoya muntu washenge?”

³⁵ Niho Fwilipu atatikile kumutongweza bya aya mazu, pe wamushimikilile ncango zaziwahe za Yeshu.

³⁶ Oho bendelenga mu nzila, bakumine kuya kwekalile mema, pe shilolo wambile ngayi, “Mona, mema awa. Haya bishini nikubula kuzubilishiwa?”

³⁷ Fwilipu wambile kukwendi ngayi, “Ndi ukukulupila na mutima wobe nimwawo, ukutwesha kuzubilishiwa.” Wakumbwile ngayi, “Nikutwesha ninakulupili ngayi Yeshu Kilishitu niye Mwana Nyambi.”

³⁸ Niho shilolo emikile koloyi, pe bakunkulukile mu mema wubili wabo, Fwilipu na uya shilolo, pe Fwilipu wamuzubilishile.

³⁹ Oho bazabukile mu mema, Moyo wa Mwene washimbile Fwilipu, pe shilolo kaliha wamumonene kami, ngoboni wayile mu nzila yendi hinga awahilila.

⁴⁰ Ngoboni Fwilipu wakaliwanine uli mu Azotashi, wayile na kushimikila ncango zaziwahe mu minzi nimwayo kukakuma na ku Sheshaliya.