Milimo 5 - Kulimama Kwakupya

Ananiyashi* na Shafwila

¹ Ngoboni mulume watumbiwile Ananiyashi, hamo na mukazendi Shafwila balandishile limvu lyabo.

² Waliyuvwashanine na mukazendi, walitentekelele mali amo, pe amina ashalileho watwalile ku bantumwana.

³ Ngoboni Pita wambile ngayi, “Obe Ananiyashi, kati shumangani Shatana anengini mu mutima wobe ngayi ushimike mahalo ku Moyo Wakuyela na kuholeka shitapilo sha mali a limvu lyobe?

⁴ Kati oho shilolo ulilandishe, kaliha lyengile limvu lyobe ndi? Munyima ya kulilandisha, kati mali kaliha engile obe ndi? Shumangani unahanganiki kutenda shuma eshe mu mutima wobe? Kushimika mahalo ku bantu wufwako ngoboni kuli Nyambi unashimiki mahalo!”

⁵ Oho Ananiyashi ayuvwile awa mazu, wawile hanci, pe wafwile. Bantu aba bayuvwileko nimwabo bekalile na bowa wawunene.

⁶ Bandumbana bezile na kumuvungila mu likwiza. Niho bamukatwile kuya na kumufunda.

⁷ Oho kwapitile mahola akushinga kukuma ku ahatu, mukazendi wenginine, hinga abula kulimuka eshe shatendiwile.

⁸ Pita wamwipwile ngayi, “Ntongweze, kati oho mwalandisha limvu lyenu, ndando yayo yengile mali awa ndi?” Wakumbwile ngayi, “Ingoi, niyo.”

⁹ Niho Pita amwipwile ngayi, “Kati munaliyuvwashana nahiti hamo kwezeka Moyo wa Mwene? Mona, mawulu a bantu baya na kufunda mukokwobe ali ha shipana, bakakutwala nobe na kukufunda!”

¹⁰ Hohobene wawililile ku mawulu a Pita, pe wafwile. Bandumbana benginine, bamuwanine unafu. Bamukatwile bayile na kumufunda ku nkumo ya mukokwendi.

¹¹ Shikungulukilo nimwasho na bantu nimwabo aba bayuvwile byuma ebye, bekalile na bowa wawunene.

Bimonekesho na bikomokesho bya bantumwana

¹² Bantumwana batendelenga bimonekesho na bikomokesho byabingi ku bantu. Bakakukulupila nimwabo bakungulukilenga na mutima umo mu mazezelo a Sholomoni.

¹³ Kowa muntu wa kwashenge wazamukile kukunguluka nabo hamo, hinge noho bantu babayamizile shikuma.

¹⁴ Ngoboni bantu babengi balitabilile muli Mwene, pe lyengile likunge lya balume na bambuyama.

¹⁵ Ndaba yanebye batendelenga bantumwana, pe bantu baletelenga bakakukola mu zinzila, babalangikile ha malili na ha manala, ngayi Pita akapitilaho mumvulu wendi ufwike bamo kukwabo.

¹⁶ Likunge lya bantu bafumine ku minzi ya hahepi na Yelushalema, kami lyakungulukile, baletelenga bakakukola na bayo bayandilenga ku mayimbwe, pe nimwabo banyongomanine.

Bantumwana bakuyandishiwa

¹⁷ Niho Mukulwane wa Bakankombela Nimwabo hamo na baya ekalilenga nabo, baya bengile bakakanzunga ka Bashanduki, bekalile na lihungu na bantumwana.

¹⁸ Bakwatile bantumwana, pe babayakile mu tolongo.

¹⁹ Ngoboni wushiku lingeloyi lya Mwene lyashinkwilile bipana bya tolongo na kubafumishamo. Lyambile ngayi,

²⁰ “Yenunga, mukemane mu Litala lya Nyambi mukambe ku bantu mazu a wumi wawupya.”

²¹ Oho bayuvwile ebye benginine mu Litala lya Nyambi lumenemene, pe batatikile kulongesha. Mukulwane wa Bakankombela Nimwabo na baya ekalilenga nabo bakungwile nkuta yayinene ya bakulwane ba Bayunda. Niho batumine bantu ku tolongo mukuleta bantumwana.

²² Ngoboni oho babilolo bakumine ku tolongo, kaliha babawaninemo, pe babokele na kubatongweza ngayi,

²³ “Tunawana tolongo yakushinka na bakakulama banemana hamunkanda wa shipana, ngoboni oho tunashinkululu, shilolo tuwanemo muntu.”

²⁴ Oho mukulwane wa bakakulama ku Litala lya Nyambi na bakankombela ba bakulwane bayuvwile mazu awa, bakomokele shikuma shuma shinatendiwi ku bantumwana.

²⁵ Niho kwezile muntu umo wabatongwezele ngayi, “Bantu baya mwayakile mu tolongo, banemana mu Litala lya Nyambi na kulongesha bantu!”

²⁶ Niho mukulwane wa bakakulama ku Litala lya Nyambi hamo na bantu bendi bayileko, pe bakaletele bantumwana ngoboni kaliha na mushunga, ndaba batinine ngayi bantu bakubapuha mamanya.

²⁷ Oho baletele bantumwana, babemikile kumbili ya nkuta, niho Mukulwane wa Bakankombela Nimwabo abepwile ngayi,

²⁸ “Kaliha twamikanishile ngayi hinga mulongesha mu lizina elye ndi? Ngoboni mwenzalisha kale Yelushalema na kulongesha kwenu, kami mukushinga ngayi lufu lwa nou muntu lwikale hahetu!”

²⁹ Niho Pita na bantumwana bamina bakumbwile ngayi, “Tukufwanina kwombatala Nyambi kupitakana bantu.

³⁰ Nyambi wa batatizetu, washangwile Yeshu ou mwazihile ha kumukoleka ha shishempakano.

³¹ Nyambi wamutumbalalishile na kumuyaka ku liboko lyendi lya shilyo, ngayi enge Mukakutwaminina na Mukakupulwisha, mukupana ku bantu ba Ishalela kutenguluka na kuyatila kwa wubi.

³² Etu tuli bapaki ku byuma ebye, hamo na Moyo Wakuyela ou anapana Nyambi kukwabo bakumwombatala.”

Ngamaliyele ukunangula bakulwane ba Bayunda

³³ Oho bayuvwile ebye bapilamine, pe bashingile ngayi bazihe bantumwana.

³⁴ Ngoboni umo kukwabo, Kafwalishi walizina lya Ngamaliyele, mulongeshi wa ndayano, wakulemeekiwa mukati ka bantu nimwabo, wemanine mu nkuta. Wabatongwezele ngayi batutwishe bantumwana hamunkanda kashikati.

³⁵ Pe wambile ku bakankuta ngayi, “Enu Baishalela, keyenu nanebye mukushinga kutenda aba bantu.

³⁶ Anukenu ku matena akunyima kwezile muntu watumbiwile Teundashi, waliyemezele ngayi nengi wamunene, bantu balifungilile kukwendi bashingile kulingana myanda inaa. Ngoboni wazihiwile, kami baya bamukonkele bapanzanine, pe bamanine.

³⁷ Munyima ya muntu owe, ha shikati shakulaba bantu, kwezile kami Yundashi wa ku Ngalileya, wakokele bantu babengi munyima yendi, pe niye kami wanongele na baya nimwabo bamukonkele bapanzanine.

³⁸ Nohobene nikumitongweza ngayi ha shambo eshe hinga mutenda shimina ha naba bantu, balehenu baye. Ndaba ndi ebye bakuyongola hinga bakutenda bikufuma ku bantu, bikamana,

³⁹ ngoboni ndi byakufuma kuli Nyambi, kukatwesha kubimanisha mufwako. Kutina mukawaniwe ngayi munakulwisha Nyambi!” Nkuta yakankole kunangula kwa Ngamaliyele.

⁴⁰ Behanine bantumwana mukati, babakamine, babakanishile ngayi hinga bamba kami mu lizina lya Yeshu, niho babalehele ngayi baye.

⁴¹ Bantumwana bafumine mu nkuta na kuwahilila ndaba balabiwile ngayi bakufwanina kuyenena lizina lya Yeshu.

⁴² Pe ha mutena ha mutena balongeshelenga na kushimikila mu Litala lya Nyambi na mu matala a bantu, ncango zaziwahe ngayi Yeshu niye Kilishitu.