Milimo 4 - Kulimama Kwakupya

Pita na Yowano bakuyatishiwa

¹ Oho Pita na Yowano bambilenga na bantu, bakankombela na mukulwane wa bakakulama ku Litala lya Nyambi na Bashanduki bezile kukwabo.

² Bapilamine ndaba baya bantumwana babili balongeshelenga bantu, kami bashimikililenga ngayi Yeshu washangukile ku bafu, oku kukumonesha ngayi bafu bakashanguka.

³ Niho bakwatile Pita na Yowano, pe babayakile mu tolongo, kutatila ngayi kushe taha ndaba engile mazolo.

⁴ Ngoboni bantu babengi baya bayuvwile lizu betabilile. Aba balifungilile bashingile kukuma ku makulukazi mutanu.

⁵ Oho kwashile bakulwane ba Bayunda na bakulwane na bakakulongesha ndayano, bakungulukile mu Yelushalema.

⁶ Baliwanine na Anashi Mukulwane wa Bakankombela Nimwabo na Kayafwashi na Yowano na Alekizanda na bamina ba livumo lya Mukulwane wa Bakankombela Nimwabo.

⁷ Baletele Pita na Yowano mukati kabo, pe babepwile ngayi, “Kati munatende ebye na ngovu ngani? Hinge na lizina lya yani?”

⁸ Niho Pita hinga enzala na Moyo Wakuyela, wambile kukwabo ngayi, “Enu bakakutwaminina bantu, nanenu bakulwane,

⁹ ndi lelo mukutwipula ndaba ya mulimo wawuwahe unatendiwi ku nou wakupenga, ngayi unanyongomana nahiti?

¹⁰ Haya mukufwanina kulimuka nimwenu, kami na bantu nimwabo ba Ishalela banafwanini kulimuka ngayi, ou muntu unemana kumbili yenu, unanyongomana mu lizina lya Yeshu Kilishitu wa ku Nazaleta. Ou niye mwakolekele, ngoboni Nyambi wamushangwile ku bafu.

¹¹ Yeshu niye ukutoyiwa mu byatikitiwa ngayi, ‘Limanya mwakanine enu bakakutenda matala, nilyo linafutuku kwinga limanya lya kushuma lya mu mbango.’

¹² Pe kupulwishiwa kukawaniwa mumwendi tuhu, ndaba kowa lizina lyamina munceto ya liyilu linapanikiwi ku bantu, muya ukapulukila.

¹³ Bakankuta oho bamonene kukanca kwa Pita na Yowano, na kulimuka ngayi bengile bantu tuhu nahiya bakakubula kulilongesha, bakomokele. Babalimukile ngayi bekalilenga hamo na Yeshu.

¹⁴ Ngoboni oho bamonene uya muntu wanyongomanine hinga emana na Pita na Yowano, kaliha batweshele kukanangana.

¹⁵ Niho babatongwezele ngayi bafume mu nkuta baye hamunkanda. Balyambashanine mukati kabo ngayi,

¹⁶ “Tukubatenda nahiti aba bantu? Ndaba eshe shikomokesho banatende shashinene, kami shinalimukiwi ku bantu nimwabo bazika mu Yelushalema, pe kutwesha kushikana tufwako.

¹⁷ Ngoboni ndi tukushinga ngayi ebye hinga bipanzana ku bantu nimwabo, tubakanishenu ngayi hinga bamba kami mu lizina elye ku muntu hinge umo.”

¹⁸ Niho babehanine kami, babambilile ngayi, hinga bamba hinge kulongesha mu lizina lya Yeshu kami.

¹⁹ Ngoboni Pita na Yowano babakumbwile ngayi, “Liyatenu enu bamwine ndi shashiwahe ku meho a Nyambi kuyuvwa byenu kupitakana Nyambi.

²⁰ Ndaba kutwesha kuleha kushimikila ebye tunamono nanebye tunayuvwu tufwako.”

²¹ Oho bamanishile kubambila shikuma babalehele ngayi baye, bakwangile kuwana nzila ya kubashushula, ndaba bantu nimwabo bayemezele Nyambi hanebye byatendiwile.

²² Uya muntu, ou shikomokesho sha kumunyongomanisha shatendiwile kukwendi, wekalile na myaka ya kupitakana makumi anaa.

Bakakukulupila bakulombela ngayi bakance

²³ Oho Pita na Yowano babashobolwele, babokele ku baminabo, pe babatongwezele nimwabyo bambile kukwabo bakankombela ba bakulwane na bakulwane ba Bayunda.

²⁴ Oho bayuvwile ebye, nimwabo batatikile kulombela na kukatula mazu wabo kuli Nyambi na mutima umo ngayi, “Obe Nyambi Shakalenga walengele liyilu na hanci na liwate na byuma nimwabyo bilimo.

²⁵ Wambile kuli tatiyetu Ndavita mukamulimo wobe mu Moyo Wakuyela ngayi, ‘Kati ndabangani Bakamatunga bapilamine? Kati ndabangani bantu bekalile na bihanganiko byowa bya kumfutukila?

²⁶ Bamyene ba hano hanci baliwahishililile, na batulela bakungulukile hamo, balwishile Mwene na Kilishitu wendi.’

²⁷ Ndaba mwashikuma Helonda na Pontiyashi Pilato bakungulukile hamo na Bakamatunga na bantu ba Ishalela mu lukena luno, balwishile Mukamulimo wobe wakuyela Yeshu ou obe wamwingile Kilishitu.

²⁸ Batendele byuma nimwabyo ebye wahanganikile mwaka na ngovu zobe na shifungo shobe ngayi bikatendiwe.

²⁹ Haya Mwene, mona mafumbila wabo, yitabilisha etu bakamilimo bobe ngayi tushimikile lizu lyobe na kukanca.

³⁰ Tandubula liboko lyobe na kunyongomanisha bantu, kami bilimukisho na bikomokesho bitendiwe mu lizina lya Yeshu Mukamulimo wobe wakuyela.”

³¹ Oho bamanishile kulombela, mwanya ou bakungulukilile wanyenkanine. Bantu nimwabo benzalile na Moyo Wakuyela, bashimikilile lizu lya Nyambi na kukanca.

Bakakukulupila bakulitapila byabo hamo

³² Nimwabo baya bakakukulupila bekalile na mutima umo na bihanganiko bimo. Pe kwabulile muntu wakwamba ngayi byuma ebye ahetele byengile byendi, ngoboni balitapilile nimwabyo ebye bekalile nabyo.

³³ Na ngovu zazinene bantumwana bapanine wupaki wa kushanguka kwa Mwene Yeshu, pe Nyambi wabapanikile mfuywezi zazingi.

³⁴ Kami kowa muntu mukati kabo wabulile shuma. Nimwabo baya bekalile na mafuba, hinge matala, bawalandishile, pe baletele mali yabiya balandishile,

³⁵ bawaletele ku bantumwana. Bantumwana batapishililenga mali ku muntu na muntu kwezekesha nabiya abulile.

³⁶ Yoshefwa ou wengile Kalevi wa ku litunga lya Shayipulashi, uya bantumwana batumbile ngayi Mbanambashi (kunungulula ngayi, “Mukakushumankanisha”),

³⁷ walandishile mfuba yendi, waletele mali, wawapanikile kuli bantumwana.