Milimo 3 - Kulimama Kwakupya

Muntu wakupenga ukunyongomanishiwa

¹ Ha mutena umina Pita na Yowano bayile ku Litala lya Nyambi ku shikati sha wulikumi na mutanu shikati sha kulombela.

² Pe kuyo ku shipana sha Litala lya Nyambi shiya shatumbiwile ngayi Shipana Shashiwahe, kwekalile muntu umo wahemuwile hinga apenga. Ha mutena na mutena bamutwalilenga ku shipana, ngayi anyepe byakumuyavwa ku baya bengininenga mu Litala lya Nyambi.

³ Oho amonene Pita na Yowano hibengina mu Litala lya Nyambi, wanyepele byakumuyavwa.

⁴ Pita na Yowano bamuconcomekele, pe Pita wambile ngayi, “Tutilamine!”

⁵ Uya muntu wabatilaminine, wahanganikile ngayi ukatambula shuma kukwabo.

⁶ Niho Pita ambile kukwendi ngayi, “Mali a shiliva na ngolinde nifwawo, ngoboni nikakupana eshe nilinasho, mu lizina lya Yeshu Kilishitu wa ku Nazaleta, yimana wende!”

⁷ Wamukwatile na liboko lya shilyo, pe wamwimikile. Hohobene mawulu na zingongo zendi byashumine.

⁸ Wakilukilile muyilu, wemanine, niho atatikile kwenda. Wenginine nabo mu Litala lya Nyambi henda na kukilozoka na kuyemeza Nyambi.

⁹ Oho bantu nimwabo bamumonene henda kami hayemeza Nyambi,

¹⁰ bamulimukile ngayi niye uya muntu wekalilenga na kunyepa byakumuyavwa ku shipana shatumbiwile ngayi Shipana Shashiwahe, bakomokele na kutampwa haneshe shatendiwile kukwendi.

Mazu a Pita mu Litala lya Nyambi

¹¹ Oho uya muntu azengaminine kuli Pita na Yowano, bantu nimwabo bakomokele, pe betukilile kukwabo mu mazezelo atumbiwile ngayi Mazezelo a Sholomoni.

¹² Oho Pita amonene nahiyo wambile ku bantu ngayi, “Bantu ba Ishalela kati munakomoko nahiti hanebye? Kati shumangani mukutuconcomekela, ngo ngayi tunatende ku nou muntu ngayi ende na ngovu zetu, hinge na kuyela kwetu?

¹³ Nyambi wa Abulahama na Ishake na Yakobo, ou Nyambi wa batatizetu, niye unapana wuwahe kuli Mukamulimo wendi Yeshu. Mwamupanine ku ba ka ndayano kami mwamukanine ku meho a Pilato, hinge oho Pilato ashingile kumushobola.

¹⁴ Ngoboni mwakanine wakuyela na kwoloka, pe mwanyepele Pilato ngayi amishobwele likombe.

¹⁵ Mwazihile mukakutwaminina ku wumi, ngoboni Nyambi wamushangwile ku bafu. Etu tuli bapaki banebye.

¹⁶ Zinengi ngovu za lizina lyendi, eze zinashumishi ou muntu wengile wakupenga. Ou mukumona, kami mwamulimuku, nanyongomanishiwi na kukulupila mu lizina lyendi. Kunengi kukulupila muli Yeshu kuya kunamunyongomanishi, ngonehe mukumumona nimwenu.

¹⁷ “Haya, bawushinda, nalimuku ngayi enu na batulela twenu mwatendele mu wulube.

¹⁸ Nyambi wambile mwaka muli bamiluwe nimwabo ngayi, Kilishitu wendi ukamona malwa. Pe washitendele shakupwisha ngonehe.

¹⁹ Nohobene tengulukenu, pe muboke kuli Nyambi ayatile wubi wenu, mwanga bikati byakukatuluka bize kufuma kuli Mwene,

²⁰ ngayi mwanga atume Kilishitu niye Yeshu ou amihatilile mwaka.

²¹ Nafwanini kwikala muyilu kutwala ku shikati osho Nyambi akawahisha byuma nimwabyo biya ambile mwaka muli bamiluwe bendi bakuyela.

²² Ndaba Moshesha wambile ngayi, ‘Mwene Nyambi yenu ukamitumina muluwe ngonehe antumine, ukenga umo wa bawushinda wenu. Munafwanini kwombatala nimwabyo ebye akamba kukwenu.

²³ Ou nimwendi ukabula kwombatala biya akamba uya muluwe, ukafumishiwa ku bantu ba Nyambi, pe ukanongeshiwa.’

²⁴ Miluwe nimwabo aba bambile kubalika kuli Shamwele na baya bamulundaminine nimwabo balubulwile ebye binatendiwi ha matena ano.

²⁵ Bikulupisho bya Nyambi muli bamiluwe binengi byenu, kami muli na shitapilo mukulimama okwe Nyambi atendele na bankaka zenu. Ngonehe ambile kuli Abulahama ngayi, ‘Ku mbuto yobe mikoka nimwayo ya hano hanci bakawana mfuywezi.’

²⁶ Nohobene Nyambi wahatile Mukamulimo wendi, ha kutatika wamutumine kukwenu, ngayi amifuywele ha kuletesha muntu na muntu ngayi atenguluke afume ku zinzila zendi zazibi.”