Milimo 28 - Kulimama Kwakupya

Paulu ha shikuli sha Malita

¹ Oho twapulukile, twayuvwile ngayi shikuli shiyo shatumbiwile Melita.

² Bantu banaha ha shikuli batumoneshele shikeketima shashinene. Batutambwile shiwahe batuyibikilile mundilo, ndaba ya mvula walokelenga, pe kwekalile mashika.

³ Paulu wayile na kuchaba shikuta sha nconco, oho ashiyakile ha liziko, niho liyoka lyafuminemo ndaba ya ntukumina, pe lyalamatilile ku liboko lyendi.

⁴ Oho bayo bantu bamonene liyoka lya wuhungu lya nyenzelele ku liboko lyendi, balyambashanine ngayi, “Mwashikuma muntu ou mukakuziha! Hinga na puluku ku liwate, ngoboni Nyambi wakwoloka kwitabila wufwako ngayi ayoye.”

⁵ Ngoboni Paulu waminzilile liyoka mu mundilo, kwakubula kuyuvwa kukola.

⁶ Bantu batatilile ngayi ukazimba, hinga ngayi ukawila hanci na kufwa. Ngoboni oho bamutilaminine shikati shashitali, ngoboni bamonene ngayi kowa shimina shinatendiwi, bantu bafutukile mu bihanganiko byabo, pe bambile ngayi, “Nengi umo wa banyambi!”

⁷ Hahepi na mbalila iyo kwekalile mafuba a Pambuliyashi, mukulwane wa shiya shikuli. Watutambwile na kutukobelela shiwahe mu litala lyendi matena ahatu.

⁸ Tata Pambuliyashi walanganine, ndaba wakolelenga mashikashika mu lutu na wulweli wa mu livumo wa kupitisha mukeza. Paulu wenginine mu litala wamulombelele, niho amukambikile maboko, pe wamunyongomanishile.

⁹ Oho kwatendiwile ebye, bantu bamo bakolelenga ba mu shikuli bezile, Paulu wabanyongomanishile.

¹⁰ Bantu bayo batupanikile ntupu zazingi, kami oho twayilenga batupanikile nebye twabulile.

Paulu ukukuma ku Loma

¹¹ Munyima ya zingonda zihatu, twayile lwendo lwetu mu shishepe shimina, shiyo shekalile mu shikuli shikati sha mupepo. Shishepe eshe shafuminenga ku Alekizandiliya, pe shatumbiwile ngayi, “Bana ba Bambuyu.”

¹² Oho twafuwile mu Shilakushi, twonzelelemo matena ahatu.

¹³ Oho twafuminemo kuyo twakulishile shibumbo sha liwate, niho twakafuwikile ku Lenjo. Munyima ya mutena umo, mpepo ya mu mbowela yapepokele, ha mutena wakulundamina twafuwikile ku Puteoli.

¹⁴ Kuyo twawanineko bakakukulupila bamo, batunyepele ngayi twikale nabo shunda. Niho twayile ku Loma.

¹⁵ Oho bakakukulupila bayuvwile mpupo yetu, bezile na kutushimbawila kukuma ku Mwanya Wakulandishila wa Apiyashi na ku Matala a Bayeni Ahatu. Paulu oho abamonene, wakambililile kuli Nyambi, kami washumankanishile.

Paulu ukushimikila ku Bayunda ku Loma

¹⁶ Oho twakumine mu Loma, Paulu bamwitabilishile kwikala ninkayendi na mukazinta mukakumulama.

¹⁷ Munyima ya matena ahatu, Paulu wehanine bakulwane ba Bayunda ngayi bakunguluke. Oho bakungulukile wambile kukwabo ngayi, “Bawushinda wami, hinge nabulu kutenda shuma sha kulwisha bantu, hinga biheka bya batatizetu na mushobo wetu, ngoboni nengile kayili kufuma ku Yelushalema, pe bantwalile ku Baloma.

¹⁸ Nibo bantatubile, bashingile kuncobolola, ndaba babulile kuwana mulandu wakufwanina kunzihila.

¹⁹ Ngoboni oho Bayunda bakanine na kandikiziwile ku nyepa ngayi mulandu wami ukayitishiwe kuli Nkeshali. Hinge noho nabulile shuma sha kuyatisha mushobo wami.

²⁰ Nibyo namihanini mukumimona na kwambola nenu. Ndaba namangiwi na ncimbi ezi ndaba ya kulumbeza kwa Ishalela.”

²¹ Bakulwane ba Bayunda bamukumbwile ngayi, “Etu shilolo tutambule man̄wati akufuma ku Yundeya akwamba byobe. Kami kowa ku bawushinda wetu, wezile kuno mukututontwelela hinga kututongweza shuma shashibi hahobe.

²² Ngoboni shinene tukushinga kuyuvwa bihanganiko byobe, ndaba kuti na kuti bantu bakwamba bya kanzunga kenu.”

²³ Hohobene baliyuvwashanine nendi mutena, babengi bezile ku litala ekalile. Paulu wabalongeshelenga, kutatika lumenemene kukuma na ku mazolo na kubatontwelela bya Wene wa Nyambi. Ha kubatoyela mazu a Moshesha na ku bamiluwe, wezekele kubakoka ngayi bakulupile Yeshu.

²⁴ Bamina bakulupilile ebye ambile, ngoboni bamo bakanine kukulupila.

²⁵ Oho baya bantu babulile kuliyuvwashana mukati kabo, pe bafumineho. Ngoboni shilolo bafumeho, Paulu wambile mazu awa kami ngayi, “Moyo Wakuyela wambile shiwahe oho atongwezele bankaka zenu kuli muluwe Ishaya ngayi,

²⁶ ‘Yanga ku bantu ba mushobo owu, ubatongweze ngayi, kuyuvwa mukayuvwa, ngoboni kukayuvwishisha mufwako, kumona mukamona, ngoboni kukamoneshesha mufwako.

²⁷ Ndaba mitima ya bantu aba yayikalu, bakuzika matu abo kami banazimanana meho abo. Kutina bamona na meho abo, pe bayuvwe na matu abo, bayuvwishishe na mitima yabo, na kutengulukila kukwami ngayi nibanyongomanishe.’ ”

²⁸ Paulu wabatongwezele ngayi, “Limukenu ngayi Nyambi unapana kupuluka oku ku Bakamatunga. Nanibo bakayuvwa.”

²⁹ Paulu oho ambile mazu awa, Bayunda bafumineho na kulikananganisha shikuma.

³⁰ Paulu wekalile kuyo myaka yibili mu litala lyendi apatalilenga, kami wabatambwilenga shiwahe nimwabo bezilenga kukwendi.

³¹ Washimikilenga bya Wene wa Nyambi na kulongesha bya Mwene Yeshu Kilishitu kwakubula muntu wamukanishile.