Milimo 27 - Kulimama Kwakupya

Paulu ukutwaliwa ku Loma

¹ Oho kwalimukiwile ngayi tukaya ku Itali na shishepe, bapanikile Paulu na batuyili bamina kuli mukakutwaminina banzita, lizina lyendi Njuliyashi, wa kazunga ka banzita kakutumbiwa ngayi Ongashitashi Kohoti.

² Twengilile mu shishepe shakumine ku Andilamatiyamu, eshe shafwanina kukulisha lukandwa lwa mu litunga lya Esha, pe twavuwile. Alishitako wa ku Teshalonika mu Mashendoniya wekalile netu.

³ Kwashile twakumine ku Shindone. Njuliyashi wekalile na nceshe na Paulu, wamuyitabilishile kuya ku bahoni bendi ngayi bakamuyavwe.

⁴ Oho twafuminemo twakulishile shikuli sha Shayipulashi ndaba ya mpepo yakandikile shishepe.

⁵ Niho twombokele liwate ku nkumo ya Shilisha na Pamfwiliya, twafuwukile mu Mila, munzi wa ku Lishiya.

⁶ Omu mukakutwaminina banzita wawanine shishepe shafumine ku Alekizandiliya shayilenga ku Itali, niho atwingizilemo.

⁷ Twendele shashishe mitena yayingi, twakumine hahepi na Kininda. Mpepo yatukwangishile, twapitile ku shikuli sha Kilete, ku mbalila ya Shalimone.

⁸ Twakulishilenga ku shibumbo na kuzumanana, twakumine ku mwanya watumbiwile ngayi Makobo Amawahe, hahepi na munzi wa Lasheya.

⁹ Twamanishile shikati shashitali, na Mutena wa Kuzila Kulya wapitile. Ha shikati osho shengile shakutinisha kwenda mu shishepe. Niho Paulu abatongwezele ngayi,

¹⁰ “Enu bawushinda, ninamono ngayi lwendo lwetu lukenga lwa malamo. Byuma byabingi bikabipa ku ntutu na shishepe, kami na bantu bakafwa.”

¹¹ Ngoboni Njuliyashi wayuvwililile ku mukakutwaminina shishepe na mwinewasho, kaliha ebye ambile Paulu.

¹² Ndaba shibumbo kaliha shengile shashiwahe kwikalamo shikati sha mupepo, bantu babengi bashingile ngayi bafumemo, ngayi ndi shikutwesheka bakakume ku Fonikishi na kwikalako mupepo. Fonikishi shengile shibumbo sha mu Kilete, shatilamina ku mabukubuku a ku mponchi na muncelele a ku mponci.

Nkuli ku liwate

¹³ Mpepo ya ku mponci yatatikile kupepoka shiwahe, bantu bahanganikile ngayi bakutwesha kutenda ebye bayongwele. Bafuwile, pe bavuwile na kukulisha ku shibumbo sha Kilete.

¹⁴ Ngoboni wanguwangu mpepo ya nkuli yatumbiwile “Yulokwilo” yatatikile kupepoka kufuma ku lukandwa.

¹⁵ Mpepo yakamine ha shishepe, ndaba kaliha twatweshele ku kandika mpepo, twalehele, pe shishepe shakukile na mpepo.

¹⁶ Oho twakumine hahepi na shikuli shamina sha Kaunda. Niho twatweshele kukoka kawato kakokiwilenga na shishepe, ngayi hinga kabipa.

¹⁷ Uya wato baukokelele mu shishepe, niho bakakuvuwa bamangile shishepe na nyimbwa. Batinine ngayi bakutapila ku shibumbo sha Limbiya. Bawishile likwiza, pe shakukile na mpepo.

¹⁸ Nkuli yanenehele shikuma, kwashile bayumbilile byuma bimo mu mema,

¹⁹ pe ha mutena wa wuhatu bayumbilile byuma bya shishepe mu liwate.

²⁰ Kaliha twamonene mutena hinga nyenye matena amengi, ngoboni nkuli yanenehele, twayongeshele kulumbeza nimwako kwa kupuluka.

Paulu ukushumankanisha mitima baminendi ha lwendo

²¹ Munyima ya kuzila kulya shikati shashitali, Paulu wemanine hakati kabo wambile ngayi, “Balume, hinga mwayuvwa ebye namba nakubula kufuwika ku Kilete, hinga byuma kubipa na kuyongala bifwako.

²² Ngoboni haya nikumitongweza ngayi mushume mitima! Ndaba kowa hinga umo ukafwa, ngoboni kukayonga tuhu shishepe.

²³ Ndaba wushiku kweza lingeloyi lya Nyambi, Nyambi ami nili wendi, ou nikulemesha.

²⁴ Lingeloyi linamba kukwami ngayi, ‘Hinga utina, Paulu! Unafwanini kwimana hambili ya Nkeshali. Ndaba ya nobe Nyambi ukalamwina myoyo ya nimwabo aba uli nabo mu shishepe.’

²⁵ Nohobene, enu balume tulenu mitima, ndaba nikukulupila muli Nyambi ngayi ebye anantongweze bikatendiwa nehi anantongweze.

²⁶ Ngoboni tukayumbiwila mu shikuli shamina.”

Bakuhenyena ku shibumbo

²⁷ Hakati ka wushiku wa likumi na kanaa, mpepo yatutwalile noku, noku mu Liwate lya Andiliya. Bakakwendesha shishepe bahanganikile ngayi tunakuhenyena ku shibumbo.

²⁸ Niho bapimine kukunama kwa liwate, pe bawanine ngayi ma mita a makumi anaa, kumbili bapimine kami, pe bawanine ngayi ma mita a makumi ahatu.

²⁹ Batinine ngayi shishepe shikupita ha mamanya, banyezumwishile byondo binaa mu liwate ku ntongo ya shishepe. Niho batatililile ngayi kushe.

³⁰ Bakakwendesha shishepe bashingile kutina mu shishepe. Niho bashezumwishile wato mu mema na kutenda ngo bakushinga ku yumbila byondo mu mema ku ntongo ya kumbili ya shishepe.

³¹ Niho Paulu atongwezele mukulwane wa banzita hamo na banzita ngayi, “Ndi aba bantu bafwako kwikala muno mu shishepe, kutwesha enu kupuluka mufwako.”

³² Niho banzita baketwile nyimbwa za wato, bawulehele, wawile.

³³ Oho kwashilenga Paulu wabanyepele nimwabo ngayi balye byakulya. Wabatongwezele ngayi, “Munekala zi shunda zibili na kutatilila kwakubula kulya shamina.

³⁴ Nohobene nikumilomba ngayi mulye byakulya ndaba eshe shakufwanina ndaba ya kupinduka kwenu. Kowa muntu kukwenu ukayongesha hinge luhuki lwa ku mutwe wendi.”

³⁵ Oho amanishile kwamba, Paulu watolele linkende, wakambililile kuli Nyambi ku meho abo nimwabo, pe wapabwile linkende watatikile kulya.

³⁶ Niho nimwabo bashumine mitima, nabo kami batatikile kulya.

³⁷ Nimwetu bantu twekalile ba myanda yibili naba makumi mutanu na abili na mutanu na umo.

³⁸ Oho bekutile na byakulya, bahehukishile shishepe na kuyumbila loto mu liwate.

Shishepe shikutabuka

³⁹ Oho kwashile bantu kaliha balimukile liya litunga, ngoboni bamonene likobo lya shibumbo sha lihekelela. Pe bahanginikile ndi shakutwesheka kunyakilako shishepe.

⁴⁰ Niho baketwile byondo, byazubilile mu liwate. Ha shikati shiyo bamangulwile nyimbwa zakwatiwile na bilapo, ba yalile likwiza lyalinene kuyilu, ngayi mpepo yinyakile shishepe ku shibumbo.

⁴¹ Ngoboni shishepe shakakatilile mu lihekulula mu mema, mawato abili aliwanine, niho shemanine. Ntongo ya kumbili yakwatiwile na kushuma, shabulile kwenda. Pe ntongo ya kunyima yapabukile na ngovu za mankanyi.

⁴² Banzita bayo bayongwele bya kuziha batuyili, kutina ngayi bamo bakuyowa na kushila.

⁴³ Ngoboni uya mukakutwaminina banzita, washingile kuyoyesha Paulu, niho aba kanishile. Wabatongwezele ngayi nimwabo bakakutwesha kuyowa batuwame taha mu liwate, bayowele ku shibumbo.

⁴⁴ Baya bashalileho wabatongwezele ngayi bakwate ha mabala hinge bipabu bya shishepe. Batendele noho nimwabo bapulukile na kukuma ku shibumbo.