Milimo 26 - Kulimama Kwakupya

Paulu ukulilamwina niye mwine ku meho a Angilipa

¹ Niho Angilipa ambile kuli Paulu ngayi, “Uli na shikati shakwamba byobe.” Niho Paulu olwele liboko lyendi, wambile mazu akulilamwina ngayi,

² “Mwene Angilipa, nikuhanganika ngayi ninatandala ndaba lelo ninemana ku meho obe ngayi nililamwine ku byambo nimwabyo ebye balinakunyatisha Bayunda.

³ Ndaba obe hiwulimuka shiwahe biheka nimwabyo na byambo bili mukati ka Bayunda, nohobene nikukunyepa ngayi, unyuvwilile na mutima wa lunzewe.

⁴ “Bayunda nimwabo hibalimuka nyinkalo yami kufuma ku wanuke. Kutatika na nyoyelo yami mukati ka bakamushobo wami, kukuma na mu Yelushalema, hibalimuka nimwabyo.

⁵ Banandimuka shikati shashitali, kami ndi bakushinga, bakutwesha kupaka ngayi nengile umo wa Bafwalishi, ba mu kazunga kaya kalama shikuma kukulupila kwetu.

⁶ Haya lelo nilinakuyatishiwa ndaba ya kulumbeza shikulupisho sha Nyambi shiya atendele na batatizetu.

⁷ Eshe nisho shikulupisho shiya mishobo yetu ya likumi na yibili bakulumbeza ngayi bakashitambule. Nohobene bakutenda milimo ya Nyambi hinga bazundamina mwaana na wushiku. Obe Mwene, ndaba ya noku kulumbeza, niho Bayunda balinakunyatisha.

⁸ Kati ndabangani enu muli hano mukuhanganika ngayi shashikalu kukulupila ngayi Nyambi washangulanga bafu?

⁹ “Nanami kami nahanganikile ngayi ninafwanini kutenda byuma nimwabyo nikutwesha bya kulwisha lizina lya Yeshu wa ku Nazaleta.

¹⁰ Natendele noho mu Yelushalema. Natambwile ngovu ku bakankombela ba bakulwane, niho nayakile bakakuyela babengi mu tolongo. Pe oho babayatishilenga ngayi bafwe, nanami netabililenga.

¹¹ Bikati byabingi nabashushwilenga mu mashinangonge, kami nabakandamikilenga ngayi bahandule uyo Yeshu. Nabazimbile shikuma, nohobene nayilenga na mu minzi yashenge na kubayadisha.

Paulu ukushimikila bya kutenguluka kwendi

¹² “Nohobene nayile ku Ndamashika mu ngovu na ndayano za bakankombela ba bakulwane.

¹³ Oho mutena wakumine mukati ka mutwe, Obe Mwene namonene lumuni lwabyazimine mu nzila luya lwafumine muyilu, lwengile lwakubyazima kupitakana mutena. Lwamunikile kuzinguluka haya nekalile na baya nendelenga nabo.

¹⁴ Oho twawililile hanci nimwetu, nayuvwile lizu lyambile kukwami mu lulimi lwa Shihebelu ngayi, ‘Shaulu, Shaulu, ukunyandishila bishini? Uli nakulilemeka obe mwine oho ulinakulwa, ngonehe ngombe ukulaha ha katondo ka hekulyendi.’

¹⁵ Nakumbwile ngayi, ‘Obe yani, Mwene?’ Mwene wakumbwile ngayi, ‘Ami Yeshu ou ulinakuyandisha.

¹⁶ Ngoboni pinduka, yimana. Ndaba nalihololo kukwobe ngayi nikwinge mukamulimo na paki wa nebye byami unamono na wa nebye nikakumonesha.

¹⁷ Nikakulamwina ku bantu Baishalela na ku Bakamatunga kuya nikakutuma.

¹⁸ Ukatonesha meho wabo na kubatengulula, kubafumisha mu mincimpwe na kubaleta ku lumuni, kubafumisha ku ngovu za Shatana na kubaleta kuli Nyambi, nohobene ndi bakukulupila mumwami, bakayatiwila wubi wabo, pe bakatambula mwanya wabo mukati ka bantu ba Nyambi baya banahatiwi.’

Paulu ukushimikila bya milimo yendi

¹⁹ “Mwene Angilipa, nohobene kaliha nakanine kwombatala shimonekesho shafumine muyilu.

²⁰ Ngoboni nashimikilile ku Bakandamashika ha kutatika na mu Yelushalema na mu litunga nimwalyo lya Yundeya na ku Bakamatunga, ngayi batenguluke na kufutukila kuli Nyambi, pe batende milimo yikumonesha ngayi banatenguluku.

²¹ Ndaba yanebye, Bayunda bankwatile oho nekalile mu Litala lya Nyambi bashingile kunziha.

²² Ngoboni Nyambi niye ulinakunyavwa kukuma na mutena walelo, pe ninemana kuno ngayi nipane wupaki ku nimwabo babashe na babanene. Ebye nikwamba nibyo kami byuma bimo bambile bamiluwe na Moshesha ngayi bikatendiwa,

²³ ngayi Kilishitu ukayanda, kami ukenga wa kutatika kushanguka ku bafu, pe ukaleta lumuni ku bantu bendi, na ku Bakamatunga.”

²⁴ Oho Paulu ambilenga awa mazu akulilamwina, Fweshitashi wabilikizile ngayi, “Paulu uli naku pempela, kulilongesha kwobe shikuma kuli naku kupempelesha!”

²⁵ Ngoboni Paulu wakumbwile ngayi, “Obe Hekulu Fweshitashi, nifwako kupempela, ngoboni nikwamba mazu akupwisha kami akuyuvwanika.

²⁶ Mwene Angilipa, nikutwesha kwamba kukwobe hinga nashoboloka, ndaba hiwulimuka ebye byuma. Nakulupili ngayi nimwabyo unabimono, ndaba kaliha binatendiwinga ku zinkomi kuya binafwanini kulimbiwa.

²⁷ Mwene Angilipa, kati wakulupila bamiluwe ndi? Nikulimuka ngayi wakulupila!”

²⁸ Niho Angilipa ambile kuli Paulu ngayi, “Ukuhanganika ngayi mu shikati shashishe ukutwesha kunyinga Mukakilishitu ndi?”

²⁹ Paulu wakumbwile ngayi, “Mu shikati shashishe hinge ndi mu shikati shashitali, obe nanenu nimwenu mukuyuvwilila lelo, nikulombela kuli Nyambi ngayi mwinge ngohene ami, kufumishako tuhu awa mawenge!”

³⁰ Niho, mwene na kalela na Mbenishi na baya bekalile nabo bakatukile,

³¹ bayile ku nkumo, balyambashanine mukati kabo ngayi, “Ou muntu kowa ebi anatende bya kutwesha kumuzihila hinge kumumanga.”

³² Niho Angilipa ambile kuli Fweshitashi ngayi, “Ou muntu ukutwesha kushobololiwa, shinga wabula kunyepa ngayi aye kuli Nkeshali.”