Milimo 24 - Kulimama Kwakupya

Paulu ukuyatishiwa

¹ Munyima ya matena mutanu, Ananiyashi Mukulwane wa Bakankombela Nimwabo, wayile hamo na bakulwane ba Bayunda na mukakwimanina wabo ukutumbiwa Tetulashi. Batongwezele Kalela Fwelekishi bya Paulu.

² Niho behanine Paulu, pe Tetulashi watatikile kumuyatisha ngayi, “Hekulu Fwelekishi, tulinakumwena ndaba ya nobe, kami milimo yayingi yayiwahe yikutendiwa mu litunga lino ndaba ya kutwaminina kwobe kwakukeya.

³ Nimwabyo ebye tukutambula na kukambilila shikuma, mu bibaka nimwabyo.

⁴ Ngoboni, kushinga nifwako kubipisha shikati shobe, haya nikuku lomba ngayi utuyuvwile nceshe, mu kuyuvwa awa mazu mu wipi.

⁵ “Tunawana ngayi ou muntu wamukalu. Unalete mushunga mukati ka Bayunda mu kaye nimwamo, kami wenga ntwamina wa kanzunga ka ba Nazalena.*

⁶ Niye kami wezekele kubipisha Litala lya Nyambi, niho etu twamukwatile. Twashingile kumuyata kuya na ndayano zetu.

⁷ Ngoboni Lishiyashi, mukulwane wa banzita, wamufumishile na ngovu mu maboko etu.

⁸ Niho Lishiyashi atongwezele bakakumuyatisha ngayi beze kukwobe. Wakamwipula obe mwine ukutwesha kulimuka byuma nimwabyo ebye tukumu yatishila.”

⁹ Bayunda nabo betabilile, bambile ngayi byuma ebye nimwabyo byakupwisha.

Paulu ukulilamwina ku meho a Fwelekishi

¹⁰ Kalela walabizile Paulu ngayi ambe, niho Paulu ambile ngayi, “Nikulimuka ngayi, wekalile mukakuyata mu litunga elye myaka yayingi, nohobene nikuwahilila ngayi nikumbule ku meho wobe.

¹¹ Ngonehi unalimonene obe mwine, shilolo kupite mitena ya likumi na yibili, munyima ya kuya kwami ku Yelushalema mukulemesha.

¹² Bayunda kaliha bangwanine nikanangana na muntu mu Litala lya Nyambi, hinga kufwilikanyisha bantu mu mashinangonge, hinga ndi kumina mu lukena.

¹³ Kami Bantu aba kutwesha bafwako kukumonesha byuma ebye bakunyatisha nabyo.

¹⁴ Ngoboni eshe nikwitabila kukwobe ngayi, nikulemesha Nyambi wa bankaka zetu ha kukonka Nzila eye bantu bakwamba ngayi kanzunga ka kushanuka. Nikukulupila nimwabyo ebye byatikitiwa mu Ndayano za Moshesha na mu bamiluwe.

¹⁵ Hakuwana ngayi nakulumbeza kuli Nyambi, oku nibo kami bakwitabila, ngayi bantu nimwabo bakakwoloka na bakawubi, bakashanguka ku bafu.

¹⁶ Ndaba yanebye nikuzundamina bikati nimwabyo kwikala na shikeketima kuli Nyambi na ku bantu.

¹⁷ “Munyima ya myaka yayingi nekalile kwakutali na Yelushalema, nezile kuleta byakuyavwa ku bawushinda wami na kutupula zinkombela.

¹⁸ Oho natendelenga ebye, bangwanine mu Litala lya Nyambi oho namanishi shimbo sha kuliyelesha. Kaliha hekalile likunge lya bantu hinge kufwilikanya.

¹⁹ Ngoboni kwekalile Bayunda bamo ba ku litunga lya Esha. Nibo banafwanini kwiza ku meho wobe ndi bali na shuma nanami.

²⁰ Shashiwahe hinga nibo bali kuno batoye mulandu ou bawanine oho nemanine mu nkuta.

²¹ Ngoboni mulandu natenda, oho nemanine ku meho wabo, nabilikizile ngayi, ‘Mukunyata lelo ndaba nikwitabila ngayi bafu bakashanguka.’ ”

²² Fwelekishi walimukile bya Nzila, wemanikile shambo ngayi, “Nikatilamina eshe shambo shobe akeza Lishiyashi mukulwane wa banzita.”

²³ Niho atongwezele mukakutwaminina kanzunga ka banzita ngayi bamulame, ngoboni bamushobolole, hinga akanisha bandambo bendi kumuyavwa ebye akushinga.

Paulu ku meho a Fwelekishi na Ndulushila

²⁴ Oho kwapitile matena, Fwelekishi wezile na mukokwendi Ndulushila, wengile Kayunda. Wehanine Paulu, wamuyuvwililile ebye ambilenga bya kukulupila muli Yeshu Kilishitu.

²⁵ Ngoboni oho Paulu atoyele byakwoloka na kuzilikila bya Nyambi akayata kaye, Fwelekishi watinine wambile ngayi, “Ukutwesha kuya, nakawana shikati nikakwihana.”

²⁶ Ngoboni niye wahanganikile ngayi Paulu ukamupanika mali, nibyo amutuminine bikati byabingi na kwambola nendi.

²⁷ Munyima ya myaka yibili, Posha Fweshitashi* washwanine Fwelekishi. Ndaba Fwelekishi washingile kuwahililisha Bayunda, washiyile Paulu mu tolongo.