Milimo 22 - Kulimama Kwakupya

¹ “Bawushinda wami na batate, yuvwenu kuliyawila kwami oku nikwamba kukwenu.”

² Oho bayuvwile ngayi ukwamba nabo mu Shihebelu, bamwenene hulutu. Niho Paulu ambile ngayi,

³ “Ami nili Kayunda, nahemuwila mu Talishashi mu litunga lya Shilisha, ngoboni nakulili muno mu Yelushalema. Ngamaliyele wandongeshele kulama shiwahe ndayano za bankaka zetu. Nazaminine shikuma kuli Nyambi, nehe enu nimwenu mukutenda lelo.

⁴ Nayandishile bantu bakonkele Nzila eye, kutwala na ku lufu. Namangile balume na bambuyama hamo na kubatwala ku tolongo.

⁵ Mukulwane wa Bakankombela Nimwabo hamo na bakulwane ba Bayunda bakumpaka. Bampanine man̄wati ku bawushinda wetu Bayunda ku Ndamashika. Pe nayile na kukwata bantu aba, na kwiza nabo ku Yelushalema, hinga bamangiwa, ngayi bayatishiwe.

Paulu ukushimikila bya kutenguluka kwendi

⁶ Oho nayilenga nakumine hahepi na Ndamashika, oho mutena uli hakati ka mutwe, hohobene lumuni lwalunene kufuma kuyilu lwamunikile.

⁷ Nawililile hanci nayuvwile lizu lyambile kukwami ngayi, ‘Shaulu, Shaulu! Uku nyandishila bishini?’

⁸ Ami nayipwile ngayi, ‘Obe yani, Mwene?’ Pe niye wambile ngayi, ‘Ami Yeshu wa ku Nazaleta, ou ukuyandisha.’

⁹ Bantu nekalile nabo bamonene lumuni, ngoboni kaliha bayuvwile lizu lya nou wambile kukwami.

¹⁰ Nayipwile ngayi, ‘Nikwinga nahiti Mwene?’ Niho Mwene ambile kukwami ngayi, ‘Katuka, yanga ku Ndamashika, kuyo bakakutongweza ebye nimwabyo unafwanini kutenda.’

¹¹ Nabulile kutwesha kumona kami ndaba ya kubyazima kwa lumuni, pe baya bantu nendelenga nabo bankwatile ku liboko kuntwaminina ku Ndamashika.

¹² “Mu munzi uyo mwekalile muntu umo wa lizina lya Ananiya. Wengile muntu wa mpupo yayiwahe ku Bayunda nimwabo.

¹³ Wezile, wemanine hahepi nanami, pe wambile kukwami, ngayi, ‘Shaulu kawushinda wami, tambula kumona kwobe kami!’ Ha shikati shiyo natweshele kumumona.

¹⁴ Niho ambile ngayi, ‘Nyambi wa bankaka zetu, unakuhata ngayi ulimuke shifungo shendi na kumona uyo wakwoloka na kuyuvwa lizu lya mu kanwa kendi.

¹⁵ Ndaba ukenga paki yendi ku bantu nimwabo kunebye unamono na kuyuvwa.

¹⁶ Haya unehalili bishini? Katuka na kwihana ha lizina lya Mwene, pe uzubilishiwe na kuyoweshiwa ngayi wubi wobe ufume.’

Kwihaniwa kwa Paulu kuya na kushimikila ku Bakamatunga

¹⁷ “Oho nabokele ku Yelushalema, nayile ku Litala lya Nyambi na kulombela. Kuyo nekalile na shimono,

¹⁸ mu shimono, namonene Mwene wambile kukwami ngayi, ‘Nyankupisha, ufume mu Yelushalema! Bantu kukatambula wupaki wobe ndaba yami bafwako.’

¹⁹ Nakumbwile ngayi, ‘Mwene, bakulimuka ngayi nayile mu mashinangonge nabayakile mu tolongo na kukama nimwabo bakulupilile kukwobe.

²⁰ Oho bazihile Shetefwano paki yobe, ami kami nekalileko. Nalikwatashanine nabo, nalamine bivwalo bya baya bamuzihile.’

²¹ Niho Mwene ambile kukwami kami ngayi, ‘Katuka, ndaba nikakutuma kwakutali ku Bakamatunga.’ ”

²² Bantu bayuvwililile kuli Paulu. Ngoboni oho ambile lizu elye, niho babobokele mazu akumanishilila, babilikizile ngayi, “Muntu wanoho afumishiwe ha kaye! Kufwanina kuyoya wufwako!”

²³ Babilikizile na kuzingwilisha bivwalo byabo, bafukwilile lukungu muyilu.

²⁴ Mukulwane wa banzita walayelele ngayi Paulu bamutwale mu litala lya banzita. Wabatongwezele ngayi bamukame na zimpafwa, ngayi atontolole ndabangani bantu bayo bamukuwililenga.

²⁵ Kwekalile mukakutwaminina kanzunga ka banzita mwanda wemanine kuyo. Oho banzita bamangile Paulu ngayi bamukame, Paulu wepwile ngayi, “Kati ndayano zenu zikwitabilisha kukama zimpafwa Kaloma kwakubula kuyatiwa ndi?”

²⁶ Oho mukakutwaminina wa banzita ayuvwile noho, wayile mukwipula mukulwane wa banzita ngayi, “Kati bishini ukutenda? Muntu ou wenga Kaloma!’

²⁷ Niho Mukulwane wa banzita ayile kuli Paulu nakumwipula ngayi, “Ntongweze kati uli Kaloma ndi?” Paulu wakumbwile ngayi, “Ingoi.”

²⁸ Niho mukulwane wa banzita ambile ngayi, “Nalandile kushoboloka oku na ndando yayinene ha kutumbiwa ngayi nili Kaloma.” Paulu wambile ngayi, “Ngoboni ami nili Kaloma ku shihemwa.”

²⁹ Hohobene, bantu bashingile kumwipula na kumukama bamulehele. Mukulwane wa banzita watinine oho alimukile ngayi niye unamanga Kaloma.

Paulu ukuyatishiwa

³⁰ Mukulwane wa banzita washingile kulimuka shikuma ndabangani Bayunda banamuyatishili. Oho kwashile bamushobwele, niho atongwezele bakulwane ba bakankombela na Bakankuta nimwabo ba Bayunda ngayi bakunguluke. Niho a letele Paulu, wamwimikile hambili yabo.