Milimo 2 - Kulimama Kwakupya

Kwiza kwa Moyo Wakuyela

¹ Oho mutena wa Pentekoshita wakumine, bakakukulupila nimwabo bakungulukile mu mwanya umo.

² Wanguwangu kwayuvwanikile mungunina wafumine kuyilu, ngonehe nkuli yayinene, pe yenzalile mu litala nimwalyo muyo bekalile.

³ Niho bamonene ngonehe milangi ya mundilo, kami yekalile hayilu ya umo na wamina kukwabo.

⁴ Nimwabo benzalile na Moyo Wakuyela, pe batatikile kwamba na zindimi zashenge, ngonehe Moyo wabapanine byakwamba.

⁵ Kwekalile Bayunda bakakulemesha Nyambi mu Yelushalema, baya bafumine ku matunga nimwawo a mu kaye.

⁶ Oho bayuvwile mungunina, bantu babengi bakungulukile. Nimwabo balakamine ndaba muntu nimwendi wayuvwile hibamba mu lulimi lwendi.

⁷ Bakomokele nimwabo, pe bambile ngayi, “Kati aba bantu nimwabo bakwamba nehe kaliha Bakangalileya?

⁸ Kati shilinahiti ngayi nimwetu tukubayuvwa bakwamba mishobo yetu?

⁹ Etu tulinakufuma ku Palitiya na Bakamendiya na Bakaelame na naba bazika mu Meshopotamiya na mu Yundeya na mu Kapandoshiya na mu Pontashi na mu litunga lya Esha*

¹⁰ na mu Fwilingiya na mu Pamfwiliya na mu Engipita na mu matunga a Libya hahepi na Shilene na bayeni banafumu ku Loma,

¹¹ Bayunda na Bakamatunga, baya banatengulukili kukulemesha kwa Shiyunda, na bantu ba ku Kilete na bantu ba ku Alebiya nimwetu tulinakubayuvwa hibamba milimo ya kukomokesha ya Nyambi mu mushobo wetu!”

¹² Nimwabo bakomokele kami bacincokele, pe balipwile umo na wamina ngayi, “Ebye bikutontolola bishini?”

¹³ Ngoboni bamina bakumangizile, bambile ngayi, “Banakolwo!”

Kushimikila kwa Pita

¹⁴ Niho Pita emanine hamo na baminendi bantumwana likumi na umo, wambile na lizu lyakukangoka kukwabo ngayi, “Enu Bayunda, nanenu nimwenu mwekala mu Yelushalema, yuvwililenu kami muyuvwishishe mazu ami.

¹⁵ Aba bantu kaliha banakolwo ngonehe mukuhanganika, ndaba shino shishili shikati sha mutanu na kaana ku lumenemene.

¹⁶ Ngoboni ebye nibyo ambile muluwe Yowele ngayi,

¹⁷ ‘Nyambi wambile ngayi, ha matena a kukotoka nikayitila Moyo wami ha bantu nimwabo. Bana benu ba balume na ba bambuyama bakalubulula ebye akabaholwela Nyambi, bandumbana benu bakamona bimono, ba nkembele benu baka lota milo.

¹⁸ Ha matena ayo, nikayitila Moyo wami ku bakamilimo bami ba balume nanaba ba bambuyama, nanibo bakalubulula.

¹⁹ Nikamonesha bimonekesho muyilu, na kumonesha bikomokesho hanci, kukekala mukeza, mundilo na kukakama kwa wishe,

²⁰ mutena ukashipa, na ngonda ukafutuka wakufubila ngonehe mukeza, oho mutena wawunene na wuwahe wa Mwene shilolo ukume.

²¹ Kami muntu nimwendi ukehana ha lizina lya Mwene ukapuluka.’

²² “Bantu ba Ishalela, yuvwililenu mazu awa! Yeshu wa ku Nazaleta, wengile muntu ou Nyambi apakile kukwenu na milimo ya ngovu na bimonekesho na bikomokesho ebye Nyambi atendele mumwendi mukati kenu, ngonehe mukulimuka.

²³ Byengile bihanganiko bya Nyambi kami walimukile ngayi Yeshu ukapanikiwa kukwenu, pe mwamuzihile ha kwitabilisha bantu bakawubi ngayi bamukoleke.

²⁴ Ngoboni Nyambi wamushangwile ku bafu, wamushobwele ku makando a lufu, ndaba lufu kaliha lwatweshele kumumanga.

²⁵ Ndaba Ndavita watoyele byendi ngayi, ‘Namonene Mwene hambili yami shikati nimwasho, ndaba uli ku liboko lyami lya shilyo ngayi nibule kunyenkanishiwa.

²⁶ Nohobene mutima wami ukutangala, kami lulimi lwami lukuwahilila, nohobene lutu lwami lukakatala shiwahe mukulumbeza.

²⁷ Ndaba kukalehela moyo wami mu kalunga ka bafu wufwako, hinga kukalehela wakuyela wobe ngayi abole wufwako.

²⁸ Unamoneshe nzila ya wumi, kami ukenzalisha mutima wami na kutangala ku meho wobe.’

²⁹ “Bawushinda wami, nafwanini kwamba kukwenu bya nkaka yetu Ndavita. Ou wafwile, bamufundile kami shinzimbi shendi shili kuno kukuma na ku mutena wa lelo.

³⁰ Niye wengile muluwe, kami walimukile ngayi Nyambi wamuhahile na luhaho ngayi ukayaka umo wa bazukulyendi Ndavita ha litanda lyendi.

³¹ Ndavita wamonene bya kumbili, kami wambile bya kushanguka kwa Kilishitu oho ambile ngayi, ‘Moyo wendi kukawulehela mu kalunga ka bafu wufwako, hinge kukaleha lutu lwendi ngayi lubole wufwako.’

³² Nyambi washangwile ou Yeshu ku bafu, kami etu nimwetu tuli bapaki ba byuma ebye.

³³ Nohobene, Nyambi unamuyaka ku liboko lyendi lya shilyo, unatambulu kuli Tatiyendi shikulupisho sha Moyo Wakuyela, anawuyitili ngonehe mukuyuvwa na kumona.

³⁴ Ndaba Ndavita kaliha wakandamine kuyilu, ngoboni niye wambile ngayi, ‘Mwene wambile kuli Mwene yami ngayi, Ikala ku liboko lyami lya shilyo,

³⁵ hantu ninayaka bakankole bobe ku malyatilo a mawulu wobe.’

³⁶ “Nohobene bakalitala nimwalyo lya Ishalela lilimuke ngayi, Yeshu uyo mwakolekele ha shishempakano, Nyambi unamwingi Mwene na Kilishitu.”

³⁷ Oho bantu bayuvwile ebye, batampukile mu mitima yabo, pe bambile kuli Pita na ku bantumwana bamina ngayi, “Bawushinda, haya tukwinga nahiti?”

³⁸ Niho Pita ambile kukwabo ngayi, “Tengulukenu, pe muzubilishiwe muntu na muntu mu lizina lya Yeshu Kilishitu ngayi wubi wenu bawuyatile, pe mukatambula shishemo sha Moyo Wakuyela.

³⁹ Ndaba shikulupisho eshe shili kukwenu na ku bana benu na ku nimwabo baya bali kwakutali, aba Mwene Nyambi yetu akehana.”

⁴⁰ Na mazu amengi Pita wapakile na kubambila ngayi, “Lipulwishenu ku kashushwilo kakeza ku mukoka ou wa wubi.”

⁴¹ Bantu babengi bakulupilile mazu aya ambile Pita, pe bazubilishiwile, ha mutena uyo, bantu bakushinga kulingana makulukazi ahatu balifungilile ku bandongesha.

⁴² Bazaminine ku bilongesha bya bantumwana, bengile bakakulilumikila. Bazaminine kulya hamo mulalilo wa Mwene na kulombela.

Eshe bayoyele bakakukulupila

⁴³ Muntu nimwendi wayuvwilile Nyambi bowa, ndaba bantumwana batendelenga bimonekesho na bikomokesho byabingi.

⁴⁴ Nimwabo bakakukulupila bekalile hamo, pe balitapililenga byuma byabo nimwabyo.

⁴⁵ Balandashilenga byuma byabo na wuheti wabo, pe batapishililenga mali ku bantu nimwabo, ngonehe muntu na muntu ashingilenga bya kuliyavwa nabyo.

⁴⁶ Ha mutena ha mutena bakungulukilenga hamo na mutima umo mu Litala lya Nyambi, kami balilenga hamo mu matala wabo. Balilenga byakulya byabo na kuwahilila na mitima ya kulilimbwilisha.

⁴⁷ Bayemezelenga Nyambi, pe bantu nimwabo babayamizizilenga. Kami ha mutena ha mutena Mwene walundikililenga ku litengo bantu baya bapulukilenga.