Milimo 19 - Kulimama Kwakupya

Paulu mu Efweshe

¹ Oho Apoloshi ekalile mu Kolinte, Paulu wendelele matunga a hayilu wakumine ku Efweshe. Kuyo wakawanineko bandongesha bamina,

² pe wabepwile ngayi, “Kati munatambulu Moyo Wakuyela oho mwengile bakakukulupila ndi?” Bakumbwile ngayi, “Kaliha twayuvwile ngayi kuli Moyo Wakuyela.”

³ Paulu wabepwile ngayi, “Kati munazubilishiwi na kuzubilisha kwanahiti?” Bakumbwile ngayi, “Na kuzubilisha kwa Yowano.”

⁴ Paulu wambile ngayi, “Yowano wazubilishile bantu batengulukile, ngoboni wabatongwezelenga bantu ba Ishalela ngayi bakulupile kuli ou wezilenga munyima yendi, niye Yeshu.

⁵ Oho bayuvwile ebye, bazubilishiwile mu lizina lya Mwene Yeshu.

⁶ Paulu oho abakambikile maboko, Moyo Wakuyela wezile hahabo, bambile mu zindimi zashenge, pe balubulwile.

⁷ Bantu aba nimwabo bengile likumi na babili.

⁸ Paulu wenginine mu shinangonge, pe mu zingonda zihatu hashimikila na kukanca. Wambilenga na bantu bya Wene wa Nyambi na kubakowamina.

⁹ Ngoboni bamo bakaluhishile mitima yabo, bakanine kukulupila, banyancile Nzila* ya Mwene ha mbili ya likunge. Paulu wafumine kukwabo, wayile na bakakukulupila, kami ha mutena ha mutena walongeshelenga mu shikolo sha muntu watumbiwile Tayilanashi.

¹⁰ Watendele ebye mu myaka yibili, ngayi bantu nimwabo bazikile mu litunga lya Esha, Bayunda na Bakamatunga, bayuvwe lizu lya Mwene.

Bana ba Shikeva ba balume

¹¹ Nyambi watendele bikomokesho na maboko a Paulu.

¹² Baletelenga ku bakakukola tutambala na makwiza aya Paulu aliyavwishilenga, bakambikilenga ha bakakukola, pe banyomaninenga na mayimbwe afumine mumwabo.

¹³ Bayunda bamo banyambangizi bakakwaula, bezekele kufumisha mayimbwe, bambile ngayi, “Mu lizina lya Yeshu ou Paulu ashimikilenga, nikukulayelela ngayi ufume.”

¹⁴ Batendelenga ebye bengile bana ba balume ba mutanu na babili ba Shikeva, Mukulwane wa Bakankombela Nimwabo.

¹⁵ Ngoboni Mayimbwe akumbwile ngayi, “Yeshu nimulimuka na Paulu nimulimuka, ngoboni enu mulibayani?”

¹⁶ Niho muntu uyo mukamayimbwe wabakilukilile wabakwatile nimwabo, wabalwishile, pe batininine mu litala liyo muhelengwa kami wabalemekele.

¹⁷ Bantu nimwabo bekalile ku Efweshe, Bayunda na ba Bakamatunga, oho bayuvwile ebye, batinine. Niho bayemezele lizina lya Mwene Yeshu.

¹⁸ Bakakukulupila babengi bakungulukile na kulitabila, pe baholwele ntendelo yabo.

¹⁹ Bantu bamo ku baya batendelenga malele baletele mabuka abo, pe bawahokeshele hambili ya bantu nimwabo. Balabile ndando yawo, bawanine ngayi mali a muwayawaya wa shiliva akushinga kulingana makulukazi makumi mutanu.

²⁰ Nohobene lizu lya Nyambi lyahanyine, pe lyashumine shikuma.

Mushunga mu Efweshe

²¹ Munyima ya byuma ebye byatendiwile, Paulu wayongwele bya kuya ku Yelushalema, kupita ku Mashendoniya na Akaya. Wambile ngayi, “Nakafuma kuyo, nikufwanina kukuma na ku Loma.”

²² Niho atumine Timoteo na Elashitashi bakakumuyavwa babili ku Mashendoniya. Ngoboni niye washalile mitena yamina mu litunga lya Esha.

²³ Ha shikati shiyo, kwezile mushunga wawunene mu Efweshe ndaba ya Nzila ya Mwene.

²⁴ Mfuzi wamina wa shiliva lizina lyendi Ndemetiliyashi, niye wafulile tula twatushe twa shiliva twakulemeshalamo Alitemi nyambi wa mukazi, waheteshele shikuma bakamilimo bendi.

²⁵ Ndemetiliyashi wakungulwile bantu bendi, hamo na bamina ba mulimo ou, wambile ngayi, “Bawushinda, mukulimuka ngayi uheti wetu ukufuma ku mulimo ou.

²⁶ Munamono na kuyuvwa ebye akutenda ou muntu Paulu. Niye ukwamba ngayi banyambi bakutendiwa ku bantu kaliha banyambi. Unashanwishi bantu babengi, kami kaliha ku Efweshe tuhu ngoboni na litunga nimwalyo lya Esha.

²⁷ Nohobene, kuli wukalu, kaliha tuhu ngayi mulimo wetu ukubipa lizina, ngoboni kami litala lya kulemeshalamo Alitemi nyambi wamunene wa mukazi ukalimbululiwa, na wuwahe wendi ukanonga, ou bantu nimwabo ba mu litunga lya Esha na bakakaye nimwabo bakulemesha.”

²⁸ Bantu aba oho bayuvwile mazu awa bapilamine shikuma, babilikizile ngayi, “Wamunene Alitemi wa mu Efweshe!”

²⁹ Pe munzi nimwawo mwekalile mushunga. Bantu bayo bakwatile Ngayushi na Alishitakashi, bantu ba ku Mashedoniya, bakakushindikiza Paulu, betukile nabo ku litala lya kukungulukila.

³⁰ Paulu washingile kwingina hakati ka baya bantu, ngoboni bakakukulupila bamukanishile.

³¹ Babilolo bamo ba ku litunga lya Esha, obo bengile bahoni bendi, batumine kukwendi na kunyepa ngayi hinga engina mu litala lya kukungulukila.

³² Bantu mu shikungulukilo babilikizile, bamo shuma shimo, na bamina shuma shashenge. Muntu nimwendi wabulile kulimuka shakutenda, wingi kukwabo kaliha balimukile ngayi ndabangani banakungulukili.

³³ Bamo mu likunge bafumishile Alekizanda ngayi uli na mazu akwamba, Bayunda bamunyakilile kumbili. Niho abalabizile na liboko ngayi bamwene, washingile kuliyawila ku bantu.

³⁴ Ngoboni oho baya bantu balimukile ngayi niye Kayunda, babilikizile nimwabo bikati bibili ngayi, “Wamunene Alitemi wa mu Efweshe!”

³⁵ Mukakutikita wa mu munzi wamweneshele bantu, wambile ngayi, “Enu bawushinda wami Bakaefweshe, yani ku bantu wakubula kulimuka ngayi munzi wa Efweshe niwo ukulama litala lya kulemeshelelamo Alitemi wamunene, kami ukulama limanya liya lyawile kuyilu?

³⁶ Ndaba ngayi kowa muntu ukutwesha kukana byuma ebye, pe mukufwanina kumwena nakubula kuyitukila byuma.

³⁷ Enu munalete aba bantu kuno hinga banayibi bya mu litala lya nyambi yetu wa mukazi, hinga kuhandula.

³⁸ Nohobene ndi Ndemetiliyashi na bakawulongo aba bali nendi bali na shambo ku muntu wamina, kuyili mitena ya kuyata, kami bakakuyata kubali, baliyatishe umo na wamina.

³⁹ Ngoboni ndi ukushinga kwipula na shambo shashenge, shikayatiwa mu shikungulukilo sha nkuta nimwayo.

⁴⁰ Ndaba yanebye byatendiwi lelo tuli mu malamo akwihaniwa ngayi munalete mushunga. Ndaba kowa shuma tukatwesha kwamba ha nou mushunga.”

⁴¹ Oho amanishile kwamba noho, wapanzanishile shikungulukilo.