Milimo 13 - Kulimama Kwakupya

Mbanambashi na Shaulu bakuhatiwa na kutumiwa

¹ Mu litengo lya mu Antiyoke mwekalilenga bamiluwe na balongeshi. Mbanambashi na Shimiyoni (watumbiwile wa Kushipa) na Lushiya (wa ku Shilene) na Manayene (wa mu nkuta wakulile hamo na Kalela Helonda Antipashi) na Shaulu.

² Oho balemeshelenga Mwene na kuzila kulya, Moyo Wakuyela wambile ngayi, “Mfungwilenu Mbanambashi na Shaulu ku mulimo ou nabehanini.”

³ Munyima ya kuzila kulya na kulombela, babakambikile maboko, pe babatumine.

Mu Shayipulashi

⁴ Oho Mbanambashi na Shaulu Moyo Wakuyela wa batumine, bayile ku Shelusha. Oho bafumine kuyo bayile na wato ku shikuli sha Shayipulashi.

⁵ Oho bakumine mu Shalamishi, bashimikilile lizu lya Nyambi mu bikungulukilo bya Bayunda. Bayile na Yowano Mako mukubayavwa.

⁶ Oho bapitile hakati ka shikuli, pe bakumine ku Pafwoshi, bawanineko mukamalele umo, lizina lyendi Mbala-Yeshu, muluwe wa mahalo wa Kayunda.

⁷ Wengile muhoni wa Shelingashi Paulushi muntu wakukeya uya wengile kalela wa shikuli. Pe Shelingashi Paulushi wehanine Mbanambashi na Shaulu, ndaba washingile kuyuvwa lizu lya Nyambi.

⁸ Ngoboni Elimashi, ou mukamalele (nilyo lizina lyendi mu Shingiliki), wabakananganishile na kwezeka kushanwisha kalela ku kukulupila.

⁹ Niho Shaulu, ou watumbiwile ngayi Paulu, hinga enzala na Moyo Wakuyela, wamunconcomekele.

¹⁰ Pe wambile ngayi, “Obe mwana Shatana! Mukankole wa byakwoloka, unenzala na mahalo nimwawo na kushoshoka kwa kwongeza kati kukaleha kubipisha zinzila za Mwene zakwoloka wufwako ndi?

¹¹ Haya, mona! Liboko lya Mwene lili hahobe, ukenga kashishitwa nakubula kumona lumuni lwa mutena mu shikati shashishe.” Hohobene mbundu yamumfwikile ha meho, pe wendenganinenga na kushinga wakumukwata ku liboko.

¹² Oho kalela amonene ebye byatendiwile, wakomokele, pe wakulupilile kulongesha kwa Mwene.

Mu Antiyoke wa mu Pishindiya

¹³ Paulu na baminendi bavuwile wato kufuma ku Pafwoshi, pe bayile mukufuwika ku Pelinga munzi wa mu Pamfwiliya. Niko Yowano Mako abashiyile, wabokele ku Yelushalema.

¹⁴ Kufuma ku Pelinga, bakumine ku Antiyoke wa mu Pishindiya. Ha Mutena Wakukatala, benginine mu shinangonge, pe bekalile hanci.

¹⁵ Oho bamanishile kulaba byatikitiwa mu Ndayano za Moshesha na ba miluwe, bakakwendesha mu shinangonge babatuminine muluwe ngayi, “Bawushinda, ndi muli na mazu akushumisha bantu, ambenu.”

¹⁶ Niho Paulu emanine, wabalabizile na liboko, wambile ngayi, “Enu Baishalela, nenu Bakamatunga bakakutina Nyambi, nyuvwililenu!

¹⁷ Nyambi wa Baishalela, wahatile bankaka zetu, wabatumpwile oho bengile bayeni mu litunga lya Engipita. Wabafumishilemo na ngovu zendi,

¹⁸ wabalamine mulibelelengwa mu myaka makumi anaa.

¹⁹ Oho amanishile kunongesha mikoka mutanu na yibili mu litunga lya Kanana, wabapanikile litunga liyo kwinga likona. Ebye byatendiwile mu myaka myanda inaa na makumi a mutanu.

²⁰ Kufuma haya wabapanine bakakuyata kukuma na ku shikati sha muluwe Shamwele.

²¹ Niho bantu banyepele mwene, pe Nyambi wabapanine Shaulu, mwana Kishi mulume wa mushobo wa Mbenjamani, niye wabalelele mu myaka makumi anaa.

²² Oho amufumishile, wayakile Ndavita ngayi enge mwene wabo. Nyambi wambile ngayi, ‘Nawana Ndavita mwana Njeshi, mulume wa shamutima wami, ukatenda shifungo shami nimwasho.’

²³ Ku bazukulya Ndavita Nyambi waletele Yeshu kwinga mupulwishi wa Ishalela, ngonehe akulupishile.

²⁴ Oho Yeshu shilolo akume, Yowano washimikililenga ku bantu nimwabo ba Ishalela ngayi batenguluke ku wubi wabo, pe bazubilishiwe.

²⁵ Yowano oho amanishilenga mulimo wendi wambile ngayi, ‘Enu mukuhanganika ngayi ami nengi yani? Kaliha ami mukutatilila. Ngoboni ou ulinakwiza munyima yami, kufwanina kushobolola makatulo ku mawulu wendi nifwako.’

²⁶ “Enu bawushinda wami Baishalela, bazukulya Abulahama, nanenu Bakamatunga nimwenu mukutina Nyambi, ncango zakupulwisha okwe zinatumiwi kukwetu.

²⁷ Bantu ba mu Yelushalema na batulela babo, kaliha bamulimukile Yeshu, hinge kuyuvwishisha mazu a miluwe aya alabiwanga ha Matena nimwawo Akukatala. Ngoboni ha kumuyata Yeshu ngayi afwe, batendele ebye batikitile bamiluwe.

²⁸ Hinge babulile kuwana mulandu kukwendi wakufwanina kufwa, ngoboni banyepele Pilato ngayi Yeshu azihiwe.

²⁹ Oho bamanishile kutenda nimwabyo byatikitiwile hahendi, bamufumishile ha shishempakano, bamulangikile mu shinzimbi.

³⁰ Ngoboni Nyambi wamushangwile ku bafu.

³¹ Yeshu waliholwele ha matena amengi ku baya bantu bezile nendi ku Yelushalema kufuma ku Ngalileya. Aba bengakale bapaki bendi ku bantu ba Ishalela.

³² Tukumishimikila ncango zaziwahe eze Nyambi akulupishile ku batatizetu,

³³ pe ebye Nyambi akulupishile unatutendele etu bazukulyendi, ha kushangula Yeshu ku bafu, ngonehe kwatikitiwile mu Lwimbo lwa wubili ngayi, ‘Uli Mwanami, mutena walelo nengakale Tatiyobe.’

³⁴ Pe ebye nibyo Nyambi ambile ha kumushangula ku bafu, ngayi hinga akabola, Nyambi wambile ngayi, ‘Nikamipana mfuywezi zakuyela na kupwisha eze nakulupishile Ndavita.’

³⁵ Nohobene wambile kami mu lwimbo lwamina ngayi, ‘Kukaleha mukakuyela wobe ngayi akabolele mu shinzimbi wufwako.’

³⁶ Ndavita oho amanishile kutenda mulimo wa Nyambi shikati shendi, wafwile, bamufundile hamo na batatizendi, pe wabolele.

³⁷ Ngoboni ou Nyambi ashangwile kaliha wabolele.

³⁸ Nohobene, bawushinda wami, limukenu ngayi muli Yeshu kuyatiwila kwa wubi kunashimikiwi kukwenu.

³⁹ Pe muli Yeshu nimwabo bakukulupila bakashoboloka ku byuma nimwabyo ebye babulile kutwesha kushoboloka kukwabyo na Ndayano za Moshesha.

⁴⁰ Nohobene keyenu, kutina biya bambile bamiluwe biza kukwena oho bambile ngayi,

⁴¹ ‘Monenu, enu bakamashewanizi! Komokenu, pe munonge! Ndaba nikatenda milimo mutena walelo, iya mukabula kukulupila, hinge ndi muntu wamina ukamitontwelela.’ ”

⁴² Oho batutikilenga mu shinangonge, bantu banyepele Paulu na Mbanambashi ngayi awa mazu bakawabokele kuwashimikila kukwabo ha Mutena Wakukatala wakwiza.

⁴³ Oho bantu bapanzanine, Bayunda babengi na Bakamatunga baya bakulupilile biheka bya Shiyunda bakonkele Paulu na Mbanambashi aba bambile nabo na kubashumankanisha ngayi bazamine mu nceshe za Nyambi.

⁴⁴ Ha Mutena Wakukatala wakulundamina, bantu babengi ba mu munzi bakungulukile mukuyuvwa lizu lya Nyambi.

⁴⁵ Ngoboni Bayunda oho bamonene likunge lya bantu, bekalile na mwili. Bakanine nimwabyo ebye Paulu ambilenga, pe bamuhandwile.

⁴⁶ Niho Paulu na Mbanambashi bambile na kukanca ngayi, “Tunafwanini ngayi tutatike kushimikila lizu lya Nyambi kukwenu. Ngoboni, ndaba mulinakukana na kuliyata enu bamwine ngayi kufwanina wumi wa mwayile myaka mufwako, monenu, etu tukumishiya na kuya ku Bakamatunga.

⁴⁷ Ndaba Mwene watulayile ngayi, ‘Nakuyaka obe mukwinga lumuni ku Bakamatunga, ngayi mwanga ukatwale kupulwisha kwakumina kaye.’ ”

⁴⁸ Oho Bakamatunga bayuvwile noho, bawahililile, bayemezele lizu lya Mwene. Pe nimwabo baya Nyambi ahatilile ku wumi wa mwayile myaka bengile bakakukulupila.

⁴⁹ Lizu lya Mwene lyakwayanine mu litunga nimwalyo.

⁵⁰ Ngoboni Bayunda bahongele bambuyama bamaleema bakakutina Nyambi na balume bakakutwaminina ba mu munzi kulwisha Paulu na Mbanambashi, pe babatandile mu litunga liyo.

⁵¹ Ngoboni bantumwana batotomwenene lukungu ku mawulu wabo kumonesha ngayi nibo mulandu bafwawo, pe bayile ku Ikoniyamu.

⁵² Pe bakakukulupila ba ku Antiyoke benzalile na Moyo Wakuyela, kami bawahililile shikuma.