Milimo 11 - Kulimama Kwakupya

Lushango lwa Pita ku litengo lya mu Yelushalema

¹ Bantumwana na bakakukulupila baya bekalile ku Yundeya bayuvwile ngayi Bakamatunga nabo banatambulu lizu lya Nyambi.

² Oho Pita abokele ku Yelushalema, bakakwitabila bamo baya bashingilenga ngayi Bakamatunga baye ku mukanda, bamunyancile.

³ Pe bambile ngayi, “Wenginine mu litala lya bantu bakubula kuya ku mukanda na kulya nabo!”

⁴ Niho Pita atatikile kubatontolwela nimwabyo eshe byekalile ngayi,

⁵ “Nekalile mu munzi wa Yopa na kulombela, pe namonene shimono. Namonene shuma shakufweka ngo likwiza lyalinene kuyilu lyanyenzumukile kukwami, lyamangiwile ku zinkomi zasho zinaa.

⁶ Oho nalipenzesheshele, namonenemo tuyamana na twanzama na byakulikoka na tuyoni.

⁷ Pe nayuvwile lizu lyambile kukwami ngayi, ‘Pita, katuka uzihe, ulye!’

⁸ Ngoboni nambile ngayi, ‘Byo Mwene! Ndaba shuma sha mazilo hinge shakubula kuyela hinga shatanga kwingina mu kanwa kami.’

⁹ Ngoboni kuyilu kwafumine lizu lyankumbwile ka wubili ngayi, ‘Eshe anayeleshe Nyambi, hinga ushitoya ngayi shakubula kuyela.’

¹⁰ Eshe shatendiwile kahatu, niho nimwabyo byakokiwile kami kutwaliwa kuyilu.

¹¹ Ha shikati shiyo kwakumine balume bahatu ku litala oku nekalilenga. Babatumine kukwami kufuma ku Sheshaliya.

¹² Moyo wantongwezele ngayi niye nabo nakubula kuhalulula. Kami bawushinda aba bakakukulupila mutanu na umo baya bafumine ku Yopa bancindikizile, twenginine mu litala lya Koniliyashi.

¹³ Watutongwezele eshe amonene lingeloyi lyemanine mu litala lyendi lyambile kukwendi ngayi, ‘Tuma bantu ku Yopa ngayi bakehane Shimoni ukutumbiwa Pita.

¹⁴ Ukakushimikila mazu awa ukapuluka nawo na bakalitala lyobe nimwabo.’

¹⁵ Oho natatikile kwamba, Moyo Wakuyela wezile hahabo, nehe wezile hahetu ha kutatika.

¹⁶ Niho nanukile mazu a Mwene ambile ngayi, ‘Yowano wazubilishile na mema, ngoboni enu mukazubulishiwa na Moyo Wakuyela.’

¹⁷ Pe ndi Nyambi wabapanikile shishemo shimo ngonehe atupanine oho twakulupilile muli Mwene Yeshu Kilishitu, haya ami nengi yani ngayi nitweshe kukanisha Nyambi?”

¹⁸ Oho bayuvwile ebye byambo bamwenene, pe bayemezele Nyambi nakwamba ngayi, “Mwashikuma Nyambi unapaniki Bakamatunga kutengulukila ku wumi!”

Litengo lya ku Antiyoke

¹⁹ Kunyima ya kuzihiwa kwa Shetefwano, bakakukulupila bapanzanine ndaba ya kuyandishiwa. Bamo bayile na kukuma ku Fonisha na ku Shayipulashi na ku Antiyoke, oku bakalongeshelenga lizu lya Nyambi ku Bayunda tuhu.

²⁰ Ngoboni kwekalile bakakukulupila bamo ba ku Shayipulashi na ba ku Shilene, oho bezile ku Antiyoke bambile kami ku Bangiliki na kushimikila byambo bya Mwene Yeshu ku Bakamatunga.

²¹ Ngovu za Mwene zekalile hahabo, pe bantu babengi bakulupilile na kutengulukila kuli Mwene.

²² Ncango eze zakumine ku matu a litengo lya mu Yelushalema, pe batumine Mbanambashi ku Antiyoke.

²³ Oho akumine na kumona Nyambi eshe abatandalishilenga, wawahililile, wabakowaminine nimwabo ngayi benge bakukulupila, pe bekale na mutima wakukakatila kuli Mwene.

²⁴ Mbanambashi wengile muntu wamuwahe, wenzalile na Moyo Wakuyela na kukulupila, pe bantu babengi balitabilile kuli Mwene.

²⁵ Niho Mbanambashi ayile ku Talishashi mukushinga Shaulu.

²⁶ Oho amuwanine wamuletele ku Antiyoke. Pe mwaka wanzimba nimwawo, bakungulukilenga hamo na litengo na kulongesha bantu babengi. Mu Antiyoke nimo bakakukulupila batatikile kutumbiwa ngayi Bakayeshu.

²⁷ Matena ayo miluwe bamo bafumine ku Yelushalema, na kuya ku Antiyoke.

²⁸ Pe umo hakati kabo ou watumbiwile Angabushi wemanine, walubulwile na ngovu za Moyo Wakuyela ngayi nzala yayinene yikekala mu kaye nimwamo. (Nzala eye yekalileko ha matena a Mwene Kilaundiyashi.)

²⁹ Pe bandongesha bahanganikile byakutuma byakuyavwa ngo kutwesha kwendi muntu, ku bawushinda bakakukulupila bekalile ku Yundeya.

³⁰ Batendele noho, pe batumine Mbanambashi na Shaulu kutwala byakuyavwa ku bakulwane ba litengo.