Milimo 1 - Kulimama Kwakupya

¹ Obe Tiyofwilashi, mu libuka lyami lya kutatika natikitile byuma nimwabyo biya Yeshu atendele na biya alongeshele kufuma ku shikati atatikile milimo,

² kukuma na ku mutena uyo atwaliwile muyilu. Oho shilolo atwaliwe muyilu, walayile mu Moyo Wakuyela bantumwana bendi baya ahatile.

³ Munyima ya lufu lwendi Yeshu walimonekeshele kukwabo mu bikati byabingi mu zinzila zakumonekesha ngayi ulinakuyoya. Ha matena makumi anaa wamonekele mukati kabo hamba bya Wene wa Nyambi.

⁴ Oho Yeshu ekalile nabo wabatongwezele ngayi, “Hinga mufuma mu Yelushalema, ngoboni mutatilile shishemo akulupishile Tate, ngonehe namitongwezele.

⁵ Yowano wazubilishile na mema, ngoboni oho matena amengi shilolo amane, enu mukazubilishiwa na Moyo Wakuyela.”

Yeshu ukutwaliwa muyilu

⁶ Oho bantumwana bakungulukile hamo na Yeshu, bamwipwile ngayi, “Mwene, kati shikati shino ukabwesha Wene ku Ishalela ndi?”

⁷ Yeshu wambile kukwabo ngayi, “Kaliha shenga shenu kulimuka bikati hinge myaka oyo Tate anayaka mu ngovu zendi.

⁸ Ngoboni mukatambula ngovu, oho Moyo Wakuyela ukeza hahenu, kami mukenga bapaki bami mu Yelushalema na mu Yundeya nimwamo na mu Shamaliya na kwakumina litunga.”

⁹ Oho Yeshu amanishile kwamba ebye, watwaliwile kuyilu hinga bamutilamina. Pe likumbi lyamuholekele.

¹⁰ Oho bantumwana bashili kunconcomeka kuyilu oho ayilenga, hohobene bantu babili bavwalile bivwalo bya kutuba bemanine ku nkumo yabo,

¹¹ pe bambile ngayi, “Enu bantu ba ku Ngalileya, shumangani munemanini na kutilamina kuyilu? Yeshu ou nafumu kukwenu kutwaliwa kuyilu ukaboka kami nehe munamumono haya kuyilu.”

Ncwana Yundashi

¹² Niho bantumwana babokele ku Yelushalema kufuma ku Lipili lya Oliveta, olyo lyekalile ha mukala wakulingana kilomita yimo kufuma ku Yelushalema.

¹³ Oho benginine mu lukena, bakandamine ku litala ku kampenci ka kuyilu, omwo mwekalile Pita na Yowano, Yakoba na Anduleu, Fwilipu na Tomashi, Mbatolomewu na Mateo, Yakoba mwana Alufweya, Shimoni ka Zeloti na Yundashi mwana Yakoba.

¹⁴ Aba nimwabo bazaminine kulombela na mutima umo, hamo na bambuyama na Maliya manda Yeshu, na bakonzo bendi.

¹⁵ Ha matena ayo Pita wemanine hakati ka bakakukulupila bayo bashingile kulingana 120, pe wambile ngayi,

¹⁶ “Bawushinda wami, byatikitiwile binafwanini kutendiwa, obyo Moyo Wakuyela wambile kupitila muli Ndavita hali Yundashi ou wengile mukakutwaminina obo bakwatile Yeshu.

¹⁷ Yundashi wengile umo wa mu kanzunga ketu, ndaba wahatiwile kutenda mulimo hamo nanetu.”

¹⁸ (Yundashi walandile mfuba na ncungu ya wubi wendi, kuyo wawile hanci, watabukile hakati na mila tipuu.

¹⁹ Bantu nimwabo bekalilenga mu Yelushalema bayuvwile byuma ebye, pe mfuba yiyo yatumbiwile mu mushobo wabo ngayi, Akendama, kutontolola ngayi, “Mfuba ya Mukeza.”)

²⁰ “Ndaba kwatikitiwile mu libuka lya Nyimbo ngayi, ‘Munkanda wendi ufutuke lipembe, hinga mukekala muntu.’ Kami kwatikitiwile ngayi, ‘Muntu wamina ashwane mwanya wendi.’

²¹ “Nohobene kunafwanini kuhata bantu aba twekalilenga nabo ha shikati shiyo nimwasho oho Mwene Yeshu endelenga netu,

²² kutatika ku kuzubilisha kwa Yowano, kukuma na ku mutena afumine Yeshu kukwetu na kutwaliwa kuyilu. Umo wa naba bantu nafwanini kwinga paki wa kushanguka kwendi hamo nanetu.”

²³ Niho bemikile bantu babili. Yoshefwa watumbiwile Mbashambashi (lizina limina Yashitashi), na Matiyashi.

²⁴ Niho balombelele ngayi, “Mwene, obe ukulimuka mitima ya bantu nimwabo, utumoneshe ou unahata ku naba babili,

²⁵ ngayi ashwane mwanya wa mulimo ou wa wuntumwana anashiyi Yundashi na kuya nzila yendi.”

²⁶ Niho batendele nyela, pe yawililile hali Matiyashi, pe bamuyakile ku bantumwana ba likumi na umo.