Mateo 9 - Kulimama Kwakupya

Yeshu ukunyongomanisha mulume wa kalepa

¹ Yeshu wenginine mu wato, wombokele kami, pe wabokele ku munzi wendi.

² Niho balume baletele mulume wa kalepa kukwendi, hinga alangana ha wulili, oho Yeshu amonene kukulupila kwabo wambile ku mukakalepa ngayi, “Mwanami, tula mutima, wubi wobe unayatiwili.”

³ Ndaba yaneshe, bakakulongesha ndayano bangungutile mu mitima yabo ngayi, “Ou muntu uli na kuhandula Nyambi.”

⁴ Yeshu walimukile bihanganiko byabo, pe wambile ngayi, “Ndabangani mukuhanganika byabibi nehe mu mitima yenu?

⁵ Shawangu shiti? Kwamba ngayi, ‘Wubi wobe unayatiwili kukwobe,’ hinge kwamba ngayi ‘Pinduka wende?’

⁶ Haya nikumimonesha mwanga mulimuke ngayi, Mwana Muntu* uli na ngovu hano hanci zakuyatila wubi.” Niho ambile ku mukakalepa ngayi, “Katuka ushimbe wulili wobe, pe uye ku litala lyobe.”

⁷ Pe uya mulume wakatukile, wayile ku litala lyendi.

⁸ Oho likunge lya bantu bamonene eshe, bakomokele. Pe bayemezele Nyambi, ou wapanikile bantu ngovu za nahiyo.

Yeshu ukwihana Mateo

⁹ Yeshu oho afumine ku mbalila yiyo wamonene mukakutelesha watumbiwile ngayi Mateo, hinga ekala mu litala lyakuteleshela mutelo. Pe wambile kukwendi ngayi, “Nkonke,” pe wemanine wamukonkele.

¹⁰ Oho Yeshu ekalile na kulya mu litala lya Mateo, bakakutelesha babengi na bakawubi benginine, pe balile nendi hamo na bandongesha bendi.’

¹¹ Oho Bafwalishi bamonene noho, bepwile bandongesha bendi ngayi, “Kati shumangani mulongeshi wenu akulya na bakakutelesha na bakawubi?”

¹² Yeshu oho ayuvwile eshe, wambile ngayi, “Bantu banzimba kushinga nganga bafwako, ndele bakukola tuhu.

¹³ Yenunga mukafunde eshe likutontoloka lizu likwamba ngayi, ‘Nikushinga kulongesha nceshe, kaliha nkombela.’ Ndaba kaliha nezile mukwihana bakwoloka ngoboni bakawubi.’

Liyipu lyaha kuzila kulya

¹⁴ Shikati shiyo bandongesha ba Yowano bezile kuli Yeshu ngayi, “Shumangani etu na Bafwalishi tukuzila kulya, ngoboni bandongesha bobe kuzila kulya bafwako?”

¹⁵ Yeshu wakumbwile ngayi, “Kati bahoni ba mukashinawenga bakutwesha kuhomba oho mukashinawenga ushili nabo ndi? Ngoboni shikati shikeza, oho mukashinawenga akafumishiwa kukwabo, niho bakazila kulya.

¹⁶ “Kowa muntu ukutopeka shitabu shashipya ha shivwalo sha mwaka, ndaba shitabu shashipya shikatabula shivwalo sha mwaka, pe litubwa likendelela.

¹⁷ Kami bantu kaliha balongelanga waine yayipya mu mbokoshi ya mwaka, ndaba mbokoshi ya mwaka yikatabuka, pe waine yikayitika, na mbokoshi yikabipa. Ngoboni waine yayipya yayakiwanga mu mbokoshi yayipya, pe wubili wabyo bikekala shiwahe.”

Mwana Yailashi na mbuyama uya wakwatile ku shivwalo sha Yeshu

¹⁸ Oho ambilenga ebye kukwabo, kwezile mukulwane wa shinangonge, washinkamine kumbili yendi, pe wambile ngayi, “Mwanami wa mushimbi wafwakale, ngoboni yeka ukambike liboko lyobe hahendi, pe ukayoya.”

¹⁹ Yeshu wakatukile wayile nendi, na bandongesha bendi bamukonkele.

²⁰ Niho mbuyama wekalile na wulweli wakututika mukeza myaka likumi na yibili, wamukonkele munyima, wakwatile ku mungundo wa shivwalo shendi.

²¹ Ndaba wahanganikile mu mutima wendi ngayi, “Ndi nikakwata tuhu ku shivwalo shendi, nikanyongomana.”

²² Yeshu washetukile kunyima, wamumonene, pe wamutongwezele ngayi, “Tula mutima mwanami, kukulupila kwobe kunakunyongomanishi.” Pe uya mbuyama wanyongomanine ha shikati bene shiyo.

²³ Oho Yeshu enginine mu litala lya uya mukulwane wa shinangonge wamonene bambetelenga tukonkebele na likunge lya bantu balililenga,

²⁴ wambile kukwabo ngayi, “Tutikenu taha ha munkanda, mushimbi shilolo afwe nalangana tulo.” Ngoboni bamuhepele.

²⁵ Yeshu watutwishile likunge lya bantu ha munkanda, wenginine mu litala wakwatile mushimbi ku liboko, pe mushimbi wapindukile.

²⁶ Ncango yaneshe, yayuvwanikile mu litunga liyo nimwalyo.

Yeshu ukunyongomanisha balume babili batushishitwa

²⁷ Yeshu wafumine kuyo, oho ayilenga tushishitwa babili bamukonkele, babilikizile ngayi, “Obe mwana Ndavita, tuyuvwileko nceshe!”

²⁸ Oho enginine mu litala, tushishitwa bayo bezile kukwendi, Yeshu wambile kukwabo ngayi, “Kati mukukulupila ngayi nikutwesha kumitonesha ndi?” Bakumbwile ngayi, “Ingoi, Mwene.”

²⁹ Niho akwatile ha meho wabo, wambile ngayi, “Shitendiwe ngo kukulupila kwenu.”

³⁰ Pe meho wabo atonene. Niho Yeshu abacincikile shikuma ngayi, “Hinga mutongweza shuma eshe ku muntu hinge umo.”

³¹ Ngoboni oho bayile, batumbalalishile mpupo yendi mu litunga liyo nimwalyo.

Yeshu ukunyongomanisha mulume wakubula kwamba

³² Oho batutikilenga mu litala, bantu baletele kuli Yeshu mulume wakubula kwamba, ndaba wekalile na mayimbwe.

³³ Oho Yeshu afumishile mayimbwe, uya mulume wabalikile kwamba. Pe likunge lya bantu bakomokele, bambile ngayi, “Byuma ebye hinga byatanga kumoneka mu Ishalela.”

³⁴ Ngoboni Bafwalishi bambile ngayi, “Wafumishanga mayimbwe na ngovu za mwene wa mayimbwe.”

Yeshu ukuyuvwila bantu nceshe

³⁵ Yeshu wapitilenga mu minzi na tunzi nimwatwo. Walongeshelenga mu mashinangonge na kushimikila ncango zaziwahe za Wene wa Nyambi, pe wanyongomanishile bakamalweli na bakakukola nimwabo.

³⁶ Oho amonene makunge a bantu, wabayuvwilile nceshe, ndaba bayandile na kupopa, ngo bambelele bakubula mulishani.

³⁷ Niho ambile ku bandongesha bendi ngayi, “Byakuteza byabingi, ngoboni bakakuteza babashe.

³⁸ Nohobene lombelenu kuli mwine mfuba, ngayi atume bakakuteza mukuteza mbuto yendi.”