Mateo 7 - Kulimama Kwakupya

Kuyata baminenu

¹ “Hinga muyata baminenu, pe nanenu bakamiyata.

² Ndaba nyatilo eye mu kuyata nayo baminenu, mukayatiwa nayo. Kami osho mukutenda kubaminenu kami bakamitendasho.

³ Shumangani ukutilamina kahoni kali mu liho lya kawushinda wobe, ngoboni ukubula kutosha shitondo shili mu liho lyobe?

⁴ Pe ukwamba nahiti ku kawushinda wobe ngayi, ‘Leha nikufumishe kahoni kali mu liho lyobe,’ oho obe hinga wekala na shitondo mu liho lyobe?

⁵ Obe mukashishweka, tatika taha kufumisha shitondo shili mu liho lyobe, niho umone shiwahe ngayi ufumishe kahoni kali mu liho lya kawushinda wobe.

⁶ “Hinga mupanika batuwa byuma byakuyela, kutina bamifutukile na kumilwisha. Hinga muyumbila mapela wenu hambili ya bangulube, ndaba bakuwalyatangila na mawulu wabo.

Nyepenu, shingenu, ngongomwezenu

⁷ “Nyepenu, pe mukapanikiwa, shingenu, pe mukawana, ngongomwezenu, pe bakamishinkulwila.

⁸ Ndaba ou nimwendi ukunyepa ukutambula. Nimwendi ukushinga, ukuwana. Kami ou ukungongomweza, bakumushinkwilila.

⁹ Kati yani hakati kenu ndi mwanendi unalombo linkende, hakumupana limanya?

¹⁰ Hinga ndi unalombo yinci, hakumupana liyoka?

¹¹ Tambako enu bababi mukulimuka kupanika bana benu byuma byabiwahe, pe Tatiyenu wa muyilu ukakwanga nahiti kupanika byuma byabiwahe kuli baya bakulomba kukwendi?

¹² “Nohobene mu byuma nimwabyo tendelenu baminenu ngonehe mukushinga ngayi nanibo bamitendele. Ndaba nizo Ndayano za Moshesha na bilongesha bya bamiluwe.

Shipana shakushinana

¹³ “Inginenu mu shipana shakushinana. Ndaba shipana shakuya ku Ngehena shakuyahamina, kami nzila yikuyako yayinene, pe bakwinginamo babengi.

¹⁴ Ngoboni shipana shakuya ku wumi shakushinana na nzila yikuyako yakushotala, pe bakuyiwana babashe.

Mutondo na mikabo yawo

¹⁵ “Keyenu na bamiluwe ba mahalo. Bakwiza kukwenu banalifwiki shitembe sha mbelele, ngoboni mukati banengi bambinzi babakali.

¹⁶ Mukabalimukila ku mikabo yabo. Kati mikabo ya shinyanca bayibuyanga ku muwungawunga, hinge nkuyu bazibuyanga ku mukona ndi?

¹⁷ Nohobene mutondo wawuwahe nimwawo wukuyima mikabo yayiwahe, ngoboni mutondo wawubi wukuyima mikabo yayibi.

¹⁸ Mutondo wawuwahe kutwesha kuyima mikabo yayibi wufwako, kami mutondo wawubi kuyima mikabo yayiwahe wufwako.

¹⁹ Mutondo nimwawo wakubula kuyima mikabo yayiwahe ukatemiwa, nakuuyumbila mu mundilo.

²⁰ Nohobene mukabalimuka na mikabo yabo.

Hinga natanga kumilimuka

²¹ “Kaliha ou nimwendi ukwamba kukwami ngayi, ‘Mwene, Mwene’ ukengina mu Wene wa muyilu, ngoboni kukengina ou ukutenda shifungo sha Tate uli muyilu.

²² Ha mutena uyo babengi bakamba kukwami ngayi, ‘Mwene, Mwene, kati kaliha twashimikilenga mu lizina lyobe ndi? Kati kaliha twafumishilenga mayimbwe mu lizina lyobe ndi? Kami kaliha twatendelenga bikomokesho byabingi mu lizina lyobe ndi?’

²³ Pe nikabatongweza ngayi, ‘Hinga natanga kumilimuka. Fumenu kukwami enu bakakutenda wubi.’

Bakakuzika matala babili

²⁴ “Nohobene ou nimwendi ukuyuvwa mazu wami, pe hakuwombatala, ukufweka ngo mulume wa ngana wazikile litala lyendi ha limanya.

²⁵ Mvula wanokele na libazi lyezile, kami mpepo yapepokelele ha litala liyo. Ngoboni kaliha lyawile, ndaba lyatendiwile ha limanya.

²⁶ “Ngoboni ou nimwendi ukuyuvwa awa mazu wami, pe hakubula kuwombatala, ukufweka ngo mulume wakuyeba wazikile litala lyendi ha lihekelela.

²⁷ Mvula wanokele na libazi lyezile, kami mpepo yapepokelele ha litala liyo, pe lyawile. Kuwa kwalyo kwabipile shikuma.”

Ngovu za Yeshu

²⁸ Oho Yeshu amanishile kwamba byuma ebye, makunge a bantu bakomokele kulongesha kwendi.

²⁹ Ndaba wabalongeshele na ngovu kupitakana bakakulongesha ndayano.