Mateo 5 - Kulimama Kwakupya

Ncango zaha lipili

¹ Oho Yeshu amonene makunge a bantu, wakandamine ha lipili, pe wekalile hanci. Bandongesha bendi bezile kukwendi,

² pe watatikile kubalongesha ngayi,

Mfuywezi

³ “Bali na mfuywezi baya bakuliyuvwa kushepwa mu moyo, ndaba wene wa muyilu unengi wabo.

⁴ Bali na mfuywezi baya bakulila, ndaba bakababengezeka.

⁵ Bali na mfuywezi baya bakulilimbwilisha, ndaba bakakona kaye.

⁶ Bali na mfuywezi baya bali na nzala na linyontwa lya byakwoloka, ndaba bakekuta.

⁷ Bali na mfuywezi baya bali na nceshe, ndaba bakabayuvwila nceshe.

⁸ Bali na mfuywezi baya banayele mu mitima, ndaba bakamona Nyambi.

⁹ Bali na mfuywezi baya bakutabwela bantu, ndaba bakatoyiwa ngayi bana ba Nyambi.

¹⁰ Bali na mfuywezi baya bakuyandishiwa ha byakwoloka, ndaba Wene wa muyilu unengi wabo.

¹¹ Muli na mfuywezi ndi bantu bakumitukana na kumiyandisha, na kumibangila byabibi nimwabyo bya mahalo ndaba yami.

¹² Wahililenu na kutangala, ndaba ncungu yenu yayinene muyilu. Eshe nisho bayandishile bamiluwe baya bekalileko enu oho shilolo muhemuwe.

Mushele na lumuni

¹³ “Enu muli mushele wa hano hanci, ngoboni ndi mushele unahamuku, ukatobalishiwa nahiti? Kutwesha kutobiwa kami hiwufwako, nohobene, ukuyumbiwa hanci, pe bantu bakuwulyata na mawulu.

¹⁴ “Enu muli lumuni lwa kaye. Munzi unazikiwi ha shinkanda kutwesha kuholekiwa wufwako.

¹⁵ Hinge bantu kutwesha kumunika lambi na kuyiyaka munceto ya lulonga lwakukunama bafwako. Ngoboni bakuyiyaka haya yikumoneka ngayi yimoneshe bali mu litala nimwabo.

¹⁶ Nohobene lumuni lwenu lumunike ku bantu, ngayi mwanga bamone milimo yenu yayiwahe, pe bapane maleema kuli Tatiyenu wa muyilu.

Bilongesha bya ha ndayano

¹⁷ “Hinga muhanganika ngayi ninezi na kumanisha Ndayano za Moshesha* hinge kulongesha kwa bamiluwe, kaliha ninezi na kumanisha, ngoboni ninezi ngayi bitendiwe.

¹⁸ Mwashikuma nikumitongweza ngayi, hantu liyilu na hanci binapiti, kowa koma hinge kalizu kakashe katikitiwa kakafuma ku ndayano, hamo nimwabyo binatendiwe.

¹⁹ Ou nimwendi ukakiluka zimo zazishe kuneze ndayano, na kulongesha bantu noho, niye ukatoyiwa wamushe mu Wene wa muyilu. Ngoboni ou ukazombatala na kuzilongesha, ukatoyiwa wamunene mu Wene wa muyilu.

²⁰ Ndaba nikumitongweza ngayi, ndele kwoloka kwenu kupitakane kuya kwa bakakulongesha ndayano na Bafwalishi, pe kukengina mu Wene wa muyilu mufwako.

Bilongesha bya ha kupilama

²¹ “Mwayuvwile eshe bambile bashikale ngayi, ‘Hinga uziha, kami ou ukuziha ukufwanina kuyatishiwa.’

²² Ngoboni haya ami nikumitongweza ngayi, ou ukupilamina kawushinda wendi, ukufwanina kutwaliwa ku nkuta. Ngoboni ou ukutoya kawushinda wendi ngayi, ‘Uli shibulangana,’ ukufwanina kutwaliwa ku mundilo wa Ngehena.

²³ “Nohobene ndi ukutwala ntupu yobe kuli Nyambi ku shihanda, pe hiukanuka ngayi uli na shambo na kawushinda wobe,

²⁴ shiya ntupu yobe kumbili ya shihanda. Boka taha ukalyambwilile na kawushina wobe, nohoboni uboke na kutupula ntupu yobe kuli Nyambi.

²⁵ “Liyuvwashane wangu na uya ukuya mukukuyatisha ku nkuta. Liyuvwashane nendi oho shilolo akakume ku nkuta, kutina ukakutwala ku mukakuyata, pe mukakuyata akakuyaka mu maboko a mukakulama, uya ukakupatilila mu tolongo.

²⁶ Mwashikuma nikumitongweza ngayi kukafumamo wufwako hantu unamanishi kuyumba uya mulandu.

Bilongesha bya ha wunjenge

²⁷ “Mwayuvwile eshe bambile ngayi, ‘Hinga mutendanga wunjenge.’

²⁸ Ngoboni hano nikumitongweza ngayi ou nimwendi ukutilamina mbuyama na kulishoza, watenda kale nendi wunjenge mu mutima wendi.

²⁹ Ndi liho lyobe lya shilyo likukupukalisha ngayi utende wubi, litompole, pe uliyumbe. Ndaba shashiwahe kukwobe kuyumba shimamo shobe kupitakana ngayi lutu lwobe nimwalwo lukayumbiwe ku Ngehena.

³⁰ Pe ndi liboko lyobe lya shilyo likukupukalisha ngayi utende wubi, liketule, pe uliyumbe. Ndaba shashiwahe kukwobe kuyumba shimamo shobe, kupitakana ngayi lutu lwobe nimwalwo lukayumbiwe ku Ngehena.

Bilongesha bya ha kuziha maluwo

³¹ “Shambiwile kami ngayi, ‘Ou nimwendi wakulubula mukazendi ukufwanina kumupana lin̄wati lya kuziha maluwo.’

³² Ngoboni haya ami nikumitongweza ngayi mulume wakulubula mukazendi ndele ndaba yakutenda wunjenge, ukamwinga mukakutenda wunjenge ndi ukayekiwa. Kami nimwendi ou ukamuyeka, ukatenda nendi wunjenge.

Bilongesha bya ha kulibeza

³³ “Kami mwayuvwile shambiwile ku bashikale ngayi, ‘Hinga mubeza bya mahalo, ngoboni tendela Mwene osho walibezele nendi.’

³⁴ Ngoboni ami nikumitongweza ngayi, hinga mubezanga, hinge na liyilu ndaba lyenga litanda lya Nyambi.

³⁵ Hinge hano hanci ndaba henga ha malyatilo a mawulu wendi, hinge na Yelushalema, ndaba lwenga lukena lwa Mwene wamunene.

³⁶ Kami hinga ubeza na mutwe wobe ndaba kutwesha kufutula luhuki lumo mu kutuba hinge mu kushipa wufwako.

³⁷ Ngoboni mwambe ngayi, ‘Ee,’ hinga ngayi, ‘Byo,’ shakunungako nimwasho, shikufuma ku mukawubi.

Bilongesha bya ha kubweshela wubi ku wubi

³⁸ “Mwayuvwile shambiwile ngayi, ‘Kubokeshiwe liho na liho, liyewe na liyewe.’

³⁹ Ngoboni haya nikumitongweza ngayi, hinga mubweshela wubi ku muntu ukumibipishila. Ngoboni ndi muntu unakukama ha ntanta ya shilyo, mutengekele ntanta yamina kami.

⁴⁰ Kami ndi muntu ukushinga kukuyatisha ngayi akuyangule shikobelo shobe, mushiyile na ncanci kami.

⁴¹ Kami ndi muntu ukukukandikiza kwenda mukala umo, umushindikize mikala yibili.

⁴² Ou ukukunyepa mupanike, hinga uyumina ou ukushinga kuwila kukwobe.

Kuhaka bakankole

⁴³ “Mwayuvwile shambiwile nehe ngayi, ‘Haka ndambo yobe, pe zimba mukankole wobe.’

⁴⁴ Ngoboni nikumitongweza ngayi hakenu bakankole benu, kami lombelelenu baya bakumiyandisha,

⁴⁵ ngayi mwinge bana ba Tatiyenu wa muyilu. Ndaba ukututwishila bantu bababi na babawahe mutena wendi, kami ukulokeshela bakwoloka na bababi mvula wendi.

⁴⁶ Ndaba ndi mukuhaka baya bakumihaka, mukawana ncungu ngani? Kati baka mutelo kaliha nisho benganga nanibo ndi?

⁴⁷ Kami ndi mukushangwisha tuhu bawushinda wenu, mukupitakana nahiti bamina? Kati bakalitunga kaliha batendanga noho ndi?

⁴⁸ Ngonehe Tatiyenu wa muyilu enga wakulembuka, nohobene enu lembukenu.