Mateo 4 - Kulimama Kwakupya

Kwezekiwa kwa Yeshu

¹ Niho Moyo watwalile Yeshu mu libelelengwa mukwezekiwa kuli Shatana.

² Munyima ya kuzila kulya* matena makumi anaa mwaana na wushiku Yeshu wayuvwile nzala.

³ Oho Shatana ezile kukwendi, pe wambile ngayi, “Ndi uli Mwana Nyambi, tongweza awa mamanya afutuke mankende.”

⁴ Ngoboni Yeshu wakumbwile ngayi, “Kwatikitiwa ngayi, muntu kufwanina kuyoya na mankende tuhu ninkayawo wufwako ndele na mazu nimwawo akufuma mu kanwa ka Nyambi!”

⁵ Niho Shatana amutwalile ku Yelushalema, Lukena Lwakuyela, pe wamuyakile hayilu ha mamaninino ha Litala lya Nyambi.*

⁶ Pe wambile kukwendi ngayi, “Ndi uli Mwana Nyambi, kilukila hanci, ndaba kwatikitiwile ngayi, ‘Nyambi ukatongweza mangeloyi* wendi ngayi akulame, pe bakakubaka na maboko wabo, kutinisha liwulu lyobe kulituntula ku limanya.’ ”

⁷ Yeshu wakumbwile kukwendi ngayi, “Kwatikitiwa kami ngayi, ‘Hinga wezeka Mwene Nyambi yobe.’ ”

⁸ Shatana kami wamutwalile ha lipili lyalitali shikuma, pe wamumoneshele wene nimwawo wa hano hanci na wuwahe wawo.

⁹ Wambile kukwendi ngayi, “Ebye nimwabyo nikakupana, ndi ukashinkama ku manungo nakundemesha.”

¹⁰ Yeshu wakumbwile kukwendi ngayi, “Fuma kukwami obe Shatana! Ndaba kwatikitiwa ngayi, ‘Ukufwanina kulemesha Mwene Nyambi yobe na kumutendela milimo niye tuhu.’ ”

¹¹ Niho Shatana amushiyile, kami mangeloyi ezile amutendelele milimo.

Yeshu ukutatika mulimo wendi mu Ngalileya

¹² Yeshu oho ayuvwile ngayi Yowano banamuyaka mu tolongo, wayile ku Ngalileya.

¹³ Watuntukile ku Nazaleta, wayile nakwikala mu Kapenauma, munzi wa hahepi na Liziba lya Ngalileya, mu litunga lya Zembuloni na Nafwitali.

¹⁴ Ngayi kutendiwe ebye ambile muluwe Ishaya ngayi,

¹⁵ “Litunga lya Zembuloni na litunga lya Nafwitali, nzila yikuya ku liwate, munciza ya Yondana, Ngalileya wa Bakamatunga.*

¹⁶ Bantu aba bekalilenga mu mincimpwe, bakamona lumuni lwalunene. Kami baya bekalilenga mu litunga lya mubombola wa kufwa, lumuni lunabamuniki.”

¹⁷ Kufuma ku shikati shiyo, Yeshu watatikile kushimikila ngayi, “Tengulukenu, ndaba Wene wa muyilu uli hahepi.”

Yeshu ukwihana bakakushashila banaa

¹⁸ Yeshu oho akulishilenga ku Liziba lya Ngalileya, wamonene muntu na mukonzowendi, Shimoni ukutumbiwa Pita, na mukonzowendi Anduleu. Bamanyikilenga kanyanzi kabo mu liziba, ndaba bengile bakakushashila.

¹⁹ Yeshu wambile kukwabo ngayi, “Nkonkenu, nikaminga bakakushashila bantu.”

²⁰ Wanguwangu bashiyile tunyanzi twabo, pe bamukonkele.

²¹ Oho ayile kumbili wamonene babili bamina muntu na mukonzowendi, Yakoba na Yowano bana ba Zebende, bekalile mu wato na tatiyabo Zebende, hibatungulula tunyanzi twabo. Yeshu wabehanine.

²² Wanguwangu bashiyile wato wabo na tatiyabo, pe bamukonkele.

Yeshu ukulongesha na kushimikila na kunyongomanisha

²³ Yeshu wapitilenga mu Ngalileya nimwamo, walongeshelenga mu mashinangonge, washimikililenga ncango zaziwahe za Wene wanyongomanishilenga bantu baya bekalile na malweli nimwawo na bakakukola.

²⁴ Mpupo yendi yatumbalalile mu Shiliya nimwamo, pe baletele kukwendi bakakukola nimwabo bekalile na malweli a mishoboshobo, bakamayimbwe na baka kamfunya na baka lukuku, pe Yeshu wabanyongomanishile.

²⁵ Likunge lyalinene lya bantu baya bafumine ku Ngalileya na ku Minzi Likumi naku Yelushalema na ku Yundeya na munciza ya Yondana bamukonkele.