Mateo 3 - Kulimama Kwakupya

Kushimikila kwa Yowano Mukakuzubilisha

¹ Ha matena ayo Yowano Mukakuzubilisha wezile, wabalikile kushimikila mu libelelengwa lya mu Yundeya, wambile ngayi,

² “Tengulukenu, ndaba Wene wa muyilu uli hahepi!”

³ Yowano wengile muntu uya atoyelenga muluwe wa Nyambi Ishaya oho ambile ngayi, “Lizu lya mukakubilika mu libelelengwa ngayi, ‘Wahishenu mukwakwa wa Mwene, ololenu zinzila zendi.’ ”

⁴ Bivwalo bya Yowano byatungiwile ha wushako wa kamela, kami walimangile mukunzi wa shitembe mu lukanda lwendi. Byakulya byendi byengile mikumbi na wushi.

⁵ Bantu bafumine ku Yelushalema, na ku Yundeya nimwako, na ku litunga nimwalyo lya hahepi na Mushinzi wa Yondana, bayile kukwendi.

⁶ Balitabilile wubi wabo, pe wabazubilishile mu Mushinzi wa Yondana.

⁷ Ngoboni oho amonene Bafwalishi* babengi na Bashanduki* hibeza kukwendi mukubazubilisha, wambile kukwabo ngayi, “Enu bana babipili! Kati yani unamishiwululu ngayi mupanze ku wukali ukeza?

⁸ Yimenu mikabo yakufwanina muntu unatenguluku.

⁹ Kami hinga mwamba mu mitima yenu ngayi, ‘Tuli na tatiyetu Abulahama.’ Haya nikumitongweza ngayi Nyambi ukutwesha kushimba ku nawa mamanya nakuwafutula kwinga bana ba Abulahama.

¹⁰ Kazembe kayakiwa kale ku mipishi ya mitondo, nohobene mutondo nimwawo uya ukubula kuyima mikabo yayiwahe ukatemiwa nakuyumbiwa mu mundilo.

¹¹ Nikumizubilisha na mema kumonesha ngayi munatenguluku, ngoboni ou ukeza munyima yami uli na ngovu kumpitakana, kufwanina kushimba hinge makatulo wendi nifwako. Niye ukamizubilisha na Moyo Wakuyela na mundilo.

¹² Luhebe lwendi lwakupepesha luli mu liboko lyendi, ukapepa mbuto yendi. Ukabungika loto mu shishete, pe ukahokesha muzungu na mundilo wakubula kuzima.”

Kuzubilishiwa kwa Yeshu

¹³ Niho Yeshu wafumine ku Ngalileya, pe wayile ku Yondana kuli Yowano mukumuzubilisha.

¹⁴ Ngoboni Yowano wakanine ngayi, “Ami nafwanini kuzubilishiwa kukwobe, kati kami unezi kukwami?”

¹⁵ Ngoboni Yeshu wamukumbwile ngayi, “Yitabila ngayi shitendiwe noho wuluno. Ndaba mu nzila eye tukatenda nimwabyo mukwoloka.” Nohobene Yowano wetabilile.

¹⁶ Wanguwangu oho Yeshu azubilishiwile wafumine mu mema. Pe liyilu lyamushinkulukile, wamonene Moyo wa Nyambi hiwushulumuka ngonehe litela, pe wamunikile hahendi.

¹⁷ Niho lizu lyafumine muyilu lyambile ngayi, “Ou niye Mwanami nahaka, wangwahililishanga shikuma.”