Mateo 27 - Kulimama Kwakupya

Yeshu ukutwaliwa kuli Pilato

¹ Oho kwashile lumenemene, bakankombela ba bakulwane nimwabo na bakulwane ba Bayunda, baliyuvwashanine ngayi bazihe Yeshu.

² Bamumangile, pe bamutwalile kuli kalela Pilato.

Lufu lwa Yundashi

³ Oho Yundashi ou wamubebele amonene ngayi Yeshu wunayatiwi ngayi afwe, walinyancile niye mwine, pe wabweshelele ayo mali makumi ahatu a muwayawaya wa shiliva ku bakankombela ba bakulwane na bakulwane ba Bayunda.

⁴ Wambile ngayi, “Ninatende wubi ndaba nabebe mukeza wakubula mulandu.” Nibo bambile ngayi, “Osho shinengi shumangani kukwetu? Limonene obe mwine.”

⁵ Yundashi wayumbilile ayo mali a shiliva mu Litala lya Nyambi, pe wafumine, niho ayile mukuliponda.

⁶ Bakankombela ba bakulwane batolele ayo mali bambile ngayi, “Kufwanina tufwako kuwayaka mu mfuma ndaba anengi ndando ya mukeza.”

⁷ Niho baliyuvwashanine, pe aya mali bawalandile mfuba ya mukakubumba zinyungu, kwinga binzimbi bya bayeni.

⁸ Nohobene, iyo mfuba bayitumbile ngayi, “Mfuba ya Mukeza” kukuma na ku mutena walelo.

⁹ Pe eshe ambile muluwe Yelemiya shatendiwile. “Bashimbile makumi ahatu a muwayawaya wa shiliva aya bantu Baishalela baliyuvwashanine kwinga ndando yendi.

¹⁰ Pe baliyavwishile ayo mali kulanda mfuba ya mukakubumba zinyungu, ngonehe atongwezele Mwene.”

Pilato ukwipula Yeshu

¹¹ Yeshu wemanine kumbili ya Kalela,* pe Kalela wamwipwile ngayi, “Kati obe Mwene wa Bayunda ndi?” Yeshu wakumbwile ngayi, “Ingoi, ngonehe unamba.”

¹² Ngoboni oho bamubangilile byambo bakankombela ba bakulwane na bakulwane ba Bayunda, kaliha wakumbwile shamina.

¹³ Niho Pilato amwipwile ngayi, “Kati kuyuvwa wufwako ebye byuma byabingi balinakwamba hahobe ndi?”

¹⁴ Ngoboni Yeshu kaliha wakumbwile hinge lizu limo, nohobene Kalela wakomokele shikuma.

Yeshu ukuyatiwila kufwa

¹⁵ Ha Shimbo sha Kupitilila nimwasho, shengile shiheka sha Kalela kushobola kayili owo bantu bashingilenga.

¹⁶ Ha shikati shiyo kwekalile kayili wakuluwa wa lizina lya Mbalambashi.

¹⁷ Oho bakungulukile Pilato wabepwile ngayi, “Mukushinga ngayi nimishobolwele yani? Mbalambashi hinge Yeshu ou ukutumbiwa ngayi Kilishitu?”

¹⁸ Ndaba walimukile ngayi bakulwane ba Bayunda bali na mwili na Yeshu niho banamulete kukwendi.

¹⁹ Oho Pilato ekalile ha shipona shendi sha kuyatila, mukazendi watumine lizu kukwendi ngayi, “Hinga utenda shamina ku muntu owo wakwoloka, nayanda shikuma mu mulo lelo ndaba yendi.”

²⁰ Ngoboni bakankombela ba bakulwane na bakulwane ba Bayunda bahongele likunge lya bantu ngayi banyepe Pilato kubashobolwela Mbalambashi na kuziha Yeshu.

²¹ Pilato wabepwile ngayi, “Ku naba babili, mukushinga ngayi nimishobolwele yani?” Bantu bakumbwile ngayi, “Mbalambashi.”

²² Pilato wabepwile ngayi, “Haya ou Yeshu ukutumbiwa ngayi Kilishitu nimutende nahiti?” Bantu nimwabo bakumbwile ngayi, “Mukoleke!”

²³ Ngoboni Pilato wabepwile ngayi, “Ndaba ngani? Kati unatende mulandu ngani?” Ngoboni bantu babilikizile shikuma ngayi, “Mukoleke!”

²⁴ Oho Pilato amonene ngayi kowa neshe akutenda, ngoboni hakutwesha kuyikala mushunga, washimbile mema, pe wayowelele ku maboko kumbili ya likunge lya bantu wambile ngayi, “Ami nifwawo mulandu ku mukeza wa nou muntu wakwoloka limonenenu enu bamwine.”

²⁵ Bantu nimwabo bakumbwile ngayi, “Mukeza wendi wikale ha mitwe yetu na bana betu.”

²⁶ Niho Pilato wabashobwelelele Mbalambashi, pe wabapanine Yeshu oho amanishile kumuzipola ngayi bamukoleke.

Bakanzita bakukumangiza Yeshu

²⁷ Niho banzita ba Pilato batwalile Yeshu ku litala lya kalela, bakungwile kanzunga nimwako ka bakanzita.

²⁸ Bamuvulile bivwalo byendi, niho bamuvwikile shivwalo sha kufubila.

²⁹ Batendele munana wa mihengela, niho bamuyakile ku mutwe wendi. Bayakile litete mu liboko lyendi lya shilyo, bashungumanine manungo hanci, bamukumangizile ngayi, “Wuyoye myaka yayingi obe Mwene wa Bayunda!”

³⁰ Niho bamufwizilile mate, batolele litete, pe bamukamine ha mutwe.

³¹ Oho bamanishile kumukumangiza bamuvulile shiyo shivwalo, pe bamuvwalikile bivwalo byendi. Niho bamutwalile mukumukoleka.

Yeshu bakumukoleka ha shishempakano

³² Oho bafuminenga mu munzi, bawanine mulume wa ku Shilene wa lizina lya Shimoni, bakanzita niho bamukandamikile ngayi ashimbe shishempakano sha Yeshu.

³³ Oho bakumine ku mwanya ukutumbiwa Ngolongota, kunungulula ngayi, “Mbalila ya Kangawe.”

³⁴ Kuyo bamupanikile waine yakuvwela na wanga wawululu ngayi anwe, ngoboni oho ayeleleko, wakanine kunwa.*

³⁵ Oho bamukolekele, balitapilile bivwalo na nyela.

³⁶ Bekalile hanci, pe bamushembokele.

³⁷ Hayilu ya mutwe wendi, hatikitiwile mazu a mulandu awa bamuyatile nawo ngayi, “Ou niye Yeshu Mwene wa Bayunda.”

³⁸ Niho bakolekele hamo nendi bezi babili, umo ku shilyo, wamina ku shimoho.

³⁹ Baya bapitilenga mu nzila bamukumangizile, kami banengokeshele mitwe yabo,

⁴⁰ pe bambile ngayi, “Obe ukutwesha kushiwula Litala lya Nyambi na kulitenda kami mu matena ahatu, haya lilamwine obe mwine! Ndi uli Mwana Nyambi, fuma ha shishempakano!”

⁴¹ Nohobene kami bakankombela ba bakulwane na bakakulongesha ndayano na bakulwane ba Bayunda, bamukumangizile ngayi,

⁴² “Walamwinine baminendi, ngoboni kutwesha kulilamwina niye mwine wufwako! Kati kaliha Mwene wa Ishalela ndi? Afume ha shishempakano sha wuluno, pe tukakulupila mumwendi.

⁴³ Wakulupililile muli Nyambi. Lehenu Nyambi amulamwine ndi hamushinga, ndaba wambile ngayi, ‘Ami Mwana Nyambi.’ ”

⁴⁴ Nohobene baya bezi bakolekiwile nendi, nanibo kami bamuhandwile.

Lufu lwa Yeshu

⁴⁵ Kufuma ku shikati oho mutena wakumine hakati ka mutwe kwekalile mincimpwe mu litunga nimwalyo yiya yamanishile bikati bihatu na binaa.

⁴⁶ Oho shengile shikati sha wulikumi na mutanu, Yeshu wabilikizile na lizu lyalinene ngayi, “Eloi, Eloi lama sabakatani?” Kutontolola ngayi, “Nyambi yami, Nyambi yami, unanciyili bishini?”

⁴⁷ Bamo baya bemanine kuyo, oho bayuvwile ebye, bambile ngayi, “Ou muntu ulinakwihana Eliya!”

⁴⁸ Wanguwangu umo wetukile, washimbile shiponci, pe washizabikile mu waine ya kushasha, washiyakile ku litete, niho amupanikile ngayi anwe.

⁴⁹ Ngoboni bamina bambile ngayi, “Mulehenu tumone ndi Eliya ukwiza na kumulamwina!”

⁵⁰ Yeshu wabilikizile kami na lizu lyalinene, pe watulile moyo wendi.

⁵¹ Niho likwiza lya mu wumbo lyekalilenga mu Litala lya Nyambi lyatabukile hakati bitabu bibili kufuma kuyilu kutwala kunceto. Hanci ha kankile na mamanya apabukile,

⁵² na binzimbi kami byashinkulukile, pe zinyutu za bakuyela zazingi za baya bafwile bashangukile.

⁵³ Bafumine mu binzimbi, pe munyima ya kushanguka kwa Yeshu bayile mu Munzi Wakuyela, pe baholokele ku bantu babengi.

⁵⁴ Mukulwane wa nzita na bakanzita bekalile nendi baya balaminenga Yeshu, bamonene kukanka kwa hanci nanebye byatendiwile, batinine shikuma. Pe bambile ngayi, “Mwashikuma ou muntu wengile Mwana Nyambi!”

⁵⁵ Kwekalile bambuyama babengi bapenzelenga hinga bemana kwakutali baya bakonkelenga Yeshu oho afumine ku Ngalileya, kami bamuyavwilenga.

⁵⁶ Hakati kabo hekalile Maliya wa ku Mangandalena na Maliya manda Yakoba na Yoshesha na manda bana ba Zebende.

Yeshu ukufundiwa

⁵⁷ Oho kwengile mazolo, kwezile mulume wakuheta wa ku Alimatiya wa lizina lya Yoshefwa. Naniye wengile ndongesha wa Yeshu.

⁵⁸ Wayile kuli Pilato, wakanyepele mutuntu wa Yeshu, niho Pilato ambile ngayi mutuntu upanikiwe kukwendi.

⁵⁹ Yoshefwa washimbile mutuntu wa Yeshu, wawuvungilile mu likwiza lyakuyela.

⁶⁰ Kami wawuyakile mu shinzimbi shendi shashipya, eshe amangwile mu limanya. Niho andumwinine limanya lyalinene ku shipana sha shinzimbi, pe wayile.

⁶¹ Maliya wa ku Mangandalena na Maliya wamina, bekalile kuyo hinga bapenza ku shinzimbi.

Bakakulama ku shinzimbi

⁶² Mutena wakulundamina Wakukatala, bakankombela ba bakulwane na Bafwalishi bakungulukile kuli Pilato.

⁶³ Bambile ngayi, “Hekulu, tukwanuka ngayi oho wuyo mukakwongeza wushilikuyoya, wambile ngayi, ‘Kunyima ya matena ahatu nikashanguka.’

⁶⁴ Nohobene panika ndayano ngayi shinzimbi shilamiwe shikuma mu matena ahatu, kutina bandongesha bendi baye wushiku na kumuyibamo, pe bakamba ku bantu ngayi, unashanguku ku bafu. Pe mahalo a mamaninino akapitakana a kutatika.”

⁶⁵ Pilato wambile ngayi, “Muli na bakakulama, yenunga mukalame shiwahe ngonehe mukutwesha.”

⁶⁶ Niho bayile mukulama shinzimbi, bayakile limango ha limanya, pe bayakileko bakakulama.