Mateo 25 - Kulimama Kwakupya

Nguli ya bashimbi likumi

¹ “Ha shikati shiyo Wene wa muyilu ukufweka ngonehe, kwekalile bashimbi likumi baya bashimbile mimuni yabo, pe bayile na kushimbawila mukakuyeka.

² Ba mutanu bengile bakukeya, ba mutanu kami bengile bakuyeba.

³ Bakuyeba bashimbile mimuni yabo ngoboni kaliha bashimbile mazi amina.

⁴ Ngoboni bakukeya bashimbile mazi mu zilambi zabo hamo na mimuni yabo.

⁵ Oho mukakuyeka ehalile kwiza, nimwabo bakunokele, pe balanganine mu tulo.

⁶ “Hakati ka wushiku lukuwa lwayuvwanikile ngayi, ‘Mukakuyeka uno! Yekenu mumushimbawile!’

⁷ Niho bashimbi nimwabo likumi bapindukile, pe bawahishile mimuni yabo.

⁸ Bakuyeba banyepele ku bakukeya ngayi, ‘Tupenuko ku mazi enu, ndaba malambi etu wuluno azime.’

⁹ Ngoboni bakukeya bakumbwile ngayi, ‘Byo, awa mazi kutwesha kutukonkana enu nanetu afwako. Ngoboni yenunga ku bakakulandisha, mazi mukalilandile enu.’

¹⁰ Oho bayile na kulanda mazi, mukakuyeka wakumine, niho bashimbi mutanu baya baliwahishile, benginine nendi ku shimbo sha shinawenga, pe shihala shashinkiwile.

¹¹ “Oho kwapitile kashikati, baya bashimbi bamina bezile niho bambile ngayi, ‘Obe hekulu, obe hekulu, tushinkwilileko.’

¹² Ngoboni niye wabakumbwile ngayi, ‘Mwashikuma nikwamba kukwenu ngayi, kumilimuka nifwako.’ ”

¹³ Yeshu wamanishile ngayi, “Haya keyenu, ndaba kulimuka mutena hinge shikati mufwako.

Nguli ya bakamilimo bahatu

¹⁴ Kami Wene wa muyilu ukufweka ngonehe, kwekalile muntu wayile ku litunga lya kwakutali, wehanine bakamilimo bendi, wabashiyilile wuheti wendi ngayi bawulame.

¹⁵ Wapanikile ku muntu na muntu ngonehe ngovu zendi. Ku muntu umo wamupanikile makulukazi mutanu a muwayawaya wa wutale wa shiliva, kuwamina wapanikile makulukazi abili, na kuwamina wapanikile likulukazi limo, pe wayile lwendo lwendi.

¹⁶ Ou washimbile makulukazi mutanu wayile na kuwaheheza, wahehezeleho kami makulukazi mutanu.

¹⁷ Ou washimbile makulukazi abili, wawaninineho kami makulukazi abili.

¹⁸ Ngoboni ou washimbile likulukazi limo, wayile na kukaba hanci, pe waholekele mali a hekulyendi.

¹⁹ “Oho kwapitile shikati shashitali, hekulya baya bakamilimo wabokele, pe walabile nabo mali hamo.

²⁰ Ou washimbile makulukazi mutanu a muwayawaya wa shiliva wezile, waletele kukwendi makulukazi kami mutanu, pe wambile ngayi, ‘Hekulu, nka wampanine makulukazi mutanu a muwayawaya, mona, nawaniniho kami mutanu.’

²¹ Hekulyendi wambile kukwendi ngayi, ‘Unatende shiwahe, mukamulimo wamuwahe, wa kulunga. Unengi wa kulunga ha byabishe, nikakwinga mukakulama byuma byabingi. Yeka uwahilile hamo na hekulyobe.’

²² “Ou washimbile makulukazi abili a muwayawaya wezile, wambile ngayi, ‘Hekulu, nka wampanine makulukazi abili, mona, ninawaniniho kami abili.’

²³ Hekulyendi wambile kukwendi ngayi, ‘Unatende shiwahe, mukamulimo wamuwahe, wa kulunga. Unengi wa kulunga ha byabishe, nikakwinga mukakulama byuma byabingi. Yeka uwahilile hamo na hekulyobe.’

²⁴ Ou kami washimbile likulukazi limo lya muwayawaya wezile, wambile ngayi, ‘Hekulu, nakulimuka ngayi uli muntu wamukalu, watezanga omu unabulu kushanga, kami wakungululanga omu unabula kukuba.

²⁵ Nohobene natinine, nayile na kuholeka likulukazi lyobe lya mali mu limvu, mona, mali wobe wano.’

²⁶ Niho hekulyendi akumbwile ngayi, ‘Obe mukamulimo wamubi wawuvwa, kati walimukile ngayi natezanga omu nabulu kushanga na kukungulula omu nabulu kukuba?

²⁷ Shinga wakowezeshele mali wami mu panga aha naboko shinga natambulu mali wami hamo na nkambiko.

²⁸ Nohobene muyangenu likulukazi lya mali muwapanike kuli ou uli na makulukazi likumi lya mali.

²⁹ Ndaba muntu ou uli na byuma, ukapanikiwa byabingi, ngayi ekale na byabingi shikuma, ngoboni wakubula byuma ukayangiwa nebye alinabyo.

³⁰ Ou mukamulimo wamubi, muyumbilenu ku mincimpwe yaha munkanda, kuya akalila na kulikekenya ku mayewe.’

Kuyata kwa mamaninino

³¹ Oho Mwana muntu akeza mu wuwahe wendi, hamo na mangeloyi nimwawo, pe ukekala ha litanda lyendi lya wene.

³² Matunga nimwawo akakunguluka kumbili yendi, pe ukabatapulula umo kuwamina ngonehe mulishani ukutapulula bambelele ku bampongo.

³³ Ukayaka bambelele ku liboko lyendi lya shilyo, ngoboni bampongo ukabayaka ku lya shimoho.

³⁴ Niho Mwene akamba kubaya bali ku liboko lyendi lya shilyo ngayi, ‘Yekenu enu muli na mfuywezi za Tate, mukone wene owe amiwahishilile kufuma kukulenga kwa kaye.

³⁵ Ndaba nekalile na nzala, kami mwampanine mema, nekalile muyeni, mwantambwile,

³⁶ nekalile na wuvwu, kami mwamvwikile, nakolele, kami mwezile na kumona, nekalile mu tolongo, kami mwanzingwile.’

³⁷ “Pe bakwoloka bakamukumbula ngayi, ‘Mwene, twakumonene mwaka ngani hinga wekala na nzala, niho twakupanine byakulya? Hinge wekalile na linyontwa, niho twakupanine mema?

³⁸ Twakumonene mwaka ngani hinga wenga muyeni, niho twakutambwile? Hinge wekalile na wuvwu, niho twakuvwikile?

³⁹ Twakumonene mwaka ngani ukola, hinge mu tolongo, niho twezile kukwobe?’

⁴⁰ Pe Mwene ukakumbula ngayi, ‘Mwashikuma nikumitongweza ngayi, eshe mwatendele ku umo wa naba babashe wa bakonzobami, mwashitendele kukwami.’

⁴¹ “Niho ukamba kubaya bali ku liboko lya shimoho ngayi, ‘Fumenu kukwami enu bakamukuto! Pe yenunga ku mundilo wa mwayile myaka ou wawahishiwilile Shatana na mangeloyi bendi.

⁴² Ndaba nekalile na nzala, kami kaliha mwampanine byakulya, nekalile na linyontwa, kami kaliha mwampanine mema,

⁴³ nengile muyeni, kami kaliha mwantambwile, nekalile na wuvwu, kami kaliha mwamvwalikile, nakolele, kami nekalile mu tolongo, ngoboni kami kaliha mwayile na kumona.’

⁴⁴ “Pe bakakumbula ngayi, ‘Mwene, twakumonene mwaka ngani hinga wekala na nzala, hinge na linyontwa, hinge kwinga muyeni, hinge na wuvwu, hinge hiwukola, hinge mu tolongo, niho twabulile kukuyavwa?’

⁴⁵ Pe ukakumbula ngayi, ‘Mwashikuma nikumitongweza ngayi, oho mwabulile kubitenda ku umo wa naba babashe, mwabulile kubitenda kukwami.’

⁴⁶ Pe bakaya ku kashushwilo ka mwayile myaka, ngoboni bakwoloka bakaya ku wumi wa mwayile myaka.”