Mateo 23 - Kulimama Kwakupya

Yeshu ukunyanca bakakulongesha ndayano na Bafwalishi

¹ Niho Yeshu ambile ku makunge a bantu na ku bandongesha bendi ngayi,

² “Bakakulongesha ndayano* na Bafwalishi bekalanga mu shipona sha Moshesha.

³ Nohobene lamenu na kutenda nimwabyo ebye bakumitongweza, ngoboni hinga muhembwiliza ebye batendanga, ndaba kutenda biya bakushimikila bafwako.

⁴ Bakumanga miziho yayilemu, yayikalu kuyikatula, pe bakuyitwika ha bifuzi bya bantu, ngoboni nibo bamwine kutwesha kuyikatula hinge na munwe umo bafwako.

⁵ Nimwabyo ebye batendanga babitendanga ngayi babamone. Bakunenehesha matapa anatikitiwi mazu a Nyambi ha zimpala zabo na kutalihisha minganja ku bivwalo byabo.

⁶ Bakuhaka myanya ya maleema ku bimbo na kwikala mu bipona bya maleema mu mashinangonge.

⁷ Bakuhaka kushangwishiwa na maleema ku myanya yakulandishila na kutoyiwa ku bantu ngayi, ‘Balongeshi.’

⁸ Ngoboni enu bantu hinga bamitoya ngayi, ‘Balongeshi,’ ndaba muli na mulongeshi umo pele kami enu nimwenu munengi wushinda umo.

⁹ Kami hinga mutoya muntu hano hanci ngayi, ‘Tate,’ ndaba muli na Tatiyenu umo pele ou uli muyilu.

¹⁰ Kami hinga mutoyiwa ngayi, ‘Hekulu,’ ndaba muli na Hekulyenu umo tuhu niye Kilishitu.

¹¹ Wamunene hakati kenu enge mukamulimo wenu.

¹² Muntu nimwendi ukulinenehesha, bakamushepesha, kami muntu ukulishepesha, ukaneneheshiwa.

Yeshu ukuyata shishweka sha bakakulongesha ndayano na Bafwalishi

¹³ “Makando wenu, bakakulongesha ndayano na Bafwalishi, enu bakashishweka! Ndaba mukushinkila Wene wa muyilu ngayi bantu hinga bayinginamo enu kwinginamo mufwako, hinge kwitabilisha baya bakushinga kwingina ngayi bengine mufwako.

¹⁴ Makando wenu, bakakulongesha ndayano na Bafwalishi, enu bakashishweka! Ndaba mukuyibila bakazi ba bamfwile byuma byabo, kami mukulyongezanga mu kulombela malombelo a matali, nohobene mukashushuliwa shikuma.

¹⁵ “Makando wenu, bakakulongesha ndayano na Bafwalishi, enu bakashishweka! Mukwenda mikala yayingi mu mawate na mu matunga ngayi muwane muntu umo ukukonka kulongesha kwenu, oho mwamuwanakale mukumufutula kwinga mwana ngehena kabili ngonehe enu.

¹⁶ “Makando wenu, bakakutwaminina batushishitwa! Mukulongesha ngayi, ‘Nimwendi ukubeza na Litala lya Nyambi kumangiwa na mbeza zendi wufwako, ngoboni nimwendi ou ukubeza na ngolinde yaku Litala lya Nyambi, unamangiwi na mbeza zendi!’

¹⁷ Enu bibulangana bya tushishitwa! Kati shikupitakana shamina shiti? Wutale wa ngolinde, ndi Litala lya Nyambi lyakuyelesha ngolinde?

¹⁸ Kami mukulongesha ngayi, ‘Nimwendi ukubeza na shihanda, kumangiwa na mbeza zendi wufwako, ngoboni nimwendi ukubeza na ntupu ili ha shihanda unamangiwi na mbeza zendi.’

¹⁹ Enu batushishitwa! Kati shikupitakana shamina shashinene shiti? Ntupu, ndi shihanda shakuyelesha ntupu?

²⁰ Nohobene nimwendi ou ukubeza na shihanda, ukulibeza na ntupu iliho nimwayo.

²¹ Kami ou ukubeza na Litala lya Nyambi, ukulibeza nalyo, na uya wekalangamo.

²² Kami ou ukubeza na liyilu, ukulibeza na litanda lya Nyambi, na nou wekalangaho.

²³ “Makando wenu, bakakulongesha ndayano na Bafwalishi, enu bakashishweka! Ndaba mukutupula shimo sha wulikumi sha mashiha a minta na a nishi na a kumini, ngoboni munakana kwombatala kulongesha byabinene bya ndayano, nehe kulunga na nceshe na kukulupiliwa. Ebye nibyo mwafwanini kutenda nakubula kukanaho byamina.

²⁴ Enu bakakutwaminina batushishitwa! mukufumisha mbulumbulu munebye mukunwa, ngoboni mukumina kamela.

²⁵ “Makando wenu, bakakulongesha ndayano na Bafwalishi, enu bakashishweka! Ndaba mukuyowesha nkomoki na lulonga ha munkanda, ngoboni mukati binenzala na byuma munawana mu wizi na mutongo.

²⁶ Obe Kafwalishi wa kashishitwa! Yowesha taha nkomoki na lulonga mukati, pe na hamunkanda hakuyela.

²⁷ “Makando wenu, bakakulongesha ndayano na Bafwalishi, enu bakashishweka! Ndaba mukufweka ngo binzimbi bya kutuba, ebye bikumoneka wuwahe ha munkanda, ngoboni mukati binenzala na bifupa bya bafu na bya kubola nimwabyo.

²⁸ Nohobene kami mwamonekanga ku bantu ngo muli bakwoloka ha munkanda, ngoboni mukati munenzala na shishweka na wubi.

Yeshu ukulubulula kashushwilo ka bakakulongesha ndayano na Bafwalishi

²⁹ “Makando wenu, bakakulongesha ndayano na Bafwalishi, enu bakashishweka! Ndaba mukutenda binzimbi bya bamiluwe na kuwahisha binzimbi bya bakwoloka,

³⁰ kami mukwamba ngayi, ‘Shinga twekalileko ku matena a bankaka zetu, shinga kaliha twalifungilile nabo na kuyita mukeza wa bamiluwe.

³¹ Nohobene nisho mukuyitabila enu bamwine ngayi muli bana babaya bazihile bamiluwe.

³² Haya yinzalishililenu shipimisho sha wumi wa bankaka zenu.

³³ Enu mayoka! Enu bana ba bipili! mukapanza nahiti kukunonga kwa ngehena?

³⁴ Nohobene, nikatuma kukwenu bamiluwe na bantu bangana na balongeshi. Bamo kukwabo mukabaziha, bamina mukabakoleka, pe bamina mukabakama mu mashinangonge enu na kubatanda mu munzi na munzi.

³⁵ Ngayi mukeza nimwawo waba kakwoloka uya wetikilile hanci, bakawushingila hahenu, kubalika na mukeza wa Abele mukakwoloka kuleta ku mukeza wa Zakaliya mwana Mbalakiya, ou mwazihile mukati ka Litala lya Nyambi na shihanda.

³⁶ Mwashikuma nikumitongweza ngayi, byuma nimwabyo ebye bikeza ha shihemunwino eshe!

Yeshu ukulilila Yelushalema

³⁷ “Obe Yelushalema, Yelushalema! Obe mukakuziha bamiluwe na kuyaha mamanya aba banatumiwa kukwobe! Bikati binga nashingile kukungula bana bobe nehe nkazikuku akungulanga bana bendi ku nceto ya mbando zendi, ngoboni kaliha wetabilile.

³⁸ Haya mona, Litala lyobe lya Nyambi likashiyiwa, pe likenga lipembe.

³⁹ Nohobene nikukutongweza ngayi, kukamona ami wufwako, hantu haya ukamba ngayi, ‘Kulemeshiwe ou ukwiza mu lizina lya Mwene.’ ”