Mateo 21 - Kulimama Kwakupya

Yeshu ukwingina mu Yelushalema

¹ Oho bahenyenene kwakwipi na Yelushalema, bezile ku Mbetefwange ku Lipili lya Oliveta, niho Yeshu atumine bandongesha bendi babili

² wabatongwezele ngayi, “Yenunga ku munzi uyo uli kumbili yenu, pe wanguwangu mukawanako mbongolo hinga amangiwa na mwanendi. Mukabamangulule, pe baletenu kuno kukwami.

³ Ndi muntu ukumipula shuma shimo, pe mwambe ngayi, ‘Mwene ulinakubashinga,’ pe ukabatuma wanguwangu.”

⁴ Ebye byatendiwile ngayi kutendiwe eshe ambile muluwe wa Nyambi ngayi,

⁵ “Tongwezenu mwana Ziyone wa mbuyama ngayi, Mona! Mwene yobe ukwiza kukwobe! Na kubomba hinga akandama ha mbongolo, ha kana ka mbongolo.”

⁶ Niho bandongesha bendi bayile, bakatendele nehi abafundizizile.

⁷ Baletele mbongolo na mwanendi, bayalile bivwalo byabo hahabo, niho Yeshu akandamineho.

⁸ Likunge lya bantu bayalile bivwalo byabo mu mukwakwa, bamina bapokwele myahi ya bitondo, bayalile mu mukwakwa.

⁹ Kami makunge a bantu baya bendelenga kumbili ya Yeshu, na baya bendelenga kunyima yendi, babilikizile ngayi, “Hoshana kuli Mwana Ndavita! Kulemeshiwe niye ukwiza mulizina lya Mwene! Hoshana muyilu ya mayilu.”

¹⁰ Oho Yeshu enginine mu Yelushalema, munzi nimwawo bekalile mu nculyanculya, pe bepwile ngayi, “Kati yani ou?”

¹¹ Makunge a bantu bambile ngayi, “Ou niye Yeshu muluwe wa ku Nazaleta mu Ngalileya.”

Yeshu ukutanda bakakulandisha mu Litala lya Nyambi

¹² Yeshu wenginine mu Litala lya Nyambi, watandilile hamunkanda nimwabo baya balandishilenga na baya bakalandilenga mu Litala lya Nyambi. Wawishile zitebulu za bakakucinca mali, na bipona bya bakakulandisha bankilimba.

¹³ Wambile ngayi, “Kwatikitiwa ngayi, ‘Litala lyami likatumbiwa ngayi litala lya kulombelela.’ Ngoboni munalifutulu kwinga liteke lya bezi.”

¹⁴ Tushishitwa na bakupenga mawulu bezile kukwendi mu Litala lya Nyambi, pe wabanyongomanishile.

¹⁵ Ngoboni bakankombela ba bakulwane na bakakulongesha ndayano oho bamonene byuma byabiwahe ebye atendele, na kuyuvwa batwanuke hibabilikiza mu Litala lya Nyambi ngayi, “Hoshana kuli Mwana Ndavita!” Bapilamine shikuma.

¹⁶ Bepwile Yeshu ngayi, “Wakuyuvwa ebye bakwamba aba batwanuke ndi?” Yeshu wakumbwile kukwabo ngayi, “Ee. Kati hinga mwatanga kulaba mazu akwamba ngayi, ‘Mu tunwa twa batwanuke mukufuma kuyemeza kwakuwahe?’ ”

¹⁷ Niho Yeshu abashiyile wayile, wafumine mu munzi, pe wayile ku Mbetani, wakalanganineko.

Yeshu ukukuta mutondo wa mukuyu

¹⁸ Ku lumenemene shikuma, Yeshu oho abokelenga ku Yelushalema, wekalile na nzala.

¹⁹ Wamonene mutondo wa mukuyu kunkumo ya nzila, pe wayileko, ngoboni kaliha wawanineko mikabo ndele mabizi tuhu. Niho ambile ku mutondo uyo ngayi, “Obe mutondo hinga ukayima mikabo kami.” Wanguwangu mutondo walebukile.

²⁰ Oho bandongesha bendi bamonene noho, bakomokele, pe bambile ngayi, “Ou mutondo wa mukuyu unalebuku nahiti na wanguwangu?”

²¹ Pe Yeshu wabakumbwile ngayi, “Mwashikuma nikumitongweza ngayi, ndi muli na kukulupila kwakubula nkani, kukatenda tuhu shuma eshe shinatendiwi ku mutondo wa mukuyu mufwako, ngoboni mukatwesha kwamba ku lipili elye ngayi, ‘Katuka uliyumbile mu liwate,’ pe shikatendiwa.

²² Ndi mukukulupila, mukatambula eshe nimwasho mukanyepa mu malombelo.”

Liyipu lya ha ngovu za Yeshu

²³ Yeshu wenginine mu shipango sha Litala lya Nyambi, bakankombela ba bakulwane na bakulwane ba Bayunda, bezile kukwendi oho alongeshelenga. Pe bepwile ngayi, “Kati ukutenda byuma ebye na ngovu ngani? Kami yani wakupanine eze ngovu?”

²⁴ Yeshu wakumbwile ngayi, “Nami nikumipula liyipu limo, ndi mukunkumbula, pe nikumitongweza eze ngovu nikutenda nazo byuma ebye.

²⁵ Kati kuzubilisha kwa Yowano kwafumine kuti? Kwafumine muyilu, ndi kwafumine ku bantu?” Balikananganine mukati kabo ngayi, “Ndi tukwamba ngayi, ‘Kwafumine muyilu,’ pe niye ukatwipula ngayi, ‘Ndaba ngani mwabulile kumukulupila?’

²⁶ Ngoboni ndi tukwamba ngayi, ‘Kwafumine ku bantu,’ tukutina bantu, ndaba nimwabo bakulimuka ngayi mwashikuma Yowano wengile muluwe.”

²⁷ Bakumbwile Yeshu ngayi, “Kulimuka tufwako” Yeshu wambile kukwabo ngayi, “Nami kami kumitongweza eze ngovu nikutenda nazo byuma ebye nifwako.”

Nguli ya bana babili ba balume

²⁸ “Mukuhanganika nahiti? Muntu wamina wekalile na bana bendi ba balume babili. Watongwezele mwanendi wa mukulwane ngayi, ‘Mwanami, yanga utende milimo mu mfuba yami ya mikabo ya shinyanca lelo.’

²⁹ Niye wakumbwile ngayi, ‘Nakana,’ ngoboni munyima watengulukile, pe wayile.

³⁰ Watongwezele kami mwanendi wa wubili nahiyo. Niye wakumbwile ngayi, ‘Nikuya, tate,’ ngoboni kaliha wayile.

³¹ Kati kukwabo aba babili, ou watendele shamutima wa tatiyendi yani?” Bakumbwile ngayi, “Wa mukulwane.” Yeshu wambile kukwabo ngayi, “Mwashikuma nikumitongweza ngayi bakakutelesha na bakalwiholwiho bakalimeneka kwingina mu Wene wa Nyambi na kumishiya.

³² Ndaba Yowano wezile kukwenu na kumimonesha nzila yakwoloka, ngoboni kaliha mwamukulupilile. Ngoboni bakakutelesha na bakalwiholwiho bamukulupilile. Hinge oho mwamonene eshe, kaliha mwatengulukile na kumukulupila.

Nguli ya bandimi mu mfuba ya shinyanca

³³ “Yuvwenu nguli ya mina, kwekalile mwine litala wamina wakunine mfuba ya shinyanca, wazingwilishileko shipata, wakabile liteke lya kuzongela shinyanca, pe watendeleko katambo kakubingila, niho ayakileko bandimi, pe wayile ku litunga lya kwakutali.

³⁴ Oho shikati shakubuya mikabo shakumine, watumineko bakamilimo bendi ku bandimi ngayi bakashimbeko mikabo.

³⁵ Niho bandimi bakwatile bakamilimo bendi bakamine umo, wamina bamuzihile, pe wamina bamupuhile mamanya.

³⁶ Niho kami atumine bakamilimo bendi babengi kupitakana bakutatika, ngoboni batendele kukwabo ngonehe batendele bakutatika.

³⁷ Ku mamaninino watumine mwanendi kukwabo, wahanganikile ngayi, ‘Bakamupana maleema.’

³⁸ Ngoboni oho bandimi bamonene mwanendi, balyambashanine ngayi, ‘Ou niye ncwana yendi, yekenu tumuzihe mwanga tukashwane likona lyendi.’

³⁹ Niho bamukwatile, pe bamuyumbilile hamunkanda wa mfuba, bamuzihile.”

⁴⁰ Yeshu wabepwile ngayi, “Nohobene oho mwine mfuba akeza, ukatenda nahiti ku bandimi bayo?”

⁴¹ Bamukumbwile ngayi, “Ukaziha baya bandimi bababi, niho ukapanika yiya mfuba ya mikabo ya shinyanca ku bandimi bamina, bayo bakamupana mikabo yendi ha shikati sha kuhoka mikabo.”

⁴² Yeshu wambile kukwabo ngayi, “Kati shilolo mulabe ebye byatikitiwa ngayi, ‘Limanya liya bakanine bakakutenda matala, nilyo linafutuku kwinga limanya lya kushuma lya mu mbango, eshe nisho anatende Mwene, kami shikukomokesha mu meho wetu.’ ”

⁴³ Yeshu wabatongwezele ngayi, “Wene wa Nyambi, ukayangiwa kukwenu, na kupanikiwa ku bantu baya bakuyima mikabo yayiwahe.

⁴⁴ Nimwendi ukawila ha limanya elye ukapokoka, ngoboni ou likawila likamuncancola.”

⁴⁵ Oho bakankombela ba bakulwane na Bafwalishi bayuvwile zinguli za Yeshu, balimukile ngayi nibo akutoya,

⁴⁶ pe bashingile kukwata Yeshu, ngoboni batinine likunge lya bantu, ndaba balimukile ngayi wengile muluwe.