Mateo 15 - Kulimama Kwakupya

Bihemwa bya bakulwane

¹ Niho Bafwalishi bamo na bakakulongesha ndayano, bafumine ku Yelushalema bezile kuli Yeshu, pe bepwile ngayi,

² “Ndabangani bandongesha bobe bakukilukanga bihemwa bya bakulwane? Ndaba bakulya kwakubula kuyowela ku maboko mukufwanina!”

³ Yeshu wabakumbwile ngayi, “Ndabangani nanenu mukukilukanga ndayano za Nyambi na kwombatala bihemwa byenu?

⁴ Ndaba Nyambi wambile ngayi, ‘Lemeeka tatiyobe na mandiyobe,’ kami, ‘Nimwendi wakuhandula tatiyendi hinge mandiyendi mwanga azihiwe.’

⁵ Ngoboni enu mukwamba ngayi, ‘Ndi muntu ukwamba kuli tatiyendi, hinge kuli mandiyendi ngayi, ‘Eshe nimwasho nafwanina kumiyavwa nashipaniki Nyambi,’

⁶ kaliha wafwanina kuyavwa tatiyendi na mandiyendi. Nohobene ndaba ya shihemwa shenu, mwazihi ngovu za lizu lya Nyambi.

⁷ Enu bakashishweka, muluwe Ishaya wengile shiwahe oho alubulwile byenu ngayi,

⁸ ‘Nyambi wambile ngayi, aba bantu bakundemeeka na mivumbo yabo tuhu, ngoboni mitima yabo yili kwakutali nanami.

⁹ Nohobene, kowa nanebye bakundemeshela, ndaba bakulongesha ndayano zinatendiwi ku bantu!’ ”

Byuma bikubipisha muntu

¹⁰ Yeshu wehanine likunge lya bantu kukwendi, wambile kukwabo ngayi, “Nyuvwililenu kami muyuvwishishe.

¹¹ Eshe shikwingina mu kanwa kubipisha muntu shifwako, ngoboni eshe shikututika mu kanwa nisho shikubipisha muntu.”

¹² Niho bandongesha bezile kukwendi, pe bamwipwile ngayi, “Kati hiulimuka ngayi Bafwalishi shinabakoleshe ku mutima aha bayuvwu ebye unamba ndi?”

¹³ Yeshu wakumbwile ngayi, “Mutondo nimwawo abulile kukuna Tate wa muyilu ukazuliwa.

¹⁴ Balehenu, banengi bantwamina ba wushishitwa. Ndi kashishitwa ukutwaminina minendi kashishitwa, pe wubili wabo bakawila mu liteke.”

¹⁵ Niho Pita ambile ngayi, “Tutontwelele eye nguli.”

¹⁶ Yeshu wambile kukwabo ngayi, “Kati nanenu kuyuvwishisha mufwako ndi?

¹⁷ Kati kulimuka mufwako ngayi shuma nimwasho shenginanga mu kanwa, shayanga mu livumo, kami shatutikanga mulutu lwendi?”

¹⁸ Ngoboni ebye byatutikanga mu kanwa byafumanga ku mutima, ebye nibyo bikubipisha muntu.

¹⁹ Ndaba mu mutima wa muntu, nimo mwafumanga bihanganiko byabibi na kuziha na wunjenge na lwiholwiho na wizi na mahalo na lihandu.

²⁰ Ebye nibyo bikubipisha muntu, ngoboni kulya kwakubula kuyowela ku maboko, kubipisha muntu kufwako.”

Kukulupila kwa mbuyama

²¹ Niho Yeshu akatukile kuyo, wayile ku litunga lya Tile naku Shindone.

²² Kwezile mbuyama wa mu Kanana uya wekalile muyo, wabilikizile ngayi, “Mwene, obe Mwana Ndavita, nyuvwileko nceshe, mwanami wa mushimbi uli nakuyanda shikuma na mayimbwe.”

²³ Ngoboni kaliha wamukumbwile hinge lizu limo. Bandongesha bendi bahenyenene kukwendi, pe bamunyepele ngayi, “Mubokeshe, ndaba uli nakutwingila miyoyo.”

²⁴ Niho Yeshu akumbwile ngayi, “Natumiwile tuhu ku bambelele bakuyongala bakalitala lya Ishalela.”

²⁵ Niho mbuyama ezile nakuwila ku mawulu wendi, wambile ngayi, “Mwene, nyavwe!”

²⁶ Yeshu wamukumbwile ngayi, “Kaliha shinafwanini kuyangula bana byakulya na kubiyumbila ku batuwa.”

²⁷ Niye wakumbwile ngayi, “Ingoi Mwene, ngoboni hinge batuwa balyanga ncankuncanku zinapulumukili munceto ya tebulu ya hekulyabo.”

²⁸ Niho Yeshu amukumbwile ngayi, “Obe mbuyama, kukulupila kwobe kwakunene. Kutendiwe kukwobe ebye ukushinga.” Pe ha shikati shiyo bene, mwanendi wa mushimbi wanyongomanine.

Yeshu ukunyongomanisha bantu babengi

²⁹ Yeshu wafumine kuyo, wakulishile ku Liziba lya Ngalileya. Niho akandamine ha lipili, pe wekalile hanci.

³⁰ Makunge amanene a bantu bezile kukwendi, baletele bakakupenga mawulu na tushishitwa na bihole na bakakubula kwamba na babengi bamina, babayakile ku mawulu a Yeshu, pe wabanyongomanishile.

³¹ Nohobene bantu bakomokele, oho bamonene bakakubula kwamba hibamba na bihole bakunyongomana na bakupenga mawulu banakwenda, tushishitwa banakumona, pe balemeshele Nyambi wa Ishalela.

Yeshu ukulisha makulukazi anaa a bantu

³² Yeshu wehanine bandongesha bendi kukwendi, wambile ngayi, “Nili na nceshe hanelye likunge lya bantu, ndaba banekala nanami matena ahatu, haya bafwabyo byakulya. Kushinga ngayi nibabweshe na nzala nifwako, ndaba bakutwesha kulungukila mu nzila.”

³³ Bandongesha bendi bakumbwile ngayi, “Muno mu libelelengwa tukuwana kuti mankende akutwesha kulisha elye likunge lya bantu?”

³⁴ Yeshu wabepwile ngayi, “Muli na mankende anga?” Bakumbwile ngayi, “Mutanu na abili na tuzinci twatushe.”

³⁵ Watongwezele likunge lya bantu ngayi bekale hanci.

³⁶ Niho ashimbile mankende mutanu na abili na zinci, wakambililile kuli Nyambi, wa apabwile, pe wapanikile ku bandongesha bendi, pe bandongesha bendi batapishilile bantu.

³⁷ Nimwabo balile kami bekutile. Oho bamanishile kulya, bandongesha batolele ncankuncanku zashalileko ozo zenzalishile zintumba mutanu na zibili.

³⁸ Obo balile bengile balume makulukazi anaa, kubula kulabako bambuyama na batwanuke.

³⁹ Oho Yeshu apanzanishile likunge lya bantu, wenginine mu wato, pe wayile ku litunga lya Mangandani.