Mateo 13 - Kulimama Kwakupya

Nguli ya mukakukuba

¹ Mutena uyo bene Yeshu watutikile mu litala, wayile mukwikala ha shibumbo sha liziba.

² Ndaba likunge lya bantu lyakungulukilile kukwendi lyengile lyalinene, niho Yeshu enginine mu wato, pe wekalilemo, bantu nimwabo hinga bemana ha shibumbo.

³ Wabatongwezele byuma byabingi na zinguli, pe wambile ngayi, “Mukakukuba wayile na kukuba.

⁴ Pe oho akubilenga, mbuto yamina yawililile mu nzila, tuyoni twezile nakuyilya.

⁵ Mbuto yamina yawililile ha mamanya hakubula limvu lyalingi. Yamenene wanguwangu, ndaba kaliha hekalile limvu lyalingi.

⁶ Pe oho mutena watatumukile, yalebukile, ndaba mipishi yabulile kwingina shikuma, pe mbuto yayumine.

⁷ Yamina yawililile mukati ka mihongela, oho mihongela yakulile yayitintishile.

⁸ Ngoboni mbuto yamina yawililile mu limvu lya wilo, pe yayimine mpeka, yamina yayimine mwanda, yamina yayimine makumi mutanu na limo, na yamina yayimine makumi ahatu.

⁹ Ou uli na matu akuyuvwa, ayuvwe!”

Bihanganiko byekala mu zinguli

¹⁰ Niho bandongesha bezile kuli Yeshu, pe bamwipwile ngayi, “Kati shumangani wambanga na bantu mu zinguli?”

¹¹ Yeshu wabakumbwile ngayi, “Ndaba ngayi kukwenu kunapanikiwi kulimuka ncimpi za Wene wa muyilu, ngoboni nibo kupanikiwa bafwako.

¹² Ndaba muntu ou uli na byuma ukapanikiwa byabingi, ngayi akekale na byabingi shikuma. Ngoboni wakubula shuma ukayangiwa nebye alinabyo.

¹³ Nisho shuma nikwambila kukwabo mu zinguli, ndaba kumona hibamona, ngoboni kumoneshesha bafwako. Hinge ndi bakuyuvwilila, ngoboni kuyuvwa hinge kuyuvwishisha bafwako.

¹⁴ Kukwabo kwatendiwile ebye ambile muluwe wa Nyambi Ishaya ngayi, ‘Mukayuvwa ngoboni kukayuvwishisha mufwako, mukamona ngoboni kukamoneshesha mufwako.

¹⁵ Ndaba mitima ya naba bantu yakubula ngana, matu abo akuzika, kami banazimanana. Kutina hinga bamona na meho wabo, na kuyuvwa na matu wabo, na kuyuvwishisha mu mitima yabo, na kutenguluka mu mitima, ngayi mwanga nibanyongomanishe.’

¹⁶ “Ngoboni meho wenu ali na mfuywezi ndaba akumona, na matu wenu ndaba akuyuvwa.

¹⁷ Mwashikuma nikumitongweza ngayi bamiluwe babengi na bakakwoloka babengi bashingile kumona ebye mukumona ngoboni kaliha babimonene, kami bashingile kuyuvwa ebye mukuyuvwa ngoboni kaliha babiyuvwile.

Yeshu ukutontolola nguli ya mukakukuba

¹⁸ “Nohobene yuvwililenu kutontoloka kwa nguli ya mukakukuba.

¹⁹ Muntu nimwendi ukuyuvwa byambo bya Wene ngoboni ukubula kuyuvwishisha, pe mukawubi ukeza kukwendi na kumuyangula eshe shinakubiwi mu mutima wendi. Unafweke ngonehe mbuto yawililile mu nzila.

²⁰ Mbuto yawililile ha mamanya, yikutontolola muntu ukuyuvwa lizu, wanguwangu ukulitambula na kuwahilila.

²¹ Ngoboni mipishi ufwayo mumwendi, pe ukwikala tuhu kashikati, oho makalikiza na makando akeza ndaba ya lizu, wanguwangu ukushiya kukulupila kwendi.

²² Mbuto yawililile mukati ka mihongela yikutontolola muntu ukuyuvwa lizu, ngoboni kulifulankana bya wumi na bifungo bya kwongeza kwa wuheti, pe bikutintisha lizu, ngayi libule kuyima mikabo.

²³ Ngoboni mbuto yawililile ha limvu lya wilo yikutontolola muntu ou ukuyuvwa lizu na kuliyuvwishisha, pe ukuyima mikabo, umo ukuyima mwanda, wamina makumi mutanu na limo, na wamina makumi ahatu.”

Nguli ya nyawe

²⁴ Yeshu wabatongwezele nguli yamina ngayi, “Wene wa muyilu wenga ngonehe muntu wakubile mbuto yayiwahe mu mfuba yendi.

²⁵ Ngoboni oho bantu balanganine, mukankole wendi wezile, pe wakubile nyawe mukati ka loto, niho ayile.

²⁶ Oho loto lwamenene na kutatika mavumo, nohobene na nyawe kami yamonekele.

²⁷ Bakamilimo bamwine mfuba bezile kukwendi bambile ngayi, ‘Hekulu, kati kaliha wakubile mbuto yayiwahe mu mfuba yobe ndi? Haya nyawe yinafumu kuti?’

²⁸ Wabakumbwile ngayi, ‘Mukankole niye unatende.’ Bakamilimo bendi bamwipwile ngayi, ‘Haya ukushinga ngayi tuye na kuyivukula ndi?’

²⁹ Hekulu wakumbwile ngayi, ‘Byo, kutina oho mukavukula nyawe kampe mukavukwila kumo na loto.

³⁰ Bilehenu nimwabyo bikulile hamo hantu ha shikati sha kuteza. Pe ha shikati sha kuteza nikatongweza bakakuteza ngayi vukulenu taha nyawe muyimange bikuta ngayi yihokeshiwe, ngoboni kungulenu loto muyiyake mu bishete byami.’ ”

Nguli ya mbuto ya mashitandi

³¹ Yeshu wabatongwezele nguli yamina ngayi, “Wene wa muyilu ukufweka ngonehe lupeka lwa mbuto ya mashitandi, luya ashimbile muntu na kulukuna mu mfuba yendi.

³² Lwenga lwalushe ku mbuto nimwayo ya hano hanci yashangiwanga, ngoboni oho yinashangiwi yikukula na kupitakana mbuto nimwayo ya mfuba ku wunene, pe tuyoni tukutendelako mahwa ku myahi yawo.”

Nguli ya mumena

³³ Yeshu wabatongwezele kami nguli yamina wambile ngayi, “Wene wa muyilu ukufweka ngonehe mumena uya ashimbile mbuyama, na kuvuba na muhunga wawingi wa loto kutwala noho watundulukile nimwawo.”

Shaleteshele Yeshu kwamba mu zinguli

³⁴ Yeshu wambile byuma ebye ku likunge lya bantu mu zinguli, kaliha wambile shuma shamina kukwabo kwakubula kuliyavwisha zinguli.

³⁵ Watendele ebye ngayi kutendiwe ebye ambile muluwe ngayi, “Nikayahama mu zinguli, nikashimikila byambo ebye byaholekiwile kufuma kukulengiwa kwa litunga.

Yeshu ukutontolola nguli ya nyawe

³⁶ Niho Yeshu ashiyile likunge lya bantu, Pe wenginine mu litala. Bandongesha bendi bezile kukwendi, pe bambile ngayi, “Tutontwelele nguli ya nyawe na mfuba.”

³⁷ Wabakumbwile ngayi, “Mukakukuba mbuto yayiwahe nengi Mwana Muntu.

³⁸ Mfuba niyo kaye, pe mbuto yayiwahe yinengi bana ba Wene. Ngoboni nyawe niyo bana ba mukawubi,

³⁹ pe mukankole uya wayikubile nengi Shatana. Kuteza nikwo kukotoka kwa kaye, bakakuteza nibo mangeloyi.

⁴⁰ Nohobene nehi bavukulanga nyawe na kuyihokesha mu mundilo, kukenga nahiyo ku kukotoka kwa kaye.

⁴¹ Mwana Muntu ukatuma mangeloyi endi kwiza na kufumisha nimwabo bakakupukalisha na bakakutenda byabibi mu Wene wendi.

⁴² Pe ukabayumbila mu lilungwila lya mundilo, kuyo kukekala kulila na kulikekenya ku mayewe.

⁴³ Niho bakakwoloka bakabyazima ngonehe mutena mu Wene wa Tatiyabo. Ou uli na matu akuyuvwa, ayuvwe!

Nguli ya wuheti wakuholekiwa

⁴⁴ “Kami Wene wa muyilu ukufweka ngonehe wuheti waholekiwile mu mfuba. Oho muntu awuwanine, naniye wawuholekele, pe mukuwahilila kwendi wayile na kulandisha byendi nimwabyo, niho alandile iyo mfuba.

Nguli ya mapela

⁴⁵ “Kami, Wene wa muyilu ukufweka ngonehe mukakulandisha washingilenga mapela amawahe.

⁴⁶ Oho awanine lipela limo lya ndando yayinene, wayile na kulandisha byendi nimwabyo, niho alilandile.

Nguli ya kanyanzi

⁴⁷ “Kami, Wene wa muyilu ukufweka ngonehe kanyanzi kamanyikiwile mu liziba, pe kakwatile zinci zakulishiyashiya.

⁴⁸ Oho kanyanzi kenzalile, bakakushashila bakakokelele ku shibumbo. Niho bekalile hanci, bahatile zinci zaziwahe, pe baziyakile mu bibondo, ngoboni zazibi baziyumbile.

⁴⁹ Kukenga nahiyo ku kukotoka kwa kaye, mangeloyi akaya na kutapulula bababi ku babawahe.

⁵⁰ Pe bakayumbila bababi mu lilungwila lya mundilo, kuyo kukekala kulila na kulikekenya ku mayewe.

Wuheti wawupya na wa mwaka

⁵¹ Yeshu wabepwile ngayi, “Munayuvwishishi ebye nimwabyo ndi?” Bakumbwile ngayi, “Ingoi.”

⁵² Yeshu wambile kukwabo ngayi, “Nohobene mukakulongesha ndayano nimwendi ou ukulongolola wuheti wawupya na wuheti wa mwaka mu mfuma yendi.”

Yeshu ukukaniwa mu Nazaleta

⁵³ Oho Yeshu amanishile kubatongweza eze zinguli nimwazo, wabokele ku munzi wendi.

⁵⁴ Niho atatikile kulongesha bantu mu shinangonge, pe bakomokele, bepwile ngayi, “Kati muntu ou unawana kuti ngana na ngovu zanehe?

⁵⁵ Kati kaliha niye mwana mbazi ndi? Kati mandiyendi kaliha Maliya ndi? Kati Yakoba na Yoshefwa na Shimoni na Yundashi kaliha nibo bakonzobendi ndi?

⁵⁶ Kati bampanzendi kaliha nibo aba tuli nabo muno ndi? Haya ebye nimwabyo unabiwana kuti?

⁵⁷ Niho bamukanine. Yeshu wambile kukwabo ngayi, “Muluwe kutwesha kuwana maleema mu litunga lyendi na mu litala lyendi wufwako ndele kwashenge.”

⁵⁸ Kaliha watendele bikomokesho byabingi kuyo ndaba yakubula kukulupila kwabo.