Mateo 10 - Kulimama Kwakupya

Bantumwana likumi na babili

¹ Yeshu wehanine bandongesha bendi likumi na babili, wabapanine ngovu zakutanda mayimbwe na kunyongomanisha malweli nimwawo na kukola nimwako.

² Awa niwo mazina a bantumwana likumi na babili. Wa kutatika Shimoni (ukutumbiwa Pita) na Anduleu mukonzowendi na Yakoba na mukonzowendi Yowano bana ba Zebende.

³ Fwilipu na Mbatolomewu, Tomashi na Mateo mukakutelesha, Yakoba mwana Alufweya na Tandeya,

⁴ Shimoni wa ku Kanana na Yundashi Ishikalyote ou wabebele Yeshu.

Yeshu ukutuma balikumi na babili

⁵ Oho Yeshu atumine aba balume likumi na babili, wabatongwezele ngayi, “Hinga muya ku Bakamatunga, hinge kwingina mu minzi ya baka Shamaliya.*

⁶ Ngoboni yenunga ku bambelele bakuyongala ba litala lya Ishalela.

⁷ Muye na kushimikila ngayi, ‘Wene wa muyilu uli hahepi.’

⁸ Nyongomanishenu bakakukola, shangulenu bakufwa, nyongomanishenu bakabimakwa, pe kafumishenu mayimbwe. Munatambulu nahiya, panikenu nahiya.

⁹ Hinga mushimba mali a ngolinde, hinge a shiliva, hinge kopa mu mapokoto enu.

¹⁰ Hinga mushimba mpamba ya mpanda, hinge bikobelo bibili, hinge ncangwa, hinge mushako, ndaba mukamulimo ukufwanina kupanikiwa byakulya.

¹¹ “Nimwamo mu munzi hinge mu kanzi mukengina, mwipwizize ndi kuli muntu ukushinga kumitambula, pe mwikale kukwendi hantu mutena wakuya.

¹² Oho mukwingina mu litala, shangwishenu baya balimo.

¹³ Ndi bantu bamuya mu litala kukamitambula bafwako, kumwena kwenu kwikala hahabo kufwako. Ndi kumitambula bafwako, kumwena kwenu kukaboka kukwenu.

¹⁴ Ndi muntu wamina ukabula kumitambula, hinge kubula kuyuvwa mazu wenu, oho mukufuma ku litala liyo hinge mu uya munzi, totomonenu lukungu lwa ku mawulu wenu.

¹⁵ Nikumitongweza kupwisha ngayi ha Mutena wa Kuyata, Nyambi ukayuvwila nceshe shikuma ku bantu ba mu Shondoma na Ngomola kupitakana bantu ba mu munzi uyo.

Kuyandishiwa kwa bantumwana

¹⁶ “Nikumituma ngonehe bambelele mukati ka bambinzi. Nohobene mwinge bakukeya ngonehe mayoka kami mwinge bakubomba ngonehe nkilimba.

¹⁷ Keyenu na bantu, ndaba ngayi bakamitwala ku nkuta, bakamikama mu mashinangonge wabo.

¹⁸ Bakamitwala kami ku batulela na ku bamyene ndaba yami, ngayi winge wupaki kukwabo naku Bakamatunga.

¹⁹ Ngoboni oho bakamitwala na kumiyatisha, hinga mukalikekula ngayi tukamba nahiti. Hashikati shiyo, mukapanikiwa ebye mukambe.

²⁰ Ndaba kaliha enu mukwamba ngoboni Moyo wa Tatiyenu, niwo ukamba mumwenu.

²¹ “Muntu ukabeba kawushinda wendi ku kufwa na tata muntu ukatenda noho kuli mwanendi. Bana bakafutukila bahemi babo, pe bakabazihiwisha.

²² Mukazimbiwa ku bantu nimwabo ndaba ya lizina lyami, ngoboni ou ukazumanana kukuma ku mamaninino niye akapuluke.

²³ Oho bakamiyandisha ku munzi umo, tininenu ku munzi wamina, mwashikuma nikwamba kukwenu ngayi, Mwana Muntu ukeza oho shilolo mumanishe kupita mu minzi nimwayo ya Ishalela.

²⁴ “Kowa ndongesha ukupitakana mulongeshi wendi, kami kowa mukamulimo wakupitakana hekulyendi.

²⁵ Nohobene ndongesha unafwanini kwinga ngonehe mulongeshi wendi, na mukamulimo unafwanini kwinga ngonehe hekulyendi. Ndi banatumbu mutwe wa litala ngayi Mbezebule,* pe bakalitala lyendi bakatumbiwa na mazina amabi shikuma!

Yani wakufwanina kutiniwa

²⁶ “Nohobene hinga mutina bantu, shuma nimwasho shakufwikiwa shikafwikuluka, kami shuma nimwasho shakulimba, shikalimukiwa.

²⁷ Ebye nikumitongweza mu mincimpwe, mukabyambe mwaana ncanana. Ebye mukayuvwa byakuyebetela, kabibilikenu hinga mwemana hayilu ya matala.

²⁸ Hinga mutina aba bakuziha lutu, kami bakubula ngovu zakuziha moyo. Ngoboni yuvwilenu Nyambi bowa ou ukutwesha kunongesha moyo na lutu mu ngehena.

²⁹ Kati tuntungisha tubili kaliha tukulandiwa na kamali kamo ndi? Ngoboni kowa hinge kamo kakawila hanci kwakubula kulimuka Tatiyenu.

³⁰ Hinge huki zaku mitwe yenu zinalabiwi nimwazo.

³¹ Nohobene hinga mutina ndaba mukupitakana tuntungisha twatwingi.

Kulishisha na kukana Kilishitu

³² “Nohobene muntu nimwendi ukunyitabila ku meho a bantu, nami nikamwitabila ku meho a Tate uli muyilu.

³³ Ngoboni ou nimwendi ukunkana ku meho a bantu, nami nikamukana ku meho a Tate uli muyilu.

Kulifutukila kwa bantu ndaba ya Yeshu

³⁴ “Hinga muhanganika ngayi nalete kumwena hano hanci, kaliha nalete kumwena, ngoboni nalete mukwale.

³⁵ Ndaba nalete zimbo, ndumbana ukafutukila tatiyendi, mbuyama ukafutukila mandiyendi, mukazi ukafutukila mukowendi wa mbeleki.

³⁶ Kami bawushinda wa muntu bakenga bamalamo bendi.

³⁷ “Nimwendi ukuhaka tatiyendi hinga mandiyendi kupitakana ami, kufwanina kwinga ndongesha wami wufwako. Nimwendi ukuhaka mwanendi wa ndumbana hinge wa mbuyama kupitakana ami, kufwanina kwinga ndongesha wami wufwako.

³⁸ Nimwendi ou ukubula kushimba shishempakano shendi ngayi mwanga ankonke, kufwanina kwinga ndongesha wami wufwako.

³⁹ Nimwendi ukwezeka kulama wumi wendi niye mwine, ukawuyongesha, ngoboni nimwendi ukuyongesha wumi wendi ndaba yami ukawuwana.

Zincungu

⁴⁰ “Ou ukumitambula ukuntambula, kami ou ukuntambula ukutambula ou wantumine.

⁴¹ Nimwendi ukutambula muluwe wa Nyambi ndaba ngayi nengi muluwe wa Nyambi, ukutambula ncungu ya muluwe wa Nyambi, kami nimwendi ukutambula mukakwoloka ndaba ngayi nengi mukakwoloka, ukatambula ncungu ya wakwoloka.

⁴² Ou nimwendi ukapana hinge nkomoki ya mema akubombola ku umo wa naba babashe ndaba ngayi unengi ndongesha wami, mwashikuma nikumitongweza ngayi uya muntu ukatambula ncungu yendi.”