Mateo 1 - Kulimama Kwakupya

Shihemunwino sha Yeshu Kilishitu

¹ Ou niwo muhoko wa mazina a lihumo lya Yeshu Kilishitu, mwana Ndavita, mwana Abulahama.*

² Abulahama wengile tata Ishake, na Ishake wengile tata Yakobo. Yakobo wengile tata Yunda na bawushinda wendi.

³ Yunda wengile tata Pelizi na Zela mandiyabo wengile Tamale. Pelizi wengile tata Heziloni, Heziloni wengile tata Lamu.

⁴ Lama wengile tata Aminandabe, Aminandabe wengile tata Nahishoni. Nahishoni wengile tata Shalimoni.

⁵ Shalimoni wengile tata Mbowashi, mandiyendi wengile Lahabi. Mbowashi wengile tata Obende, mandiyendi wengile Lute. Obende wengile tata Njeshi.

⁶ Pe Njeshi wengile tata mwene Ndavita. Ndavita wengile tata Sholomoni, mandiyendi wengile mukaza Uliya.

⁷ Sholomoni wengile tata Lehobowami, Lehobowami wengile tata Abiya. Abiya wengile tata Asa,

⁸ Asa wengile tata Yehoshafwati. Yehoshafwati wengile tata Yeholama. Yeholama wengile tata Uziya.

⁹ Uziya wengile tata Yotamo, Yotamo wengile tata Ahazi. Ahazi wengile tata Hezekiya,

¹⁰ Hezekiya wengile tata Manashe. Manashe wengile tata Amoni, Amoni wengile tata Yoshiya.

¹¹ Pe Yoshiya wengile tata Yekoniya na bawushinda wendi, ha shikati shiya batwaliwile mu wuntapwa ku Mbambiloni.

¹² Munyima yakutwaliwa mu wuntapwa ku Mbambiloni, Yekoniya wengile tata Shelatiyele, Shelatiyele wengile tata Zelubabele.

¹³ Zelubabele wengile tata Abiyundi, Abiyundi wengile tata Eliyakimu, Eliyakimu wengile tata Azole,

¹⁴ Azole wengile tata Zandoka. Zandoka wengile tata Akimu, Akimu wengile tata Eliyundi.

¹⁵ Eliyundi wengile tata Eliyazala, Eliyazala wengile tata Matani. Matani wengile tata Yakobo,

¹⁶ Yakobo wengile tata Yoshefwa, ou wengile mukokwa Maliya,* ou wabelekele Yeshu, ukutumbiwa Kilishitu.*

¹⁷ Nohobene kubalika kuli Abulahama kuleta kuli Ndavita kwengile mikoka likumi na inaa, kami kubalika kuli Ndavita kuleta kukutwaliwa mu wuntapwa ku Mbambiloni, kwengile mikoka likumi na inaa. Kami kufuma kukutwaliwa mu wuntapwa, kukuma kushikati shakuhemuwa kwa Kilishitu kwengile mikoka likumi na inaa.

Kuhemuwa kwa Yeshu Kilishitu

¹⁸ Kuhemuwa kwa Yeshu Kilishitu kwekalile nehe. Maliya bamubalikilile kuli Yoshefwa, oho shilolo baliyeke, wawaniwile ngayi uli na livumo lya ku Moyo Wakuyela.

¹⁹ Haya mukokwendi Yoshefwa wengile mulume mukakutenda byakwoloka, kaliha washingile kumuyuvwisha lisheni ku bantu, nohobene wekalile na bihanganiko bya kuleha kumuyeka kuwi.

²⁰ Ngoboni oho ekalile na bihanganiko byanoho, lingeloyi lya Mwene lya limonekeshele kukwendi mu mulo, pe wambile ngayi, “Obe Yoshefwa mwana Ndavita, hinga utina kuyeka mukazobe Maliya. Ndaba eshe shinamwimitishi shakufuma ku Moyo Wakuyela.

²¹ Ukabeleka mwana wa mulume, pe ukamutumba ngayi Yeshu, ndaba niye ukalamwina bantu bendi ku wubi wabo.”

²² Haya ebye nimwabyo byamonekele ngayi kutendiwe ebye ambile Mwene muli muluwe* ngayi,

²³ “Kankanga ukemita, pe ukabeleka mwana wa mulume, pe ukatumbiwa ngayi Emanuwele,” (kutontolola ngayi, “Nyambi uli nanetu”).

²⁴ Oho Yoshefwa apindukile, wayekele Maliya, ngonehe amutongwezele lingeloyi lya Mwene,

²⁵ ngoboni kaliha waliwanine nendi hantu noho abelekele mwanendi wa mulume. Pe Yoshefwa wamutumbile ngayi Yeshu.