Mako 15 - Kulimama Kwakupya

Yeshu bakumutwala kuli Pilato

¹ Ku shikati sha lumenemene shikuma, bakankombela ba bakulwane baliyuvwashanine na bakulwane ba Bayunda na bakakulongesha ndayano na baka Nkuta nimwabo, bamangile Yeshu, pe bamutwalile kuli Pilato.

² Pilato wamwipwile ngayi, “Obe Mwene wa Bayunda ndi?” Yeshu wakumbwile ngayi, “Unamba.”

³ Bakankombela ba bakulwane bamubangilile byabingi,

⁴ pe Pilato wamwipwile kami ngayi, “Bishini ukubula kukumbula shamina? Yuvwa byuma byabingi ebye balinakwamba hahobe!”

⁵ Ngoboni Yeshu kaliha wamukumbwile, nohobene Pilato wakomokele.

Yeshu ukuyatiwila lufu

⁶ Ha Shimbo nimwasho sha Kupitilila, shengile shiheka sha Pilato shakushobola kayili umo ou bantu bashingilenga.

⁷ Ha shikati shiyo mulume wa lizina lya Mbalambashi wekalile mu tolongo, na bantu baya bamangiwile hamo nendi ndaba ya mulandu wa mponde ha shikati oho kwekalile mushunga.

⁸ Likunge lya bantu lyezile mukunyepa Pilato ngayi abatendele ngonehe abatendelanga.

⁹ Niho Pilato abepwile ngayi, “Mukushinga ngayi nimishobolwele Mwene wa Bayunda ndi?”

¹⁰ Pilato walimukile ngayi bakankombela ba bakulwane bali na mwili na Yeshu, niho banamulete kukwendi.

¹¹ Ngoboni bakankombela ba bakulwane bahongele likunge lya bantu ngayi mwanga Pilato abashobolwele Mbalambashi.

¹² Pilato kami wambile kukwabo ngayi, “Kati ou muntu munatumbu ngayi Mwene wa Bayunda, haya nimutende nahiti?”

¹³ Babilikizile ngayi, “Mukoleke!”

¹⁴ Pilato wabepwile ngayi, “Kati unatende mulandu ngani?” Ngoboni babilikizile shikuma ngayi, “Mukoleke!”

¹⁵ Nohobene Pilato washingile kuwahililisha likunge lya bantu, wabashobolwelele Mbalambashi, pe wabapanine Yeshu oho amanishile kumuzipola ngayi bamukoleke.

Bakanzita bakukumangiza Yeshu

¹⁶ Bakanzita batwalile Yeshu mu mbanza ya mu musheke, niho bakungwile kanzunga nimwako ka bakanzita.

¹⁷ Bamuvwikile shivwalo sha wuhombo, batendele munana wa mihongela, niho bawuyakile ku mutwe wendi.

¹⁸ Pe batatikile kumukumangiza ngayi, “Uyoye myaka yayingi obe mwene wa Bayunda!”

¹⁹ Bamukamine ku mutwe na litete, bamufwizilile mate, pe bashungumanine ku manungo na kumulemesha.

²⁰ Oho bamanishile kumukumangiza, bamuvulile shivwalo sha wuhombo, niho bamuvwikile shivwalo shendi, pe bamutwalile na kumukoleka.

Yeshu bakumukoleka ha shishempakano

²¹ Ha nzila baliwanine na muntu wamina wa lizina lya Shimoni, wapitilenga kufuma ku tuminzi, pe bakanzita bamukandamikile ngayi ashimbe shishempakano sha Yeshu. (Shimoni wa ku Shilene wengile tata Alekizanda na Lufushi.)

²² Batwalile Yeshu ku mbalila yatumbiwa ngayi Ngolongota, kutontolola ngayi, “Mbalila ya Kangawe.”

²³ Bamupanikile waine yakuvwela na mila ngayi anwe, ngoboni kanwineha.

²⁴ Niho bamukolekele, pe balitapishilile bivwalo byendi. Bakunine nyela, ngayi balimuke eshe akushimba muntu na muntu.

²⁵ Bamukolekele ku lumenemene ha shikati sha wumutanu na binaa.

²⁶ Mazu a mulandu awa bamuyatile nawo, atikitiwile ngayi, “Mwene wa Bayunda.”

²⁷ Bakolekele hamo nendi bezi babili, umo ku shilyo shendi, wamina ku shimoho.

²⁸ Nohobene kwatendiwile byatikitiwile ngayi, “Unalabiwi hamo na bakawubi.”

²⁹ Kami baya bapitilenga mu nzila, bamukumangizile, kami banengokeshele mitwe yabo, bambile ngayi, “Ahaa! Obe ukutwesha kushiwula Litala lya Nyambi, na kulitenda kami mu matena ahatu!

³⁰ Haya lilamwine obe mwine, mwanga ufume ha shishempakano.”

³¹ Nohobene, bakankombela ba bakulwane na bakakulongesha ndayano bamukumangizile, pe bambilenga ngayi, “Walamwininenga baminendi, ngoboni kutwesha kulilamwina niye mwine wufwako!

³² Haya tukumona ou Kilishitu, Mwene wa Ishalela, ndi ukufuma ha shishempakano shawuluno, pe tukukulupila mumwendi!” Baya bakolekiwile hamo nendi nanibo kami bamuhandwile.

Lufu lwa Yeshu

³³ Mutena wakumine hakati ka mutwe, kwekalile mincimpwe mu litunga nimwalyo yiya yamanishile bikati bihatu.

³⁴ Shikati sha wulikumi na mutanu, Yeshu wabilikizile na lizu lyalinene ngayi, “Eloi, Eloi, lama sabakatani?” Kutontolola, “Nyambi yami, Nyambi yami, unanciyili bishini?”

³⁵ Bamo baya bemanine kuyo, oho bayuvwile ebye, bambile ngayi, “Yuvwenu, ulinakwihana Eliya!”

³⁶ Umo kukwabo wetukile na kuzabika shiponci mu waine yakushasha, washiyakile ku litete niho apanikile Yeshu ngayi anwe. Pe wambile ngayi, “Mulehenu! Tumone ndi Eliya ukwiza na kumufumisha ha shishempakano!”

³⁷ Yeshu wabilikizile kami na lizu lyalinene, pe wafwile.

³⁸ Niho likwiza lya mu wumbo lyekalilenga mu Litala lya Nyambi lyatabukile hakati, kufuma kuyilu kutwala kunceto.

³⁹ Mukulwane wa bakanzita, ou wemanine hahepi na shishempakano, oho ayuvwile Yeshu eshe abilikizile na kumona eshe afwile, wambile ngayi, “Mwashikuma ou muntu wengile Mwana Nyambi!”

⁴⁰ Kwekalile kami bambuyama baya bapenzelenga hinga bemana kwakutali, hakati kabo hekalile Maliya wa ku Mangandalena na Shalome na Maliya manda Yakoba wa kanuke na Yoshesha.

⁴¹ Nibo bengile bakakukonka Yeshu oho ekalilenga mu Ngalileya, kami bamuyavwilenga. Kwekalile kami na bambuyama babengi baya bezile nendi ku Yelushalema.

Kufundiwa kwa Yeshu

⁴² Oho kwengile mazolo ha Mutena Wakuliwahishila bya Mutena Wakukatala,

⁴³ Yoshefwa wa ku Alimatiya, umo wa babilolo ba nkuta ya Bayunda,* uya watatililenga Wene wa Nyambi, wayile na mutima wa kukanca kuli Pilato na kulomba mutuntu wa Yeshu.

⁴⁴ Pilato wakomokele oho ayuvwile ngayi Yeshu wafwakale. Niho ehanine mukulwane wa bakanzita, pe wamwipwile ngayi ayuvwe ndi Yeshu unafu.

⁴⁵ Oho mukulwane amutongwezele ngayi unafu, Pilato watongwezele Yoshefwa ngayi ashimbe mutuntu.

⁴⁶ Pe Yoshefwa walandile likwiza lyaliwahe, wafumishile mutuntu ha shishempakano, wawuvungilile mu likwiza, niho awulangikile mu shinzimbi shakabiwile mu limanya. Pe wandumwinine limanya ku shipana sha shinzimbi.

⁴⁷ Maliya wa ku Mangandalena na Maliya manda Yoshesha bamonene omu balangikile mutuntu wa Yeshu.