Mako 1 - Kulimama Kwakupya

Kushimikila kwa Yowano Mukakuzubilisha

¹ Kuno niko kutatika kwa ncango zaziwahe za Yeshu Kilishitu, Mwana Nyambi.

² Nehe atikitile muluwe Ishaya ngayi, “Nyambi wambile ngayi, ‘Nikatuma ntumwana wami kumbili yobe, ou ukawahisha nzila yobe.’

³ Lizu lya mukakubilika mu libelelengwa ngayi, ‘Wahishenu mukwakwa wa Mwene, ololenu zinzila zendi.’ ”

⁴ Nohobene Yowano Mukakuzubilisha waholokele mu libelelengwa, washimikililenga ku bantu ngayi, “Tengulukenu mu mitima, pe muzubilishiwe, ngayi Nyambi amiyatile wubi wenu.”

⁵ Bakalitunga lya Yundeya na bantu ba mu Yelushalema nimwabo bayile kukwendi na kulitabila wubi wabo, pe wabazubilishile mu Mushinzi wa Yondana.

⁶ Yowano wavwalile bivwalo bya wushako wa kamela na mukunzi wa shitembe mu lukanda, walilenga mikumbi na wushi.

⁷ Washimikilenga ngayi, “Munyima yami mukwiza wamunene wakumpitakana, kami kufwanina kushungumana na kushobola mishulo ya makatulo wendi nifwako.

⁸ Nikumizubilisha na mema, ngoboni niye ukamizubilisha na Moyo Wakuyela.”

Kuzubilishiwa na kwezekiwa kwa Yeshu

⁹ Mu matena ayo, Yeshu wafumine ku Nazaleta mu litunga lya Ngalileya, niho Yowano amuzubilishile mu Mushinzi wa Yondana.

¹⁰ Wanguwangu oho afumine mu mema, wamonene liyilu linashinkuluku, na Moyo Wakuyela wakufweka ngo litela washulumukile hahendi.

¹¹ Pe lizu lyafumine muyilu lyambile ngayi, “Obe Mwanami nahaka, ukungwahililisha shikuma.”

¹² Niho wanguwangu Moyo wa Nyambi wamutwalile mu libelelengwa.

¹³ Yeshu wekalile mu libelelengwa matena makumi anaa, muyo Shatana wamwezekele. Wekalile mukati ka twanzama, kami mangeloyi amutendelele milimo.

Yeshu ukwihana bakakushashila banaa

¹⁴ Yowano oho ayakiwile mu tolongo, Yeshu wayile ku Ngalileya na kushimikila ncango zaziwahe za Nyambi.

¹⁵ Wambilenga ngayi, “Shikati shakumakale, Wene wa Nyambi uli hahepi. Tengulukenu ku wubi wenu, pe kulupilenu ncango zaziwahe.”

¹⁶ Oho Yeshu akulishilenga ku Liziba lya Ngalileya, wamonene Shimoni na mukonzowendi Anduleu, hibamanyika tunyanzi twabo mu liziba.

¹⁷ Niho Yeshu abatongwezele ngayi, “Nkonkenu, nikaminga bakakushashila bantu.”

¹⁸ Hohobene bashiyile tunyanzi twabo, bamukonkele.

¹⁹ Yeshu wayile kumbili shashishe, wamonene bana ba Zebende babili, Yakoba na mukonzowendi Yowano, hinga bekala mu wato hibatungulula tunyanzi twabo.

²⁰ Wanguwangu oho abamonene wabehanine, bashiyile tatiyabo Zebende na bakakubayavwa hinga bekala mu wato, pe bamukonkele.

Yeshu ukufumisha mayimbwe

²¹ Yeshu na bandongesha bendi bayile ku munzi wa Kapenauma, ha Mutena Wakukatala Yeshu wenginine mu shinangonge, watatikile kulongesha.

²² Bantu obo bamuyuvwile bakomokele shikuma kulongesha kwendi, ndaba wabalongeshele na ngovu kupitakana bakakulongesha ndayano.

²³ Wanguwangu mu shinangonge mwezile muntu wa mayimbwe, wabilikizile ngayi,

²⁴ “Obe Yeshu wa ku Nazaleta, ukushinga kututenda bishini? Kati unezi mukutunongesha ndi? Tukukulimuka ngayi, obe wenga mukakuyela wa Nyambi!”

²⁵ Ngoboni Yeshu wakalihilile mayimbwe ngayi, “Mwenenu! Fumenu mumwendi!”

²⁶ Mayimbwe anyukwile uyo muntu shikuma, abilikizile na lizu lyalinene, pe afumine mumwendi.

²⁷ Bantu nimwabo bakomokele, niho balipwile mukati kabo ngayi, “Kati shumangani eshe? Kulongesha oku kwakupya kwanahiti? Ndaba ukukalihila mayimbwe na ngovu, pe niwo akumwombatala!”

²⁸ Niho mpupo ya Yeshu yatumbalalile na wanguwangu mu litunga nimwalyo lya Ngalileya.

Yeshu ukunyongomanisha bantu babengi

²⁹ Yeshu watutikile mu shinangonge, wayile hamo na Yakoba na Yowano ku litala lya Shimoni na Anduleu.

³⁰ Ngoboni mukowendi Shimoni wa mbeleki walanganine ndaba ya kukola mashikashika. Yeshu oho akumine kuyo bamutongwezele bya kukola kwa mukowendi Shimoni.

³¹ Wayile kukwendi, wamukwatile ku liboko, wamupindwile. Mashikashika amumanine, pe wabatendelele bya kulya.

³² Mazolo oho mutena walelakale, bantu baletele bakakukola nimwabo na bakamayimbwe kuli Yeshu.

³³ Bantu nimwabo ba mu munzi bakungulukile ku shipana sha litala liyo.

³⁴ Wanyongomanishile babengi bakolelenga malweli akulishiyashiya, kami watandile mayimbwe amengi. Ngoboni kaliha wetabilile ngayi aya mayimbwe ambe kukwendi ndaba amulimukile.

Yeshu ukushimikila mu Ngalileya

³⁵ Oho kwashile lumenemene shikuma, Yeshu wapindukile. Watutikile mu litala, wayile mukulombela ku mwanya wa ninkayendi.

³⁶ Pe Shimoni na baminendi bayile na kumushingashinga.

³⁷ Bamuwanine, bambile kukwendi ngayi, “Bantu nimwabo balinakukushinga.”

³⁸ Wambile kukwabo ngayi, “Tuyenunga ku minzi yamina ili hahepi, nikashimikileko kami ndaba niwo mulimo nezilile.”

³⁹ Nohobene wayilenga mu Ngalileya nimwamo mukushimikila mu mashinangonge na kutanda mayimbwe.

Yeshu ukunyongomanisha mulume wa bimakwa

⁴⁰ Muntu wakolelenga bimakwa wezile kuli Yeshu, washinkamine na kulambilila kukwendi ngayi, “Ndi ukushinga, ukutwesha kunyongomanisha.”

⁴¹ Yeshu wamuyuvwilile nceshe, wolwele liboko lyendi wamukwatile, pe wamukumbwile ngayi, “Nikushinga, nyongomana!”

⁴² Oho ambile noho, mukabimakwa wanyongomanine.

⁴³ Yeshu wamutongwezele ngayi aye, niho amutintikile,

⁴⁴ pe wambile kukwendi ngayi, “Hinga ushimikila ebye ku muntu hinge umo. Ngoboni yanga kuli mukankombela akakumone, pe ukatupule ntupu ngo mwayila Ndayano za Moshesha, akakumoneshe ku muntu nimwendi ngayi unanyongomana.”

⁴⁵ Ngoboni uyo muntu wayile, watatikile kushimikila nimwako na kutumbalalisha shuma eshe. Ndaba yaneshe, Yeshu kaliha watweshele kwingina mu munzi mwana ncanana. Wekalile kwaninkayendi, hinge noho bantu bafumine ku zimbalila nimwazo bamukonkele.