Luka 9 - Kulimama Kwakupya

Yeshu ukutuma bandongesha likumi na babili

¹ Yeshu wehanine bandongesha likumi na babili hamo, wabapanine nyala na ngovu zakufumisha mayimbwe nimwawo na kunyongomanisha malweli.

² Niho abatumine mukushimikila bya Wene wa Nyambi, na kunyongomanisha bakakukola.

³ Wambile kukwabo ngayi, “Hinga mushimba shuma ha lwendo lwenu, hinge mushako, hinge shipawupawu, hinge linkende, hinge mali, hinge bikobelo bibili.

⁴ Mu litala nimwalyo omu mukengina, yikalenumo kutwala mutena wakuya.

⁵ Nimwendi ou ukabula kumitambula, oho mukufuma ku munzi uyo, totomonenu lukungu ku mawulu wenu kwinga wupaki kukwabo.”

⁶ Bandongesha bayile, pe bapitile mu minzi nimwayo na kushimikila ncango zaziwahe, kami banyongomanishile bantu nimwako.

Helonda ukuluwangana

⁷ Oho Helonda kalela wa mu Ngalileya ayuvwile byuma nimwabyo byatendiwilenga, waluwanganine ndaba bamo bantu bambile ngayi, “Yowano Mukakuzubilisha unashanguku ku bafu.”

⁸ Bamina bambilenga ngayi, “Eliya unaholoko,” kami bamina ngayi, ‘Umo wa bamiluwe ba Nyambi ba mwaka nashanguku ku bafu.”

⁹ Helonda wambile ngayi, “Yowano namuketwile mutwe, ngoboni yani ou nikuyuvwa byuma byanehe?” Pe washingile ngayi amone Yeshu.

Yeshu ukulisha makulukazi mutanu a bantu

¹⁰ Oho bantumwana babokele, bamutongwezele byuma nimwabyo ebye bakatendele. Niho ayile nabo kwaninkayabo ku munzi watumbiwile ngayi Mbeteshayinda.

¹¹ Oho likunge lya bantu balimukile, bamukonkele. Yeshu wabatambwile, pe wabatongwezele bya Wene wa Nyambi, kami wanyongomanishile bakakukola.

¹² Oho mutena walelelenga, bantumwana likumi na babili bezile kukwendi nakwamba ngayi, “Tongweza likunge baye ku minzi na ku mafuba bakawaneko byakulya na kwakulangana ndaba kuno tuli kwakubula bantu.”

¹³ Ngoboni Yeshu wambile kukwabo ngayi, “Bapanenu byakulya.” Bakumbwile ngayi, “Tuli tuhu na mankende mutanu na zinci zibili. Ukushinga ngayi tuye na kulanda byakulya byanelye likunge nimwalyo ndi?”

¹⁴ (Kwekalile balume bakushinga kulingana makulukazi mutanu.) Yeshu wambile ku bandongesha bendi ngayi, “Bekalikenu hanci mu tunzunga twa bantu makumi mutanu.”

¹⁵ Bandongesha batendele noho, bekalikile bantu hanci.

¹⁶ Niho Yeshu atambwile mankende mutanu na zinci zibili, watilaminine kuyilu, wakambilile kuli Nyambi, pe waapabwile. Wapanine bandongesha bendi ngayi batapishile bantu.

¹⁷ Nimwabo balile, kami bekutile. Bandongesha benzalishile zintumba likumi na zibili za ncankuncanku za mankende na zinci.

Pita ukutontolola Yeshu

¹⁸ Mutena wamina oho Yeshu alombelenga ninkayendi, bandongesha bezile kukwendi, pe wabepwile ngayi, “Kati makunge a bantu bakwamba ngayi ami yani?”

¹⁹ Bakumbwile ngayi, “Bamo bakwamba ngayi Yowano Mukakuzubilisha, bamina bakwamba ngayi obe Eliya, kami bamina bakwamba ngayi, umo wa bamiluwe ba Nyambi ba mwaka unashanguku.

²⁰ Yeshu wabepwile ngayi, “Haya enu mukwamba ngayi ami yani?” Pita wakumbwile ngayi, “Obe Kilishitu wa Nyambi.”

Yeshu ukwamba bya makando na lufu lwendi

²¹ Yeshu wabakanishile shikuma ngayi, hinga batongwezako muntu umo eshe shuma.

²² Wambile ngayi, “Mwana Muntu ukufwanina kuyandishiwa shikuma na kukaniwa ku bakulwane ba Bayunda na bakankombela ba bakulwane na bakakulongesha ndayano, kami ukazihiwa, pe ukashanguka munyima ya matena ahatu.”

²³ Wambile kukwabo nimwabo ngayi, “Muntu nimwendi ukushinga kunkonka, alihupwize niye mwine, ashimbe shishempakano shendi ha mutena ha mutena, pe ankonke.

²⁴ Ndaba nimwendi ukushinga kupulwisha wumi wendi ukauyongesha, ngoboni nimwendi ukuyongesha wumi wendi ndaba yami ukaupulwisha.

²⁵ Kati muntu ukuwanaho bihi ndi ukuheta byuma nimwabyo bya mu litunga ngoboni hakuliyongesha hinge kulizimba niye mwine?

²⁶ Ndaba nimwendi ukanyuvwila lisheni na mazu wami, Mwana Muntu ukamuyuvwila lisheni oho akeza mu wuwahe wendi na mu wuwahe wa Tate na wa mangeloyi akuyela.

²⁷ Ngoboni nikumitongweza kupwisha ngayi, kubali bamo kuno kukafwa bafwako, hantu banamono Wene wa Nyambi.”

Yeshu ukufutuka kubyazima

²⁸ Munyima ya matena mutanu na ahatu kufuma oho ambile byuma ebye, Yeshu wapitwile Pita na Yowano na Yakoba, pe wakankalalile nabo ku lipili na kulombela.

²⁹ Oho alombelelenga, shifwekesha sha lupala lwendi shafutukile, na bivwalo byendi byabyazimile too.

³⁰ Hohobene kwamonekele balume babili bambwelenga nendi. Bengile Moshesha na Eliya,

³¹ obo baholokele mu wuwahe wa muyilu, pe bambwelenga na Yeshu bya lufu lwendi olwo akafwanina kukafwa ku Yelushalema.

³² Ngoboni Pita na baya bekalile nendi bakunokele tulo. Oho batonene bamonene wuwahe wendi, kami unemana na balume babili.

³³ Oho baya balume balitapile na Yeshu, Pita wambile kukwendi ngayi, “Hekulu, shashiwahe ngayi twikale kuno tutende makunka ahatu, limo linge lyobe, lyamina lya Moshesha na lyamina linge lya Eliya.” (Pita kaliha walimukile ebye ambilenga.)

³⁴ Oho Pita ushili kwamba likumbi lyezile lyabafwikile, pe bandongesha batinine oho likumbi lyabafwikile.

³⁵ Mwafumine lizu mu likumbi lyambile ngayi, “Ou niye Mwanami wakuhakiwa, muyuvwililenu!”

³⁶ Oho lizu lyamwenene, Yeshu wekalile ninkayendi. Bandongesha bamwenene ha matena ayo, kaliha batongwezele muntu umo byuma ebye bamonene.

Yeshu ukunyongomanisha ndumbana wekalile na mayimbwe

³⁷ Oho kwashile, Yeshu na bandongesha bahatu bakunkulukilenga kufuma ha lipili, likunge lyalinene lya bantu lyalihanganine nendi.

³⁸ Mulume umo mukati ka likunge wabilikizile ngayi, “Mulongeshi! Nikulomba ngayi utilamine hali mwanami ndumbana, ndaba wenga mwanami umo tuhu.

³⁹ Mayimbwe oho amukwatanga, amukalokeshanga na kumushundanisha, hantu natupulu kafulututu ku kanwa, kami kaliha amushiyanga tuhu ndele anamulemeke.

⁴⁰ Nalombo bandongesha bobe ngayi bawafumishe, ngoboni shilolo bawatweshe.”

⁴¹ Yeshu wakumbwile ngayi, “Enu mukoka wakubula kukulupila na mashewinizi! Nikekala nenu shikati shakukuma hati? Nikalilumikila nenu shikati shakukuma hati? Leta mwanobe kuno.”

⁴² Oho ndumbana ezilenga, mayimbwe amuwishilile hanci amushundanishile. Yeshu wambilile mayimbwe, wanyongomanishile ndumbana, niho amutwalile kuli tatiyendi.

⁴³ Bantu nimwabo bakomokele ngovu zazinene za Nyambi. Oho bantu bashili kukomoka byuma nimwabyo atendele Yeshu, wambile ku bandongesha bendi ngayi,

Yeshu ukwamba kami bya ha lufu lwendi

⁴⁴ “Yuvwililenu shiwahe kunebye nikumitongweza! Mwana Muntu ukapanikiwa mu maboko a bantu.”

⁴⁵ Ngoboni bandongesha babulile kuyuvwishisha eshe abatongwezele ngayi shikuntontolola bishini. Shaholekiwile kukwabo mwanga babule kushiyuvwishisha, kami batinine kumwipula ha byuma ebye.

Yani wamunene shikuma?

⁴⁶ Bandongesha batatikile kulikananganisha mukati kabo ngayi yani eze akenge wamunene shikuma mukati kabo.

⁴⁷ Yeshu walimukile ebye bahanganikilenga mu mitima yabo, wehanine kanuke wamushe wamuyakile ku ntungi yendi.

⁴⁸ Niho ambile kukwabo ngayi, “Ou nimwendi ukatambula kanuke ou mu lizina lyami natambulu ami. Kami ou nimwendi unatambulu ami, natambulu ou wantumine, ndaba ou ukwinga wamushe shikuma kukwenu nimwenu, niye ukenga wamunene.”

Nimwendi ukubula kumilwisha niye wenu

⁴⁹ Yowano wakumbwile ngayi, “Hekulu, twamonene mulume wafumishanga mayimbwe mu lizina lyobe, niho twamukanishile, ndaba kaliha nengi umo wetu.”

⁵⁰ Yeshu wambile ngayi, “Kaliha mwafwanina kumukanisha, ndaba nimwendi ukubula kumilwisha niye wenu.

Munzi wa Shamaliya ukukana kutambula Yeshu

⁵¹ Oho shikati shakumine ngayi Yeshu atambuliwe muyilu, wapenzele lupala lwendi kuya ku Yelushalema.

⁵² Watumine bantumwana kumbili yendi, baya bayile na kwingina mu munzi umo wa mu Shamaliya, mukumubalakanyina.

⁵³ Ngoboni bantu kaliha bamutambwile, ndaba wekalile ha lwendo lwakuya ku Yelushalema.

⁵⁴ Oho bandongesha bendi Yakoba na Yowano bamoneneko, bambile ngayi, “Mwene, ukushinga ngayi twihane mundilo kufuma kuyilu kwiza na kubahokesha ngonehe atendele Eliya ndi?”

⁵⁵ Ngoboni Yeshu wafutukile, niho abakalihilile, wambile ngayi, “Kulimuka mufwako ngayi bihanganiko byenu bya nahiti? Ndaba Mwana Muntu kaliha wezile mukunongesha wumi wa bantu ngoboni mukubapulwisha.”

⁵⁶ Niho Yeshu na bandongesha bendi bayile ku munzi wamina.

Obo bakakonka Yeshu

⁵⁷ Oho bayilenga mu nzila, muntu wamina wambile kuli Yeshu ngayi, “Nikakukonka, oku ukaya nimwako.”

⁵⁸ Yeshu wakumbwile ngayi, “Bamimbwe bali na mateke na tuyoni tuli na mahwa, ngoboni Mwana Muntu wufwaho hakuhamina mutwe wendi.”

⁵⁹ Wambile ku wamina ngayi, “Nkonke.” Ngoboni niye wambile ngayi, “Mwene, ndehe taha niye nikafunde batate.”

⁶⁰ Ngoboni Yeshu wambile kukwendi ngayi, “Leha bafu bafunde bafu babo, ngoboni obe yanga na kushimikila Wene wa Nyambi.”

⁶¹ Wamina kami wambile ngayi, “Nikakukonka Mwene, ngoboni ndehe taha niye mukulaya ku litala lyami.”

⁶² Yeshu wambile kukwendi ngayi, “Kowa muntu unakwata ku shikekele unakulima, pe hakushetuka kunyima kufwanina mu Wene wa Nyambi wufwako.”