Luka 6 - Kulimama Kwakupya

Liyipu lya ha Mutena Wakukatala

¹ Yeshu wapitile mu mafuba a loto ha Mutena Wakukatala. Bandongesha bendi oho bendelenga nendi batatikile kupulula loto bainyokoshelenga mu maboko hibalya.

² Bafwalishi bamo bambile ngayi, “Kati ndabangani mukutenda byuma byakubula kufwanina ha Mutena Wakukatala?”

³ Yeshu wabakumbwile ngayi, “Hinga mwatanga shilolo mulabe eshe atendele Ndavita, oho niye na bantu bendi bekalile na nzala?

⁴ Wenginine mu Litala lya Nyambi, watolele mankende ayo atupuliwile kuli Nyambi, pe walile, kami wapanineko na bantu bendi. Ngoboni kaliha zengile ndayano zetu ngayi muntu nimwendi alye ayo mankende ndele tuhu bakankombela.”

⁵ Niho Yeshu ambile kukwabo ngayi, “Mwana Muntu niye Mwene wa Mutena Wakukatala.”

Mulume wa kunyata liboko

⁶ Ha Mutena Wakukatala wamina, Yeshu wenginine mu shinangonge na kulongesha. Mwekalile mulume wa kunyata liboko lya shilyo.

⁷ Bakakulongesha ndayano na Bafwalishi bamutilaminine na kushinga kumoneshesha ndi ukumunyongomanisha ha Mutena Wakukatala, ngayi mwanga bamubangilile byambo.

⁸ Ngoboni Yeshu walimukile bihanganiko byabo, wambile ku mulume ou wekalile na liboko lya kunyata ngayi, “Katuka wimane kumbili ya bantu nimwabo.” Mulume wakatukile, pe wemanine kuyo.

⁹ Niho Yeshu ambile kukwabo ngayi, “Nikumipula ngayi, kati ndayano zikwitabilisha kutenda biti ha Mutena Wakukatala? Tunafwanini kutenda byabibi? Hinge ndi tunafwanini kulamwina wumi ndi kuziha?”

¹⁰ Yeshu wabaconcomekele nimwabo, pe wambile ku mulume ngayi, “Olola liboko lyobe.” Wolwele liboko lyendi, pe lyapolele.

¹¹ Ngoboni nimwabo bapilamine shikuma, niho batatikile kulyambashana umo na wamina eshe banafwanini kutenda Yeshu.

Yeshu ukuhata bantumwana likumi na babili

¹² Ha shikati shiyo Yeshu wayile ku lipili mukulombela, pe wakonkamine wushiku nimwawo na kulombela kuli Nyambi.

¹³ Oho kwashile, wehanine bandongesha bendi, pe wahatile ba likumi na babili baya atumbile ngayi bantumwana.

¹⁴ Bengile Shimoni (ou Yeshu atumbile Pita) na Anduleu mukonzowendi, Yakoba na Yowano, Fwilipu na Mbatolomewu,

¹⁵ Mateo na Tomashi, Yakoba mwana Alufweya na Shimoni Kazeloti,

¹⁶ Yundashi mukonzo wa Yakoba na Yundashi Ishikalyote ou wengile mukakumubeba.

Yeshu ukulongesha na kunyongomanisha

¹⁷ Yeshu oho akunkulukile kufuma kulipili hamo na bandongesha bendi, wemanine ha mbuwa. Kuyo kwekalile likunge lya bandongesha bendi na bantu babengi baya bafumine ku Yundeya na ku Yelushalema na ku shibumbo sha hahepi na Tile na Shindoni.

¹⁸ Nibo bezile mukuyuvwa mazu wendi na kunyongomanishiwa ku malweli wabo. Na baya bayandile na mayimbwe nabo banyongomanine.

¹⁹ Bantu nimwabo bashingile kumukwata, ndaba kwafumine ngovu kukwendi, pe wabanyongomanishile nimwabo.

Mfuywezi na winga

²⁰ Yeshu wayimbwile meho wendi ku bandongesha bendi, wambile ngayi, “Muli na mfuywezi enu bakakushepwa, ndaba Wene wa Nyambi ukenga wenu!

²¹ “Muli na mfuywezi enu muli na nzala wuluno, ndaba mu kekuta! Muli na mfuywezi enu mukulila wuluno, ndaba mukahepa!

²² “Muli na mfuywezi oho bantu bakamizimba, oho bakamikana na kumitukana na kubipisha lizina lyenu ndaba ya Mwana Muntu.

²³ Wahililenu ha mutena uyo na kutangala ndaba ncungu yenu yikenga yayinene muyilu. Ndaba ebye nibyo batendele batatizabo ku bamiluwe ba Nyambi.

²⁴ “Ngoboni makando wenu bakakuheta, ndaba munatambulu kubengezeka kwenu!

²⁵ “Makando wenu enu munekutu, ndaba mukekala na nzala! Makando wenu enu mukuhepa wuluno, ndaba mukalila na kuyena!

²⁶ “Makando wenu oho bantu nimwabo bakamba shiwahe hahenu, ndaba eshe nisho batendele batatizabo ku bamiluwe ba mahalo.

Kuhaka bakankole

²⁷ “Ngoboni nikwamba kukwenu enu mukunyuvwa. Hakenu bakankole benu, tendenu shiwahe baya bakumizimba.

²⁸ Tandalishenu baya bakumitukana, kami lombelelenu baya bakumiyandisha.

²⁹ Ndi muntu ukukukama ku ntanta imo, umutengekele ntanta yamina kami. Ndi muntu ukushimba ncanci yobe, mwitabilishe kushimba shikobelo shobe kami.

³⁰ Pana kukwendi nimwendi ukunyepa kukwobe, kami ndi muntu ukukuyangula shuma shobe, hinga unyepa ngayi ashibweshe.

³¹ Nehi ukushinga bantu ngayi bakutendele, tenda noho kukwabo kami.

³² “Ndi enu mukuhaka aba bakumihaka, mukatambwila bihi ncungu? Hinge bakawubi bakuhaka aba bakubahaka.

³³ Ndi mukutenda shiwahe aba bakumitenda shiwahe, mukatambwila bihi ncungu? Hinge bakawubi bakutenda nahiyo.

³⁴ Kami ndi ukukolotesha tuhu aba ukukulupila ngayi ukatambula kukwabo, mukatambwila bihi ncungu? Hinge bakawubi bakukolotesha bakawubi na kutambula kami biya banakoloteshe.

³⁵ Ngoboni hakenu bakankole benu, kami batendenu shiwahe, pe bakoloteshenu nakubula kukulupila ngayi mukatambula kami. Ncungu yenu yikenga yayinene, nanenu mukenga bana ba Nyambi Wakukangana. Ndaba niye wenga wamuwahe kukwabo bakubula kukambilila na bakawubi.

³⁶ Nohobene yikalenu na nceshe nehi Tatiyenu wenga wa nceshe.

Kuyata bamina

³⁷ “Hinga muyata baminenu, ngayi Nyambi abule kumiyata, hinga munyanca baminenu, ngayi Nyambi abule kuminyanca. Yatilenu baminenu, pe nanenu Nyambi ukamiyatila.

³⁸ Panikenu baminenu, kami Nyambi ukamipana. Mukatambwila muhoshi, shifwanikizo shashiwahe shinanyukumuniwi, shinahomiwi kami shikwitika. Ndaba shifwanikizo eshe munafwanikizi nasho baminenu, nisho Nyambi akamifwanikiza nasho.”

³⁹ Yeshu wabatongwezele nguli eye ngayi, “Kati kashishitwa ukutwesha kutwaminina minendi kashishitwa ndi? Nka wubili wabo bakawila mu liteke?

⁴⁰ Kowa ndongesha ukutwesha kupitakana mulongeshi wendi. Ngoboni ndongesha akamanisha kulilongesha ukenga ngo mulongeshi wendi.

⁴¹ “Shumangani ukutilamina kahoni kali mu liho lya kawushinda wobe, ngoboni ukubula kutosha shitondo shili mu liho lyobe?

⁴² Hinge ukutwesha nahiti kwamba ku kawushinda wobe ngayi, ‘Mbayi, nikufumishe kahoni kali mu liho lyobe,’ oho obe mwine kumona shitondo shili mu liho lyobe wufwako? Obe mukashishweka! Fumisha taha shitondo shili mu liho lyobe, pe ukamona shiwahe ha kufumisha kahoni kali mu liho lya kawushinda wobe.

Mutondo na mikabo yawo

⁴³ “Kowa mutondo wawuwahe ukutwesha kuyima mikabo yayibi, hinge mutondo wawubi kutwesha kuyima mikabo yayiwahe wufwako.

⁴⁴ Mutondo nimwawo ukulimukiwa ku mikabo yawo. Bantu kutwesha kubuya mikabo ya mukuyu ku mukona bafwako, kami kutwesha kubuya mikabo ya shinyanca ku mu wungawunga bafwako.

⁴⁵ Muntu wamuwahe, watutwishanga byabiwahe ku wuheti wawuwahe wa mu mutima wendi, kami muntu wamubi watutwishanga byabibi ku wuheti wawubi wa mu mutima wendi. Ndaba kanwa kambanga ebye byenzala mu mutima.”

Bakakuzika matala babili

⁴⁶ “Ndaba ngani mukuntoya ngayi, ‘Mwene, Mwene,’ ngoboni kutenda ebye nikumitongweza mufwako?

⁴⁷ Nikamimonesha ou afweka muntu nimwendi ukwiza kukwami mukuyuvwa mazu wami na kuwombatala.

⁴⁸ Niye ukufweka ngo muntu watendele litala lyendi, wakabile mwamutali, pe wazikile mwimbi wa litala lyendi ha limanya. Oho libazi lyezile, mikukila yakukulukilile ha litala liyo, ngoboni kaliha yatweshele kulinyenkanisha, ndaba lyazikiwile shiwahe.

⁴⁹ Ngoboni niye ukuyuvwa mazu wami nakubula kuwombatala, ukufweka ngo muntu watendele litala lyendi ha limvu hakubula mwimbi. Oho libazi lyakukulukilile ha litala, pe litala lyashiwukile, kami kushiwuka kwalyo kwabipile shikuma.”