Luka 4 - Kulimama Kwakupya

Yeshu ukwezekiwa

¹ Yeshu wafumine mu Yondana hinga enzala na Moyo Wakuyela, pe Moyo wamutwamininine mu libelelengwa,

² ekalile matena makumi anaa hezekiwa kuli Shatana. Ha matena ayo kaliha walile shamina, pe oho matena amanine wayuvwile nzala.

³ Shatana wambile kuli Yeshu ngayi, “Ndi uli Mwana Nyambi, tongweza elye limanya ngayi lifutuke linkende.”

⁴ Ngoboni Yeshu wamukumbwile ngayi, “Kwatikitiwa ngayi, ‘Muntu kukayoya na linkende tuhu wufwako.’ ”

⁵ Niho Shatana amutwalile ha kukankama, ohobene wamumoneshele wene nimwawo wa kaye.

⁶ Shatana wambile kukwendi ngayi, “Nikakupanika eze ngovu nimwazo na wuheti nimwawo, ndaba binapanikiwi kukwami kami nikutwesha kupana nimwendi ou nikushinga.

⁷ Nohobene ndi ukundemesha, nimwabyo bikenga byobe.”

⁸ Yeshu wakumbwile ngayi, “Kwatikitiwa ngayi, ‘Ukalemesha Mwene Nyambi yobe na kumutendela milimo niye tuhu!’ ”

⁹ Niho Shatana atwalile Yeshu ku Yelushalema, wakamwimikile hayilu ha mamanininino a Litala lya Nyambi, pe wambile kukwendi ngayi, “Ndi uli Mwana Nyambi, kilukila hanci.

¹⁰ Ndaba kwatikitiwa ngayi, ‘Nyambi ukatongweza mangeloyi endi ngayi akakulame shiwahe.’

¹¹ Kwatikitiwa kami ngayi, ‘Bakakubaka na maboko wabo, kutinisha liwulu lyobe kulituntula ku limanya.’ ”

¹² Yeshu wakumbwile ngayi, “Kwatikitiwa ngayi, ‘Hinga wezeka Mwene Nyambi yobe.’ ”

¹³ Oho Shatana amanishile kwezeka Yeshu mu zinzila nimwazo, wafumine kukwendi ha shikati shiyo.

Yeshu ukutatika mulimo wendi mu Ngalileya

¹⁴ Niho Yeshu abokele ku Ngalileya na ngovu za Moyo Wakuyela zekalile mumwendi, mpupo yendi yatumbalalile mu liya litunga nimwalyo.

¹⁵ Yeshu walongeshele mu mashinangonge abo kami bantu nimwabo bamuyemezele.

Yeshu ukukaniwa ku Nazaleta

¹⁶ Wezile ku Nazaleta oku bamulelelele, ngonehe shengile shiheka shendi wenginine mu shinangonge ha Mutena Wakukatala. Wemanine na kulaba byatikitiwa.

¹⁷ Bamutabikizile libuka lya muluwe Ishaya. Oho afukwilile libuka wawanine aha hatikitiwile ngayi,

¹⁸ “Moyo wa Nyambi ulihahami, ndaba unangwabishi mukushimikila ncango zaziwahe ku bakakushepwa. Unantumu mukubilika kushoboloka ku bantampwa na kutonesha meho a tushishitwa.

¹⁹ Kushobolola baya banalyatilili na kushimikila ngayi shikati shakuma kale oho Nyambi ukalamwina bantu bendi.”

²⁰ Wafwikile libuka, walitabikizile ku mukakutwaminina, pe wekalile hanci. Bantu nimwabo bekalile mu shinangonge bamuconcomekele.

²¹ Niho ambile kukwabo ngayi, “Mutena walelo eshe shatikitiwile shengakale shakupwisha mu matu wenu.”

²² Nimwabo bamuwahililile na kukomoka mazu amawahe aya ambile. Bambile ngayi, “Kati ou kaliha niye mwana Yoshefwa ndi?”

²³ Yeshu wambile kukwabo ngayi, “Mwashikuma mukamba kukwami nguli eye ngayi, ‘Nganga linyongomanishe obe mwine!’ Nanenu mukamba kukwami ngayi, ‘Ebye twayuvwa ngayi wabitenda mu Kapenauma, bitende kami muno mu litunga lyobe.’ ”

²⁴ Yeshu kami wambile ngayi, “Mwashikuma nikumitongweza ngayi kowa muluwe wa Nyambi ukutambuliwa mu litunga lyendi.

²⁵ “Mwashikuma nikumitongweza ngayi, kwekalile bamfwile babengi mu Ishalela ha matena a Eliya, oho liyilu lyashinkiwile myaka yihatu na zingonda mutanu na imo kubula kuloka mvula, oho kwekalile kapande kakanene mu litunga nimwalyo.

²⁶ Ngoboni Eliya kaliha watumiwile kwamina ndele ku Zalefwati mu munzi wa Shindoni ku mbuyama wa mfwile.

²⁷ Kami kwekalile bakabimakwa babengi mu Ishalela ha shikati sha muluwe Elisha. Kowa muntu kukwabo wapolele ku wulweli ndele Namani wa ku Shiliya.

²⁸ Bantu nimwabo bekalile mu shinangonge oho bayuvwile awa mazu bapilamine.

²⁹ Bakatukile, bamufumishile mu munzi, pe bamutwalile hayilu ya shinkanda haya azikiwile munzi wabo, ngayi mwanga bamuyumbile mu linzolongoma.

³⁰ Ngoboni wapitile mukati ka likunge, pe wayile.

Mulume wa mayimbwe

³¹ Niho Yeshu ayile ku Kapenauma, mu munzi wa mu Ngalileya. Pe ha Mutena Wakukatala walongeshele bantu.

³² Bantu nimwabo bakomokele kulongesha kwendi, ndaba wambile na ngovu.

³³ Mu shinangonge mwekalile mulume wekalile na mayimbwe amabi, wabilikizile na lizu lyalinene ngayi,

³⁴ “Haya, ukushinga kututenda bishini, Yeshu wa ku Nazaleta? Kati unezi mukutunongesha ndi? Nakulimuku lizina lyobe, unengi Wakuyela wa Nyambi!”

³⁵ Ngoboni Yeshu wakalihilile mayimbwe ngayi, “Mwenenu! Fumenu mumwendi!” Niho mayimbwe amuwishile hanci ku meho wabo afuminine mumwendi kwakubula kumulemeka.

³⁶ Bantu nimwabo bakomokele, bambile mukati kabo ngayi, “Kati mazu awa anahiti? Ndaba na ngovu na nyala ou mulume ukukalihila mayimbwe, naniwo akufuma!”

³⁷ Pe mpupo ya Yeshu yatumbalalile ku zimbalila nimwazo za mu litunga liyo.

Yeshu ukunyongomanisha bantu babengi

³⁸ Yeshu wafumine mu shinangonge, wenginine mu litala lya Shimoni. Haya mukowendi Shimoni wa mbeleki wakolelenga mashikashika, pe batongwezele Yeshu bya kukola kwendi.

³⁹ Yeshu wemanine kunkumo ya wulili wendi, wambilile mashikashika ngayi afume. Mashikashika amufumine, hohobene wapindukile, pe wabatendelele byakulya.

⁴⁰ Oho mutena walelelenga, bantu nimwabo bekalile na bakakukola malweli a mishoboshobo babaletele kuli Yeshu, wabakambikile maboko, pe wabanyongomanishile.

⁴¹ Mayimbwe kami afumine ku bantu babengi, abilikizile ngayi, “Wenga uli Mwana Nyambi!” Ngoboni Yeshu wakalihilile mayimbwe, kami kaliha wetabilile ngayi ambe, ndaba alimukile ngayi wengile Kilishitu.

Yeshu ukushimikila mu mashinangonge

⁴² Oho kwashile lumenemene Yeshu wafumine mu munzi, pe wayile ku mwanya waninkayendi. Bantu bamushingile, pe oho bamuwanine, bamunyepele ngayi hinga afuma kukwabo.

⁴³ Ngoboni wabatongwezele ngayi, “Nikufwanina kushimikila ncango zaziwahe za Wene wa Nyambi ku minzi yamina kami, ndaba nibyo antuminine Nyambi.”

⁴⁴ Yeshu washimikililenga mu mashinangonge a mu Yundeya.