Luka 18 - Kulimama Kwakupya

Nguli ya mfwile na mukakuyata

¹ Niho Yeshu atongwezele bandongesha bendi nguli ya kubalongesha ngayi bafwanini kulombela shikati nimwasho nakubula kukwanga.

² Wambile ngayi, “Mu munzi wamina mwekalile mukakuyata wakubula kutina Nyambi hinge kupana bantu maleema.

³ Mu munzi uyo kami mwekalile mfwile wa mbuyama ou wezilenga kukwendi na kulambilila ngayi, ‘Nyimanine kuli ou ukunyatisha.’

⁴ Mukakuyata wakanine bikati byabingi, ngoboni ku mamaninino wambile mu mutima wendi ngayi, ‘Hinge ndi nabula kutina Nyambi, hinge kupana bantu maleema,

⁵ ngoboni ndaba ya nowu mbuyama wa mfwile ulinakunkabakanisha, nikamwimanina kutina ankwangisha hakwonzela kwiza.’ ”

⁶ Mwene wambile kami ngayi, “Yuvwenu eshe ambile mukakuyata wakubula kwoloka.

⁷ Kati Nyambi kukemanina bakakuhatiwa bendi wufwako, aba bakubilikiza kukwendi mwaana na wushiku? Kati ukehala shikuma kubayavwa ndi?

⁸ Nikumitongweza ngayi, ukanyankupa na kubayatila. Ngoboni oho Mwana Muntu akeza kati ukawana kukulupila hano hanci ndi?”

Nguli ya Kafwalishi na mukakutelesha

⁹ Yeshu kami watongwezele nguli eye ku bamo balikulupilile nibo bamwine ngayi banengi bakwoloka na kulimbwilisha baminabo.

¹⁰ Wambile ngayi, “Balume babili bayile mukulombela mu Litala lya Nyambi, umo wengile Kafwalishi, wamina wengile mukakutelesha.

¹¹ Kafwalishi wemanine, walombelele ngayi, ‘Obe Nyambi nikukambilila kukwobe ndaba kaliha nengi ngo bantu bamina, bakamutongo, bakawubi, bakakutenda wunjenge hinge ngo ou mukakutelesha.

¹² Nazilanga kulya kabili ha shunda na tupulanga sha wulikumi sha nebye nawananga nimwabyo.’

¹³ “Ngoboni mukakutelesha wemanine hahatali, wabulile kuyimbula meho wendi kuyilu, ngoboni walikamine ha kapumpo kendi nakwamba ngayi, ‘Obe Nyambi, nyuvwileko nceshe, nengi mukawubi!’ ”

¹⁴ Yeshu wambile kukwabo ngayi, “Uya mukakutelesha wayile ku litala lyendi hinga enga wakwoloka ku meho a Nyambi kupitakana Kafwalishi. Ndaba ou nimwendi wakulinenehesha ukashepeshiwa, kami ou ukulishepesha ukaneneheshiwa.”

Yeshu ukutandalisha batwanuke babashe

¹⁵ Bantu bamo baletele kuli Yeshu batwanuke babashe ngayi abakambike maboko. Oho bandongesha bendi bamoneneko, bakalihilile baya babaletele.

¹⁶ Ngoboni Yeshu wehanine batwanuke nakwamba ngayi, “Lehenu batwanuke babashe beze kukwami hinga mubakanisha. Ndaba Wene wa Nyambi wa baya bakufweka ngo aba.

¹⁷ Mwashikuma nikwamba kukwenu ngayi, muntu nimwendi ukubula kutambula Wene wa Nyambi ngonehe kanuke wamushe, kukenginamo wufwako.”

Mulume wakuheta

¹⁸ Mukulwane umo wepwile Yeshu ngayi, “Mulongeshi wamuwahe, nikufwanina kutenda nahiti ngayi nikone wumi wa mwayile myaka?”

¹⁹ Yeshu wambile kukwendi ngayi, “Ndabangani ukuntumba ngayi wamuwahe? Kowa wamuwahe ndele Nyambi tuhu.

²⁰ Ukulimuka ndayano zikwamba ngayi, ‘Hinga utenda wunjenge, hinga uziha, hinga uyiba, hinga upaka mahalo, lemeeka tatiyobe na mandiyobe.’ ”

²¹ Uya mulume wakumbwile ngayi, “Eze ndayano nimwazo nazilama kufuma ku wanuke wami.”

²² Oho Yeshu ayuvwile ebye, wambile kukwendi ngayi, “Kuli shuma shimo unafwanini kutenda. Kalandishe nimwabyo ebye ulinabyo, mwanga upanike mali ku bakakushepwa, pe ukekala na wuheti muyilu, niho wize unkonke.”

²³ Uya mulume oho ayuvwile ebye wayenene, ndaba wekalile na wuheti wawingi shikuma.

²⁴ Yeshu watilaminine uya mulume wambile ngayi, “Shashikalu shikuma bakakuheta kwingina mu Wene wa Nyambi.

²⁵ Mwashikuma shinengi shawangu kamela kwingina mu liho lya nconga, kupitakana muntu wakuheta kwingina mu Wene wa Nyambi.”

²⁶ Bantu baya bamuyuvwile bepwile ngayi, “Pe boni yani ukatwesha kupuluka?”

²⁷ Ngoboni Yeshu wakumbwile ngayi, “Byakubula kutwesheka ku bantu, kuli Nyambi bikutwesheka.”

²⁸ Niho Pita ambile kukwendi ngayi, “Mona, etu tunashiyi byuma nimwabyo tunakukonko.”

²⁹ Yeshu wakumbwile ngayi, “Mwashikuma nikumitongweza ngayi, kowa muntu unashiyi litala lyendi, hinge mukazendi, hinge bawushinda wendi, hinge bahemi bendi, hinge bana bendi ndaba ya Wene wa Nyambi,

³⁰ ukabula kutambula byabingi ha shikati shino, pe kushikati shikeza ukawana wumi wa mwayile myaka.”

Yeshu ukwamba ka wuhatu ha lufu lwendi

³¹ Yeshu watwalile bandongesha likumi na babili ku mbali, wambile kukwabo ngayi, “Yuvwililenu! Tunakuya ku Yelushalema, oku kami nimwabyo byatikitiwile ku bamiluwe ba Nyambi bya Mwana Muntu bikatendiwa.

³² Ukapanikiwa ku Bakamatunga, baya bakamukumangiza na kumuyuvwisha lisheni na kumufwizila mate.

³³ Bakamuzipola na kumuziha, pe ukashanguka ha mutena wa wuhatu.”

³⁴ Ngoboni bandongesha babulile kuyuvwishisha byuma ebye. Kutontoloka kwa nawa mazu kwaholekiwile kukwabo, pe babulile kulimuka ebye Yeshu ambilenga.

Yeshu ukunyongomanisha kashishitwa wa kanyepela

³⁵ Oho Yeshu akumine hahepi na Yeliko, ku nkumo ya mukwakwa kwekalile kashishitwa wanyepelenga.

³⁶ Oho ayuvwile likunge lya bantu hibapita, wepwile ngayi, “Kati bishini bikutendiwa?”

³⁷ Bamutongwezele ngayi, “Kunakupita Yeshu wa ku Nazaleta.”

³⁸ Kashishitwa wabilikizile ngayi, “Obe Yeshu! Mwana Ndavita! Nyuvwileko nceshe!”

³⁹ Pe baya batwaminine kumbili bamukanishile ngayi amwene. Ngoboni wabilikizile shikuma ngayi, “Obe Mwana Ndavita! Nyuvwileko nceshe!”

⁴⁰ Yeshu wemanine, wabatongwezele ngayi balete kashishitwa kukwendi. Oho ezile hahepi, Yeshu wamwipwile ngayi,

⁴¹ “Ukushinga ngayi nikutendele bishini?” Kashishitwa wakumbwile ngayi, “Mwene, nikushinga ngayi utoneshe meho wami.”

⁴² Yeshu wambile kukwendi ngayi, “Mona! Kukulupila kwobe kunakunyongomanishi.”

⁴³ Hohobene wamonene, pe wakonkele Yeshu hayemeza Nyambi. Kami bantu nimwabo oho bamonene eshe, bakomokele na kuyemeza Nyambi.