Luka 16 - Kulimama Kwakupya

Nguli ya mukamulimo wakukeya

¹ Yeshu wambile kami ku bandongesha bendi ngayi, “Kwekalile muntu wakuheta wekalile na mukamulimo walaminenga ntutu yendi. Pe bamutongwezele ngayi uno mukamulimo unapanzanishi ntutu yendi.

² Wamwihanine, niho amwipwile ngayi, ‘Kati ebye byambo nikuyuvwa byanahiti? Tontolola shiwahe bya mulimo wobe, ndaba kutwesha kami kwinga mukamulimo wami wufwako.’

³ Mukamulimo wambile mu mutima wendi ngayi, ‘Nikwinga nahiti? Ndaba hekulyami ukumfumisha ha mulimo, nyala zakutwesha kulima nifwazo, kunyepa kami nikuyuvwa lisheni.

⁴ Nikulimuka eshe nikatenda ngayi oho bakumfumisha mulimo nikekala na bahoni bakantambula mu matala wabo.’

⁵ “Niho ehanine baya batambwilenga mikuli ya hekulyendi umo na umo, wambile ku wa kutatika ngayi, ‘Kati wakolotele binga kuli hekulyami?’

⁶ Wakumbwile ngayi, ‘Mazi a olive abipimino byakukuma ku mwanda.’ Mukamulimo wambile kukwendi ngayi, ‘Shimba lin̄wati lyobe, yikala hanci utikiteho makumi mutanu.’

⁷ Niho ambile ku wamina ngayi, ‘Obebo, wakolotele binga?’ Wakumbwile ngayi, ‘Mashaka a loto akukuma kulikulukazi.’ Wambile kukwendi ngayi, ‘Shimba lin̄wati lyobe, utikiteho myanda mutanu na yihatu.’

⁸ “Hekulya mukamulimo wakubula kwoloka wamuyemezele ndaba watendele na kukeya. Ndaba bantu ba litunga lino, batendanga byabo na kukeya kupitakana bantu bali mu lumuni.

⁹ “Kami nikumitongweza ngayi, liyavwishenu wuheti wa litunga lino mukukwata bahoni, ndaba wuheti wamana mukatambuliwa mu munzi wa mwayile myaka.

¹⁰ Ou nengi wa kulunga ku byabishe, ukenga wa kulunga ku byabinene. Kami wakubula kulunga ku byabishe, kukalunga ku byabinene wufwako.

¹¹ Nohobene ndi munabulu kulunga na wuheti wa litunga, haya mukalunga nahiti ku wuheti wakupwisha?

¹² Kami ndi munabulu kulunga ku bya muntu wamina, haya yani ukamipanika byenu?

¹³ “Kowa mukamulimo ukutwesha kutendela milimo bahekulu babili, ndaba ukazimba umo na kuhaka wamina, hinge ukakakatila umo na kuhandula wamina. Kutwesha kutendela milimo babili mufwako, Nyambi na mali.”

Zinyambilo zamina za Yeshu

¹⁴ Oho Bafwalishi obo bahakile mali bayuvwile ebye nimwabyo bakendwile Yeshu.

¹⁵ Yeshu wambile kukwabo ngayi, “Muli bakakulyolokesha ku meho a bantu, ngoboni Nyambi halimuka mitima yenu. Ndaba eshe shenga sha maleema ku bantu, shenga wunyengwe ku meho a Nyambi.

¹⁶ “Ndayano za Moshesha nanebye batikitile bamiluwe ba Nyambi babishimikilile kukuma ku shikati sha Yowano. Kufuma haya ncango zaziwahe za Wene wa Nyambi zilinakushimikiwa na muntu nimwendi ukulishininika ngayi engine.

¹⁷ Shawangu liyilu na hanci kumana, kupitakana ngayi lizu limo lyalishe lya ndayano lifumeko.

¹⁸ “Mulume nimwendi ukuziha maluwo, pe hakuyeka wamina, ukutenda wunjenge, kami mulume ukuyeka mukazi uya nakaniwi ku mukokwendi, ukutenda wunjenge.

Muntu wakuheta na Lazalo

¹⁹ Kwekalile muntu wakuheta wavwalilenga bivwalo byabiwahe byakulelema, matena nimwawo walilenga shiwahe na kuyambwana.

²⁰ Kami kwekalile mulume wakushepwa watumbiwile Lazalo, wekalile na bitombo byabingi, uya wayakiwilenga ku shipana sha mukakuheta.

²¹ Washingilenga kulya biya byawilenga ha tebulu ya muntu wakuheta. Kami batuwa bezilenga na kulasha ha bitombo byendi.

²² “Shikati shakumine mulume wakushepwa wafwile, mangeloyi a Nyambi amutwalile mu kapumpo ka Abulahama. Na muntu wakuheta kami wafwile, niho bamufundile.

²³ Wekalile mu Ngehena hayanda, wayimbwile meho wendi, wamonene Abulahama hahatali na Lazalo hinga ekala mu kapumpo kendi.

²⁴ Wamubilikizile ngayi, ‘Obe tate Abulahama! Nyuvwileko nceshe, pe tuma Lazalo azubike munwe wendi mu mema, abombweshe ha lulimi lwami ndaba nili mu makando amanene muno mu milangi ya mundilo!’

²⁵ “Ngoboni Abulahama wamukumbwile ngayi, ‘Mwanami, anuka shikati shakuyoya kwobe, watambwile byuma byobe byabiwahe, nohobene Lazalo watambwile byuma byabibi, ngoboni wuluno unabengezekiwi, kami obe ulinakuyanda.

²⁶ Shinene bene kami, hakati ketu nanenu hali liteke lyalinene, ngayi bakuno bakushinga kwiza oko kukwenu kutwesha bafwako, hinge banokwo bakushinga kwiza kuno kutwesha bafwako.’

²⁷ Niho wakuheta ambile kuli Abulahama ngayi, ‘Tate, haya nikukunyepa ngayi utume Lazalo ku litala lya batate,

²⁸ kuyo nili na bakonzobami mutanu. Mulehe aye akabashiwulule kutina nibo kami beza ku mwanya uno wa makando.’

²⁹ “Abulahama wakumbwile ngayi, ‘Bali na Moshesha na bamiluwe, bakonzobobe bafwanini kubayuvwilila.’

³⁰ Muntu wakuheta wambile ngayi, ‘Byo tate Abulahama! Ngoboni ndi muntu umo wa ku bafu ukaya kukwabo, bakatenguluka ku wubi wabo.’

³¹ Ngoboni Abulahama wambile kukwendi ngayi, ‘Ndi kuyuvwa Moshesha na bamiluwe bafwako, hinge wamina unashanguku ku bafu kukamwitabila bafwako.’ ”