Luka 13 - Kulimama Kwakupya

Tengulukenu ku wubi wenu ndelewa mukanonga

¹ Ha shikati shiyo bantu bekalile kuyo batongwezele Yeshu bya Bangalileya baya azihile Pilato oho batupwilenga zinkombela zabo kuli Nyambi.

² Niho Yeshu wabakumbwile ngayi, “Kati mukuhanganika ngayi bayo Bangalileya bengile bakawubi kupitakana Bangalileya bamina oho bayandile ha byuma byanoho ndi?

³ Byo, kaliha noho! Ngoboni nikumitongweza ngayi, ndele mutenguluke ku wubi wenu, ndelewa nanenu kami nimwenu mukafwa.

⁴ Hinge baya likumi na mutanu na bahatu kawililile kapeshi ka Shilome na kubaziha, mukuhanganika ngayi bekalile na mulandu wakupitakana bantu nimwabo bazikile mu Yelushalema ndi?

⁵ Byo, kaliha noho! Ngoboni nikumitongweza ngayi ndele mutenguluke, ndelewa nanenu kami nimwenu mukanonga.”

Nguli ya mutondo wa mukuyu wakubula mikabo

⁶ Yeshu wabatongwezele eye nguli ngayi, “Muntu umo wekalile na mutondo wa mukuyu wakuniwile mu mfuba yendi ya shinyanca, wezile na kushingako mikabo, ngoboni kaliha wayiwanineko.

⁷ Pe wambile na ndimi wa mfuba yendi ya shinyanca ngayi, ‘Mona, yengakale myaka yihatu nezinga na kushinga mikabo ku nou mutondo wa mukuyu, ngoboni nawananga kowa. Wuteme, bihi ukubipishila limvu?’

⁸ Ngoboni ndimi wamukumbwile ngayi, ‘Hekulu, ulehe taha na mwaka uno kami, nilimeko, pe niyakeko wilo.

⁹ Ndi ukayima mikabo mwaka ukwiza, pe shashiwahe, ndi kukayima wufwako, ukawutema.’ ”

Yeshu ukunyongomanisha mbuyama wa shihole ha Mutena Wakukatala

¹⁰ Ha Mutena umo Wakukatala Yeshu walongeshelenga mu shinangonge.

¹¹ Mwekalile mbuyama wekalile na mayimbwe amwingishile wuhole mu myaka likumi na mutanu na yihatu. Wongomanine kami kaliha watweshele kunyongoloka.

¹² Oho Yeshu amumonene wamwihanine, pe wambile kukwendi ngayi, “Obe mbuyama washobolokakale ku wulweli wobe.”

¹³ Wamukambikile maboko, hohobene wanyongolokele, kami wayemezele Nyambi.

¹⁴ Ngoboni mukulwane wa shinangonge wapilamine, ndaba Yeshu wanyongomanishile ha Mutena Wakukatala. Wambile ku bantu ngayi, “Kwekala matena mutanu na limo awa bakufwanina bantu kutenda milimo, niwo matena mukufwanina kwiza na kunyongomanishiwa, ngoboni kaliha ha Mutena Wakukatala!”

¹⁵ Niho Mwene amukumbwile ngayi, “Enu bakashishweka! Kati enu nimwenu, kaliha mwamangululanga ngombe hinge mbongolo mu mulaka na kumutwala na kunwa mema ha Mutena Wakukatala ndi?

¹⁶ Haya ou muzukulu wa Abulahama amangile Shatana myaka likumi na mutanu na yihatu, kati kufwanina shifwako ngayi ashoboloke ha Mutena Wakukatala ndi?”

¹⁷ Oho akumbwile noho, bamalamo bendi nimwabo bayenene, ngoboni bantu nimwabo bawahililile ndaba ya byuma byabiwahe nimwabyo ebye atendelenga.

Nguli ya mbuto ya mashitandi

¹⁸ Nohobene Yeshu wepwile ngayi, “Kati Wene wa Nyambi ukufweka ngo bishini? Kami nikuwufwekesha na bishini?

¹⁹ Ukufweka ngo lupeka lwa mashitandi, luyo ashimbile muntu na kulukuna mu mfuba yendi. Lwakulile, kami lwengile mutondo, pe tuyoni twatendelele mahwa ku myahi yawo.”

Nguli ya mumena

²⁰ Yeshu kami wepwile ngayi, “Wene wa Nyambi nikuwufwekesha na bishini?

²¹ Ukufweka ngo mumena uyo ashimbile mbuyama, wawuvubile na muhunga wawingi wa loto, hantu noho muvuba watundulukile nimwawo.”

Shipana shakushinana

²² Oho Yeshu ayilenga ku Yelushalema, walongeshelenga mu minzi yayinene na mu tuminzi.

²³ Niho muntu umo ambile kukwendi ngayi, “Mwene, kati bantu babashe tuhu bakapuluka ndi?” Yeshu wambile kukwabo ngayi,

²⁴ “Ezekenu shikuma kwingina mu shipana shakushinana, ndaba bantu babengi bakezeka kwinginamo ngoboni kukatwesha bafwako.

²⁵ Oho mwine litala akakatuka na kushinka shihala, mukemana hamunkanda na kungongomweza ha shihala na kulambilila ngayi, ‘Hekulu, tushinkwilileko,’ pe ukamikumbula ngayi, ‘Kumilimuka nifwako, kami kulimuka oku mukufuma nifwako.’

²⁶ Pe mukamba ngayi, ‘Twalilenga na kunwa nobe hamo, kami walongeshelenga mu zimbanza zetu!’

²⁷ Ngoboni ukamikumbula ngayi, ‘Kumilimuka nifwako, kami kulimuka oku mukufuma nifwako. Fumenu kukwami, nimwenu enu bakakutenda byabibi.

²⁸ Kuyo mukalila na kulikekenya ku mayewe, oho mukamona Abulahama na Ishake na Yakobo na bamiluwe mu Wene wa Nyambi, ngoboni enu bakamiyumbila hamunkanda.

²⁹ Bantu bakafuma ku mushamuko na ku mponci, ku ncelele na ku mabukubuku, bakekala ku shimbo sha mayambwayambwa mu Wene wa Nyambi.

³⁰ Niho aba banengi ba mamaninino, bakenga bakutatika, kami bakutatika bakenga ba mamaninino.”

Yeshu ukulilila Yelushalema

³¹ Ha shikati shiyo bene kwezile Bafwalishi bamo bezile kuli Yeshu bambile ngayi, “Fuma kuno uye kwashenge, ndaba Helonda ukushinga kukuziha.”

³² Yeshu wabakumbwile ngayi, “Yenunga mukatongweze uya mumbwe ngayi, ‘Nishili kufumisha mayimbwe na kunyongomanisha bantu, lelo na nzona, mutena wa wuhatu nikamanisha mulimo wami.’

³³ Ngoboni nafwanini kwenda lelo na nzona na nzuzi, ndaba muluwe wa Nyambi kaliha wafwanina kufwila kwashenge ndele mu Yelushalema.

³⁴ “Obe Yelushalema, Yelushalema! Obe mukakuziha bamiluwe na kupuha mamanya baya Nyambi anatumu kukwobe! Bikati binga nashingile kukungula bantu bobe nimwabo ngonehe nkazikuku akungulanga bana bendi munceto ya mbando zendi, ngoboni mwakanine!

³⁵ Monenu, Litala lyenu lya Nyambi likashiyiwa. Nikumitongweza ngayi kukamona kami mufwako, hantu haya mukamba ngayi, ‘Mfuywezi za nou ukwiza mu lizina lya Mwene.’ ”