Luka 1 - Kulimama Kwakupya

Mazu akubalikila

¹ Kuli wakuhakiwa Tiyofwilashi, Bantu babengi banatende mulimo wakutikita ebye binatendiwi hakatiketu.

² Batikitile ngonehe batutongwezele bayo bamonene byuma ebye na meho, kufuma ku kutatika kami bengile bakakushimikila lizu.

³ Nohobene, obe wakukangana Tiyofwilashi, ndaba ami nashingishishi shikuma byuma nimwabyo kufuma ku kutatika, nahanganiki ngayi shuma shashiwahe kukwami kami kukutikitila byuma ebye mu muhoko wabyo.

⁴ Natende ebye ngayi ulimuke kupwisha kwa byuma ebye banakulongeshe.

Lingeloyi likulubulula kuhemuwa kwa Yowano Mukakuzubilisha

⁵ Ha shikati sha Helonda oho engile mwene wa Yundeya, kwekalile mukankombela lizina lyendi Zekaliya, wa kanzunga ka bakankombela ba Abiya. Mukazendi Elizabeta* wengile wa bana ba Aloni.

⁶ Nibo babili bengile bakwoloka ku meho a Nyambi, bombatalile ndayano na mazu a Nyambi nimwawo.

⁷ Ngoboni babulile mwana ndaba Elizabeta wengile mumba, kami nimwabo bakulumpalile.

⁸ Oho baka kanzunga ka Zekaliya bekalile ha mulimo, naniye watendelenga mulimo wa mukankombela kuli Nyambi.

⁹ Ngonehe shiheka sha mulimo wa bakankombela, Zekaliya wahatiwile na kukuna nyela kwingina mu Litala lya Nyambi mukuhokesha incence.

¹⁰ Oho shikati shakumine shakuhokesha incence, likunge lya bantu bekalile hamunkanda hibalombela.

¹¹ Niho lingeloyi lya Mwene lyaholokele kuli Zekaliya hinga lyemana ku shilyo sha shihanda sha incence.

¹² Oho Zekaliya alimonene wabazumukile, pe wekalile na bowa.

¹³ Ngoboni lingeloyi lyambile kukwendi ngayi, “Hinga utina Zekaliya! Nyambi nayuvwu malombelo wobe. Mukazobe Elizabeta ukakubelekela mwana wa mulume, ukamutumba ngayi Yowano.

¹⁴ Mukawahilila nakutangala, bantu babengi bakawahilila ha kuhemuwa kwendi!

¹⁵ Ukenga wamulemu ku meho a Mwene. Kukanwa waine hinge shuma nimwasho sha shikali wufwako. Ukenzala na Moyo Wakuyela kufuma ha kuhemuwa kwendi.

¹⁶ Ukabwesha bantu babengi ba Ishalela kuli Nyambi yabo.

¹⁷ Niye ukaya kumbili ya Mwene mu moyo na mu ngovu za Eliya. Ukawanika bahemi na bana babo, ukatengulula baka mashewinizi ku ngana zakwoloka. Ukabalakanya bantu ngayi batatilile Mwene.”

¹⁸ Zekaliya wambile kuli lingeloyi ngayi, “Nikalimuka nahiti ngayi eshe shinengi shakupwisha? Ndaba ami nili kakulukazi na mukazami wakulumpalakale.”

¹⁹ Lingeloyi lyakumbwile ngayi, “Ami Ngambuliyele, nikwimana ku meho a Nyambi, kami natumiwi kwiza nakwamba kukwobe na kukutongweza eze ncango zaziwahe.

²⁰ Ndaba unabulu kukulupila mazu ami awa akatendiwa ha shikati shawo, ukenga shimumu nakubula kwamba kutwala ku mutena uya byuma bikatendiwa.”

²¹ Shikati bene shiyo bantu batatilile Zekaliya kami bakomokele ndaba wehalile shikuma mu Litala lya Nyambi.

²² Oho atutikile, kaliha watweshele kwamba nabo, pe balimukile ngayi unamono shimono mu Litala lya Nyambi. Wakwangile kwamba niho abalabizile na maboko.

²³ Oho shikati shendi sha mulimo shamanine, wabokele ku litala lyendi.

²⁴ Munyima ya shikati shiyo mukazendi Elizabeta wemitile, pe waliholekele zingonda mutanu.

²⁵ Wambile ngayi, “Mwene nantendele ebye ha shikati shino nanyuvwili nceshe namfumishi lisheni ku bantu.”

Lingeloyi likutongweza Maliya bya kuhemuwa kwa Yeshu

²⁶ Oho Elizabeta emitile zingonda mutanu na imo, Nyambi watumine lingeloyi Ngambuliyele kuya ku munzi wa mu Ngalileya ukutumbiwa Nazaleta,

²⁷ ku kankanga wakubula kulimona na mulume abalikilile ku mulume lizina lyendi Yoshefwa wa lihumo lya Ndavita. Lizina lya uya kankanga Maliya.

²⁸ Lingeloyi lyezile kukwendi niho lyambile ngayi, “Shangwe, obe wakuyamiziziwa shikuma! Mwene uli hamo nanobe!”

²⁹ Maliya watinine shikuma na mazu a lingeloyi, niho akomokele ngayi oku kushangwisha kwa nahiti.

³⁰ Ngoboni Lingeloyi lyambile kukwendi ngayi, “Hinga utina obe Maliya, ndaba Nyambi unakuyamizizi.

³¹ Mona, ukemita, kami ukabeleka mwana wa mulume, ukamutumba lizina ngayi Yeshu.

³² Ukenga wamunene, ukatumbiwa ngayi Mwana Nyambi Wakukangana. Mwene Nyambi ukamupana litanda lya tatiyendi Ndavita,

³³ ukenga Mwene ha litala lya Yakobo mwayile myaka. Wene wendi kukamana wufwako.”

³⁴ Niho Maliya wakumbwile lingeloyi ngayi, “Shuma eshe shikenga sha nahiti, ndaba ami nili kankanga wakubula kulimona na mulume?”

³⁵ Lingeloyi lyamutongwezele ngayi, “Moyo Wakuyela ukashulumukila hahobe, na ngovu za Nyambi Wakukangana zikakufwika. Nohobene mwana wakuyela ukahemuwa kukwobe, ukatumbiwa ngayi Mwana Nyambi.

³⁶ Mona, kawushinda wobe Elizabeta, ou wengile mumba, naniye kami nemiti mu wukulukazi, yino ngonda niyo ya wumutanu na yimo.

³⁷ Ndaba kuli Nyambi kowa shuma shikukwangana.”

³⁸ Maliya wambile ngayi, “Ami nili mukamulimo wa Mwene, shitendiwe kukwami ngonehe unamba.” Niho lingeloyi lyamushiyile.”

Maliya ukuzingula Elizabeta

³⁹ Ha shikati shiyo Maliya wakatukile wayile na kunyankupa ku litunga lya binkanda ku munzi wa Yundeya.

⁴⁰ Wenginine mu litala lya Zekaliya, washangwishile Elizabeta.

⁴¹ Oho Elizabeta ayuvwile kushangwisha kwa Maliya, mwana wanyenkanine mu livumo lyendi. Elizabeta enzalile na Moyo Wakuyela,

⁴² pe wakatwile ku lizu wambile ngayi, “Uli wakutandala mukati ka bambuyama na mwana ukabeleka wakutandala!

⁴³ Kati ninayamiziziwi nahiti, ngayi manda Mwene yami azingule?

⁴⁴ Ndaba oho nayuvwu kushangwisha kwobe, mwana unanyenkana mu livumo lyami na kuwahilila.

⁴⁵ Unatandala obe ukukulupila ngayi ebye anamba Nyambi kukwobe bikatendiwa!”

Lwimbo lwa Maliya lwa kuyemeza

⁴⁶ Maliya wambile ngayi, “Mutima wami ukulemesha Nyambi,

⁴⁷ kami moyo wami ukuwahilila muli Nyambi Mupulwishi wami,

⁴⁸ Ndaba unatilamini kushepwa kwa mukamulimo wendi! Kumbili bihemunwino nimwabyo bakantumba ngayi nili wakutandala,

⁴⁹ ndaba Nyambi wa ngovu, unatende kukwami byuma byabinene, lizina lyendi lyenga lyakuyela,

⁵⁰ ukumonesha nceshe zendi ku baya bakumuyuvwila bowa, kufuma ku mukoka umo kutwala ku mukoka wamina.

⁵¹ Unamoneshe ngovu na liboko lyendi, unapanzanishi bakakuliyemeza baya bakulilundumika mu mitima yabo.

⁵² Unafumishi bamyene ba ngovu ha matanda abo, unakatulu bakakulilimbwilisha.

⁵³ Unekutishi baka nzala na byuma byabiwahe, unabweshe bakakuheta mabokoboko.

⁵⁴ Unayavwa mukamulimo wendi Ishalela, unalama shikulupisho atendele na bankaka zetu.

⁵⁵ Unanuku kumonesha nceshe kuli Abulahama na ku mukoka wendi mwayile myaka.”

⁵⁶ Maliya wekalile na Elizabeta zingonda zihatu, niho abokele ku litala lyendi.

Kuhemuwa kwa Yowano Mukakuzubilisha

⁵⁷ Shikati sha Elizabeta sha kubeleka shakumine, pe wabelekele mwana wa mulume.

⁵⁸ Oho bandambo bendi na bawushinda wendi bayuvwile ngayi Mwene namuyuvwili nceshe zazinene, bawahililile nendi.

⁵⁹ Ha mutena wa wumutanu na ahatu batwalile mwana ku mukanda. Bashingile kumutumba lizina lya Zekaliya tatiyendi.

⁶⁰ Ngoboni mandiyendi wambile ngayi, “Byo! Ukatumbiwa Yowano.”

⁶¹ Bambile kukwendi ngayi, “Ngoboni kowa kawushinda wobe watumbiwile na lizina elye!”

⁶² Balabizile tatiyendi ngayi abatongweze lizina akushinga kutumba mwanendi.

⁶³ Zekaliya wanyepele litapa hakutikita niho atikitile ngayi “Lizina lyendi niye Yowano.” Nimwabo bakomokele shikuma!

⁶⁴ Wanguwangu kanwa kendi kashinkulukile na lulimi lwendi lwamangulukile, watweshele kwamba kami na kulemesha Nyambi.

⁶⁵ Bandambo nimwabo bekalile na bowa. Ebye byatendiwile nimwabyo byashimikiwile mu litunga lya binkanda lya Yundeya nimwamo.

⁶⁶ Nimwabo aba bayuvwileko, bahanganikile mu mitima yabo, niho bambile ngayi, “Kati ou kanuke ukenga wa nahiti?” Ndaba liboko lya Mwene lyekalile hahendi.

Kulubulula kwa Zekaliya

⁶⁷ Zekaliya tatiyendi Yowano wenzalile na Moyo Wakuyela, pe walubulwile ngayi,

⁶⁸ “Kuyemeziwe Mwene, Nyambi wa Ishalela! Ndaba nazingulu kami nalamwini bantu bendi.

⁶⁹ Unatupaniki Mulamwini wa ngovu, wa liziko lya mukamulimo wendi Ndavita.

⁷⁰ Nehi ambilile mu bamiluwe bendi bakuyela ba kushikale,

⁷¹ ngayi ukatulamwina ku bamalamo betu, na ku maboko a baya batuzimba.

⁷² Ukamonesha nceshe ku batatizetu, na kwanuka kulimama kwendi kwakuyela.

⁷³ Luhaho olwe ahahile kuli tatiyetu Abulahama.

⁷⁴ Ukatulamwina ku maboko a bamalamo betu, kami ukatutweshesha kutenda mulimo wendi kwakubula bowa,

⁷⁵ mwanga tukenge bakuyela na kwoloka kukwendi, matena nimwawo akuyoya kwetu.

⁷⁶ Nobe kami mwanami, ukatumbiwa ngayi muluwe wa Nyambi Wakukangana. Ndaba ukaya kumbili ya Mwene na kuwahisha nzila yendi,

⁷⁷ ukatongweza bantu bendi ngayi bakapuluka ha kubayatila ku wubi wabo.

⁷⁸ Nyambi yetu wa nceshe zazinene, ukatumunikila lumuni lwa kupulwisha kufuma kuyilu,

⁷⁹ ukamunika ha baya bali mu mincimpwe na mu mumvulu wa lufu, ukatwaminina mawulu wetu mu nzila ya kumwena.”

⁸⁰ Kanuke wakulile mu mwimo na mu moyo, wekalile mu libelelengwa kutwala ku mutena uyo aliholwele ku bantu ba Ishalela.