Koloshe 4 - Kulimama Kwakupya

¹ Enu bahekulu, panenu bandungo benu byakwoloka na kupwisha na kulimuka ngayi enu kami muli na Hekulyenu muyilu.

Kufundiziza

² Zaminenu mu kulombela, pe oho mukulombela mwinge bakakuyuvwilila na kukambilila kuli Nyambi,

³ nanetu kami mutulombelele, ngayi Nyambi atushinkwilile shihala sha ncango zaziwahe, ngayi tushimikile ncimpi za Kilishitu, ndaba yazo nibyo ami ninamangiwili.

⁴ Lombelenu mwanga nitweshe kutontolola shiwahe ebye nikufwanina kwamba.

⁵ Mwikale bakukeya munyinkalo yenu na naba bakakubula kukulupila na kuliyavwisha shikati nimwasho mulinasho.

⁶ Nyambilo yenu yikale na nceshe shikati nimwasho na kutobiwa na mushele, ngayi mwanga mulimuke shakufwanina kukumbula muntu nimwendi.

Kushangwisha kwa mamaninino

⁷ Takikushi kawushinda wetu wakuhakiwa, ukamitongweza nimwabyo byami, nengi mukakushimikila wakupwisha, kami nengi minetu mukamulimo wa Mwene.

⁸ Nakumutuma kukwenu ndaba ya shuma eshe, ngayi amitongweze kupinduka kwetu na kumishumankanisha,

⁹ ulinakwiza hamo na Oneshimashi, kawushinda wakupwisha na kuhakiwa, niye wenga umo wa kukwenu. Nibo bakamitongweza byuma nimwabyo bilinakutendiwa kuno.

¹⁰ Alishitakashishi, hilanyami kayili ukumishangwisha na Mako, mufwala wa Mbanambashi. (Mwatambwile kufundiziza kwendi, ndi ukwiza kukwenu, mumutambule.)

¹¹ na Yoshuwa ukutumbiwa ngayi Yashitashi naniye kami ulinakumishagwisha, aba nibo tuhu Bayunda bakakukulupila mukati ka bahilanyami bakamilimo wa Wene wa Nyambi, aba banambengezeke.

¹² Epafulashi, ou wenga umo wa kukwenu, na mukamulimo wa Yeshu Kilishitu, ukumishangwisha, ulinakumilombelela shikuma shikati nimwasho ngayi mwanga mutwesha kushinta mukulembuka mu shamutima wa Nyambi nimwasho.

¹³ Ndaba nikumupaka ngayi unatende shikuma milimo kukwenu na kukwabo bali mu Laondishiya, nanibo bali mu Hilapola.

¹⁴ Luka, mukakupanga wakuhakiwa na Ndemashi, bakumishangwisha.

¹⁵ Ncangwishilenu bawushinda bali mu Laondishiya na Nimfwa na litengo lili mu litala lyendi.

¹⁶ Oho lin̄wati elye likalabiwa mukati kenu, itabilenu ngayi likalabiwe kami na ku litengo lya Laondishiya, kami ngayi enu mulabe lin̄wati lyakufuma ku Laondishiya.

¹⁷ Tongwezenu Akipashi ngayi, “Ukeye na mulimo ou unatambulu kuli Mwene, ngayi wuwutende.”

¹⁸ Ami Paulu nikutikita mazu awa akushangwisha na liboko lyami. Anukenu kumangiwa kwami. Nceshe zikale nenu.