Fwilipu 1 - Kulimama Kwakupya

¹ Lin̄wati elye likufuma kuli Paulu na Timoteo, bakakutendela milimo Yeshu Kilishitu. Tukutikitila bakakuyela nimwabo muli Kilishitu Yeshu bali mu Fwilipu, hamo na bakulwane ba litengo na bakakuyavwa mulimo wa mu litengo.

² Mwanga Nyambi Tate na Mwene wetu Yeshu Kilishitu bamipane nceshe na kumwena.

Malombelo a Paulu ku bakakulaba

³ Nakukambilila kuli Nyambi yami shikati nimwasho oho nakumyanukanga.

⁴ Shikati nimwasho oho namilombelalanga nimwenu, nalombelanga hinga nawahilila,

⁵ ndaba ya kulumikila kwenu mu ncango zaziwahe kufuma ku mutena wa kutatika kuleta kulelo.

⁶ Kami nakulupili ngayi Nyambi unatatiki mulimo ou wawuwahe mumwenu, ukawumanisha kutwala ku mutena wakwiza kwa Yeshu Kilishitu.

⁷ Nafwanina kuhanganika ebye byenu nimwenu, ndaba namihaka shikuma. Ndaba nimwenu muli hamo na nami, hinge oho nili mu tolongo ninemanini ncango zaziwahe kami nikuzishumisha.

⁸ Nyambi ukupaka ngayi nili na shikondamila shikuma kukwenu mu shishemo sha Yeshu Kilishitu.

⁹ Nikulombela ngayi shishemo shenu shikule shikuma mu kulimuka na ku ngana nimwazo,

¹⁰ ngayi mutweshe kuhata byuma byabiwahe. Pe ha Mutena Wakwiza kami kwa Yeshu, mukawaniwa bakwoloka nakubula nyanco.

¹¹ Nyinkalo yenu yikenzala na byuma byakwoloka bikufuma kuli Yeshu Kilishitu, ngayi bantu nimwabo bamoneshe wuwahe na kuyemeza Nyambi.

Kuyoya kwami ndaba ya Kilishitu

¹² Bawushinda wami, nikushinga ngayi mulimuke byuma byatendiwi kukwami, binayavwa kuhanyisha ncango zaziwahe.

¹³ Banzita nimwabo bakakulama ku musheke na bamina kuno, bakulimuka ngayi nili mu tolongo ndaba ya Kilishitu.

¹⁴ Ndaba yakwikala mu tolongo, bawushinda muli Mwene babengi bakukanca, kami bakushimikila lizu lya Nyambi kwakubula bowa.

¹⁵ Kuli bamo bakushimikila Kilishitu ndaba ya lihungu na nkani, ngoboni kuli bamina kami na mutima wawuwahe.

¹⁶ Aba balelo bakushimikila ndaba ya shishemo, ndaba banalimuku Nyambi wanyakile muno ngayi nitende mulimo wa kwimanina ncango zaziwahe.

¹⁷ Ngoboni bakutatika bafwako kushimikila Kilishitu mukupwisha. Bakulihaka nibobene, kami bakushinga kuleta wukalu wawunene kukwami oho nili mu tolongo.

¹⁸ Howa shambo! Shuma shikushingiwa ngayi bantu bashimikile bya Kilishitu, hinga ndi bakutenda na shishweka, hinge mukupwisha. Ami nikuwahilila ndaba ya kushimikila bya Kilishitu.

¹⁹ Nikapitakanisha kuwahilila ndaba nikulimuka ngayi malombelo enu na kuyavwa kwa Moyo wa Yeshu Kilishitu nikashoboloka.

²⁰ Nikutatililila mu lunzewe na kulumbeza kwami ngayi kowa shuma shikanyingisha lisheni, ngoboni nikutatilila ngayi na nkanca nimwayo nikushimikila hakuyela, ngayi wuluno hinge shikati nimwasho, Kilishitu ayemeziwe mumwami hinga na wumi wami hinga nifwe.

²¹ Ndaba wumi shumangani? Kukwami kuyoya ndaba ya Kilishitu, kami kufwa kwenga nkambiko.

²² Ngoboni ndi kuyoya kukunyitabilisha ngayi nitende mulimo wakuyavwa, nifwako kulimuka eshe nikahata.

²³ Ndaba nili na shihanka ku byuma bibili, mbalila imo nikushinga kufwa nikekale na Kilishitu, ndaba eshe shenga shuma shashiwahe shikuma,

²⁴ ngoboni mbalila yamina shikufwanina ngayi niyoye ndaba yenu.

²⁵ Na kukulupila kwanoho, nikulimuka ngayi nikekala na kuzamina nenu nimwenu ndaba ya kukula kwenu na kuwahilila kwa kukulupila,

²⁶ ngayi oho nikekala kami nanenu, mukatwesha kuliyemeza ndaba yami, mu wumi wenu na Kilishitu Yeshu.

²⁷ Ngoboni shuma shikushingiwa ngayi nyinkalo yenu yinge shiheka shakufwanina ncango zaziwahe za Yeshu Kilishitu, ngayi hinge ninezi mukumimona, hinge nabuluko, nikayuvwe ngayi mukwimana ngonehe mu moyo umo na mutima umo na kulwa hamo nzita ndaba ya kukulupila ncango zaziwahe.

²⁸ Hinga mutina bamalamo benu, ngoboni kancenu! Nisho kukwabo shenga shilimukisho sha kuloba, ngoboni kukwenu shenga shilimukisho sha kupuluka, nisho shinafumu kuli Nyambi.

²⁹ Ndaba muli na mfuywezi, kaliha kukulupila Yeshu tuhu, ngoboni na kuyanda kami ndaba yendi.

³⁰ Haya mukutwesha kulwa ngunga hamo nanami niyo mwamonene nalwilenga matena akunyima, kami wuluno niyo mukuyuvwa ngayi nishili kuyilwa.