Fwilimoni 1 - Kulimama Kwakupya

¹ Lin̄wati elye likufuma kuli Paulu kayili ka Yeshu Kilishitu na Timoteo kawushinda wetu. Kuli Fwilimoni mukakuhakiwa, na hilanyetu mu mulimo,

² na kuli mpanzetu Afwiya na Akipashi minetu kanzita mu nzita ya Nyambi, na ku litengo nimwalyo lyakukungulukilanga mu litala lyobe.

³ Nikulomba ngayi Nyambi Tate na Mwene Yeshu Kilishitu bamipane nceshe na kumwena.

Shishemo sha Fwilimoni na kukulupila kwendi

⁴ Nakambililanga kuli Nyambi yami, oho nakwanukanga mu malombelo ami.

⁵ Nakuyuvwa ndaba ya shishemo na kukulupila muli Mwene Yeshu na kuhaka bakakuyela nimwabo.

⁶ Nikulomba ngayi kukulupila kwetu nanenu bakakukulupila ngayi kushungame na kulimukisha kwa shuma nimwasho shashiwahe eshe shili mumwenu muli Kilishitu Yeshu.

⁷ Kawushinda wami, nawahilili shikuma na kushumankana! Ndaba unabengezeke mitima ya bakakuyela nimwabo.

Bya Oneshimashi

⁸ Ndaba yanebye, nikutwesha kukanca muli Kilishitu kukutongweza shuma shashiwahe wafwanina kutenda.

⁹ Ndaba ya shishemo shashinene kukwobe, ami Paulu, hinga nenga mukembele na wuluno kami nili kayili ka Yeshu Kilishitu ndaba ya lizina lyendi.

¹⁰ Nikunyepa ndaba ya Oneshimashi, nengi mwanami mu moyo muli Kilishitu, ou nahemene hinga nenga kayili.

¹¹ Ou ha shikati sha mwaka wabulile kukuyavwa, ngoboni wuluno mukakuyavwa kukwobe na kukwami.

¹² Nakumutuma kami kukwobe, nohobene umutambule, niye unengi ngo shimamo shami.

¹³ Nashingile ngayi ekale kuno, ngayi atende milimo yakushimikila mu mwanya wobe oho nishili mu tolongo.

¹⁴ Ngoboni nifwako kushinga kutenda shuma kwakubula kukwipula, kutina utenda shuma na kukandikiziwa ngoboni na kushinga kwobe.

¹⁵ Ndaba kampe wafumine kukwobe ka shikati ngayi umutambule mwaka nimwawo.

¹⁶ Wuluno kaliha nengi tuhu ndungo, ngoboni napitakana ndungo, nengi kawushinda wakuhakiwa muli Kilishitu. Hinga kukwobe nengi ndungo mu wuntu na kawushinda muli Mwene!

¹⁷ Nohobene ndi ukuhanganika ami ngayi nengi shipani shobe, umutambule ngo ami.

¹⁸ Ndi unakutende shibi, hinga uli na shikoloti kukwobe, shilabile kukwami.

¹⁹ Nashitikiti na liboko lyami mwine ngayi, “Ami Paulu nikashihingisha.” (Ngoboni hinga uvulama ngayi uli na shikoloti kukwami sha wumi wobe muli Kilishitu.)

²⁰ Haya, kawushinda wami, u nyavwe muli Mwene, ungwahilishe ngonehe kawushinda muli Kilishitu.

²¹ Nakulupili ngayi oho nikutikita ebye, ukatenda na kupitakana ebye ninamba.

²² Shuma shamina kami umbalakanyine mwanya, ndaba nikukulupila ngayi Nyambi ukuyuvwa malombelo enu nimwenu na kumbweshela kukwenu.

Kushangwisha kwa mamaninino

²³ Epafulashi, ulinanami mu tolongo ndaba ya Kilishitu Yeshu, naniye ulinakumishangwisha,

²⁴ hamo na Mako na Alishitakashi na Ndimashi na Luka bahilanyami mu mulimo wa Mwene.

²⁵ Nceshe za Mwene wetu Yeshu Kilishitu zikale nenu nimwenu.