Efweshe 5 - Kulimama Kwakupya

Kuyoya mu lumuni

¹ Nohobene ndaba ngayi muli bakuhakiwa ba Nyambi, ezekenu kumukonka.

² Mulihake umo na wamina nehi Kilishitu atuhakile. Unalipaniki niye mwine ndaba yetu mukwinga nkombela na kupehelela kuli Nyambi kwa livumba lyakunuka shiwahe.

³ Ndaba muli bantu ba Nyambi, wunjenge, mazilo, mutongo hinga bitoyiwa mukati kenu.

⁴ Hinga mwamba bya lihandu, hinga byambo bya wunkutala, hinga makulumo amabi, bikubula kufwanina, ngoboni shinene kambililenu.

⁵ Limukenu shuma eshe ngayi kowa mukawumambe, hinga mukamazilo, hinga muntu wa mutongo, (ndaba mutongo unengi ngo kulemesha tunankishi) uli na likona mu Wene wa Kilishitu na wa Nyambi.

⁶ Muntu hinga amyongeza na mazu owa, ndaba ya byuma ebye wukali wa Nyambi ukwiza ha bantu bakubula kwombatala.

⁷ Nohobene hinga mwinga bakakutambula shitapilo hamo nabo.

⁸ Ndaba mwaka mwekalile mu mincimpwe, ngoboni wuluno muli mu lumuni, ndaba ngayi enu muli bantu ba Mwene. Haya endenu ngo bantu bali mu lumuni,

⁹ ndaba hali lumuni hawaniwanga kami wuwahe na kwoloka na kupwisha nimwakwo.

¹⁰ Ezekenu kulimuka byuma ebye bya kutambuliwa kuli Mwene.

¹¹ Hinga mulilumikila na bantu bakutenda byuma bya mincimpwe, ngoboni shinene mubalete mu lumuni.

¹² (Ndaba sha lisheni hinge kutoya byuma ebye bakutenda ku kuwi.)

¹³ Ngoboni lumuni lwamunikanga byuma, kami nimwabyo byamonekanga hakuyela. Byuma nimwabyo bikumoneka hakuyela byafutukanga lumuni.

¹⁴ Nibyo bambile ngayi, “Pinduka, obe ulinakulangana, shanguka ku bafu, pe Kilishitu ukakumunikila.”

¹⁵ Tendenu milimo ngo bantu bakukeya, kaliha ngo bantu bakuyeba.

¹⁶ Yingenu bakukeya, hinga muyandisha shikati shenu ha byuma byowa, ndaba matena ano anengi amabi.

¹⁷ Nohobene hinga mwinga bakakuyeba, ngoboni yuvwishishenu eshe shenga shamutima wa Mwene.

¹⁸ Hinga mukolwa waine, ndaba ikamibipisha, ngoboni inzalenu na Moyo Wakuyela.

¹⁹ Oho mukuliwana hamo lyambweshenu na lishamu na nyimbo za Nyambi na za moyo, muyimbililenu na kumuyemeza Mwene mu mitima yenu.

²⁰ Kambililenu kuli Nyambi Tate bikati nimwabyo ndaba ya nimwabyo, mu lizina lya Mwene wetu Yeshu Kilishitu.

Byuma binafwanini mulume na mukazi mu maluwo

²¹ Muntu nimwendi ombatale minendi, ndaba ya kutina Kilishitu.

²² Enu bakazi, lishishenu ku bakokwenu, nehi mukutenda kuli Mwene.

²³ Ndaba mulume wenga mutwe wa mukazendi, nehi Kilishitu enga mutwe wa litengo, eli linengi lutu lwendi, kami niye Mupulwishi wa litengo.

²⁴ Nohobene nehi litengo likwombatala Kilishitu, nahiyo kami bakazi bombatale balume babo mu byuma nimwabyo.

²⁵ Balume, hakenu bakokwenu nehi Kilishitu kami ahakile litengo, wafwile ndaba yalyo.

²⁶ Watendele noho ngayi linge lyendi, waliyeleshele ha kuliyowesha na mema, kami na lizu lyendi.

²⁷ Washingile ngayi aliletelelyo hambili yendi litengo lyaliwahe, lyakubula libala hinga munkonya, hinga shuma shamina shakulibipisha, ngoboni ngayi linge lyakuyela na kubula shihepwa.

²⁸ Nohobene balume bakufwanina kuhaka bakazi babo nehi bakuhaka zinyutu zabo. Niye ukuhaka mukazendi ukulihaka niye mwine.

²⁹ (Ndaba kowa muntu wazimba lutu lwendi, ngoboni ukululisha na kululela, nehi Kilishitu akutenda ku litengo lyendi,

³⁰ ndaba twenga bimamo bya lutu lwendi.)

³¹ Ndaba kwatikitiwa ngayi, “Ndaba ya shuma eshe mulume ukashiya tatiyendi na mandiyendi, na kulilumukila na mukazendi, nibo babili bakenga lutu lumo.”

³² Awa mazu akuholola ncimpi zazinene, ngoboni ncimpi eze zikutoya Kilishitu na litengo.

³³ Ngoboni shinene akutoya byenu ngayi mulume nimwendi ahake mukazendi nehi akulihaka niye mwine, kami na mukazi apanike maleema kuli mukokwendi.