Efweshe 2 - Kulimama Kwakupya

Kufuma ku kufwa kuya ku wumi

¹ Mwaka mwafwile mu moyo ndaba ya milandu na wubi.

² Ha shikati shiyo mwendelenga mu byabibi kukonka ngana za kano kaye, kami mwombatalile Shatana, mwene wa ngovu za mu mbimbayilu. Ou niye ukutenda milimo ha shikati shino ku bantu bakulwisha Nyambi.

³ Shikati shiyo, etu kami twekalile nehi nibo, twatendelenga byuma byashingilenga zinyutu na bihanganiko byetu. Ndaba yaneshe na wuntu wetu twafwanina ku wukali wa Nyambi nehi bamina.

⁴ Ngoboni ndaba ya kuhanya kwa shishemo na nceshe zendi zazinene atuhakile nazo,

⁵ hinge oho twengile bafu ndaba ya wubi wetu, unatushangulu hamo na Kilishitu. Na nceshe za Nyambi zinamipulwishi.

⁶ Mu kulifungila kwetu hamo na Kilishitu, Nyambi watushangwile hamo na Yeshu Kilishitu, pe unatupana mwanya muyilu.

⁷ Nyambi watendele ebye ngayi amoneshe kaye kakwiza wuheti wendi wawunene wa nceshe na shikeketima shendi kukwetu muli Kilishitu Yeshu.

⁸ Ndaba ya nceshe za Nyambi mukapuluka ndaba ya kukulupila. Mufwako kupuluka ndaba ya milimo munatende, ngoboni na shishemo sha Nyambi.

⁹ Muntu wufwako kupuluka ndaba ya milimo yendi, kutina muntu aliyemeze.

¹⁰ Nyambi niye watulengele, watulengele muli Kilishitu Yeshu ngayi tutende milimo yayiwahe, eye atupanine mwaka ngayi tuyitende.

Kwinga umo muli Kilishitu

¹¹ Enu Bakamatunga, anukenu eshe mwekalile mwaka. Bayunda bakulitumba ngayi baka mukanda, ndaba ya shiheka bakutenda ha zinyutu zabo, kami enu baku mitoya ngayi bakakubula kuya kumukanda.

¹² Anukenu ngayi ha shikati shiyo kaliha mwalimukile Kilishitu. Mwekalile bayeni mu litunga lya Ishalela na kubula shitapilo eshe Nyambi akulupishile. Mwekalile mu kaye kwakubula kulumbeza na kubula Nyambi.

¹³ Ngoboni wuluno, muli Kilishitu Yeshu, enu mwaka mwekalile kwakutali na Nyambi munahenyeshiwi hahepi ndaba ya mukeza wa Kilishitu.

¹⁴ Kilishitu niye wenga kumwena kwetu, ou unafutulu Bayunda na Bakamatunga kwinga umo, ha kulitupula kwendi unahandulu limota lya mukati lya kutapulula mukati ketu.

¹⁵ Wamanishile Ndayano za Moshesha hamo na mazu na biheka byazo, watendele eshe ngayi kufuminina ku yiya mishobo yibili, ngayi alengeho mushobo umo, wawupya, wakwikala mumwendi ngayi alete kumwena.

¹⁶ Kilishitu wafwile ha shishempakano ngayi amanishe nzimbo, ngayi na shiyo shishempakano akulize yiya mishobo yibili kwinga umo mu lutu lwendi na kuyibwesha kuli Nyambi.

¹⁷ Kilishitu wezile na kushimikila ncango zaziwahe za kumwena kukwenu Bakamatunga mwekalile kwakutali na Nyambi na ku Bayunda bekalile hahepi nendi.

¹⁸ Kupitila muli Kilishitu etu nimwetu, Bayunda na Bakamatunga, tuli na kuhenyena na Moyo umo kuli Tate.

¹⁹ Nohobene wuluno, enu Bakamatunga, kaliha muli bayeni na banyambangizi, ngoboni mukwinga ba shihemuwilo shimo na bantu ba Nyambi, kami muli lupashi lwa Nyambi.

²⁰ Enu munatungiwi ha mwimbi wa bantumwana na bamiluwe, kami Kilishitu Yeshu niye mwine wenga limanya lya mu mbango.

²¹ Mumwendi litala nimwalyo likutungiwa mukushuma shiwahe, kami likukula ngayi linge Litala lya Nyambi wakuyela.

²² Mumwendi enu kami mukutungiwa hamo na bamina, ngayi mwinge litala lya Nyambi.