Efweshe 1 - Kulimama Kwakupya

¹ Ami Paulu, ntumwana wa Yeshu Kilishitu mu shifungo sha Nyambi. Nikutikitila ku bantu ba Nyambi bali mu Efweshe aba kami banakulupili muli Kilishitu Yeshu.

² Mwanga Nyambi Tate na Mwene wetu Yeshu Kilishitu bamipane nceshe na kumwena.

Mfuywezi za moyo muli Kilishitu

³ Kuyemeziwe Nyambi na Tata Mwene wetu Yeshu Kilishitu. Muli Kilishitu unatupana mfuywezi nimwazo za moyo mu kaye ka liyilu muli Kilishitu.

⁴ Nyambi oho shilolo alenge kaye, watuhatile mwaka muli Kilishitu, ngayi etu twinge bakuyela na bakubula mulandu kukwendi.

⁵ Ndaba ya kutuhaka, wawahishile mwaka ngayi muli Yeshu Kilishitu atutambule kwinga bana bendi. Watendele ebye ndaba ya kuwahilila kwakuwahe kwa shamutima wendi.

⁶ Tuyemezenu Nyambi! Ndaba ya wuwahe wa nceshe zendi anatutendele muli Mwanendi wakuhakiwa!

⁷ Nyambi unatupulwishi kupitila mu mukeza wa Mwanendi na kuyatila wubi wetu. Unatumoneshe kuhanya kwa wuheti wa nceshe zendi.

⁸ Nyambi unazihanyishi kukwetu mu ngana zendi nimwazo na kuyuvwishisha.

⁹ Nyambi watendele ebye ayongwele, kami unatulimukishi zincimpi zendi, eze zaholekiwile na kufunga kuziholola muli Kilishitu.

¹⁰ Biyongola akutenda Nyambi ha shikati sha kukuminina akakungulule hamo muli Kilishitu, byuma nimwabyo bili muyilu na nebye bili hano hanci.

¹¹ Ndaba byuma nimwabyo Nyambi ukutenda na kuyongola na kufunga kwendi. Niye watuhatile muli Kilishitu ngayi twinge bendi ndaba byengile biyongola na bihanganiko byendi kufuma ku kutatika.

¹² Washingile ngayi etu twakulupilile muli Kilishitu ha kutatika, tuyemeze wuwahe wendi.

¹³ Muli Kilishitu, enu kami mwayuvwile mazu akupwisha, awa mazu nizo ncango zaziwahe zamipulwishi. Mwakulupilile, niho Nyambi amipanine shimonekesho sha kumonesha ngayi muli bendi, ha kumipana Moyo Wakuyela ou akulupishile.

¹⁴ Moyo Wakuyela nengi shilimukisho ngayi tukutambula mfuywezi nimwazo eze Nyambi akulupishile bantu bendi, kami ngayi Nyambi ukapulwisha aba ashobolola ngayi benge bendi. Shinene ngayi tuyemeze wuwahe wendi.

Kulomba kwa Paulu

¹⁵ Nohobene ami kami oho nayuvwile ngayi munakulupili muli Mwene Yeshu, kami ngayi mukuhaka bantu ba Nyambi nimwabo,

¹⁶ nifwako kuleha kukambilila kuli Nyambi ndaba yenu nakumyanuka mu malombelo ami.

¹⁷ Kami nikulomba Nyambi wa Mwene wetu Yeshu Kilishitu, Tatiyetu unenzala na wuwahe, ngayi amipane Moyo ou ukamipana ngana na kuholola Nyambi kukwenu, ngayi mumulimuke.

¹⁸ Nikulombela ngayi ou Moyo Wakuyela umunike mu mitima yenu, ngayi mulimuke kulumbeza kwa lukuwa lwendi na wuheti wawuwahe ou anakowezele bakakuyela.

¹⁹ Kami nikushinga ngayi mulimuke ngovu zendi zakupitakana byezeko kukwetu tukukulupila. Eze ngovu zendi zenga zazinene,

²⁰ nizo Nyambi aliyavwishile oho ashangwile Kilishitu ku bafu na kumwikalika ku liboko lyendi lya shilyo mu kaye ka liyilu.

²¹ Oku Kilishitu, ali hayilu ya bamyene na ngovu na wene na batulela, uli na lizina likupitakana mazina nimwawo akutumbiwa kaliha mu kaye kano tuhu, ngoboni na kaye kakwiza.

²² Nyambi unayaka byuma nimwabyo kunceto ya mawulu a Yeshu, kami namupana kwinga mutwe wa litengo.

²³ Litengo nilwo lutu lwa Kilishitu, kami linenzala nendi ou ukwinzala mu nimwamo.