Baloma 9 - Kulimama Kwakupya

Nyambi na bantu bendi

¹ Nikwamba kupwisha muli Kilishitu, kwamba mahalo nifwako, bihanganiko byami bilinakumpaka mu Moyo Wakuyela

² ngayi nili na lisheni lyalinene shikuma, na makalikiza akubula kumana,

³ ndaba ya bawushinda, bantu ba mushobo wami nikushinga kwinga wa kukutiwa kuli Nyambi, ngayi nitapuluke kuli Kilishitu.

⁴ Aba nibo Baishalela, aba Nyambi ahatile kwinga bana bendi, walimamine nabo niho abapanikile wuwahe, pe wabapanikile ndayano. Banalimuku kulemesha mukupwisha kami banatambulu bikulupisho bya Nyambi,

⁵ nibo bazukulu ba batatizetu, kami Kilishitu wahemuwilile mu lupashi lwabo. Nyambi uli hayilu ya byuma nimwabyo, alemeshiwe mwayile myaka. Ameni.

⁶ Kaliha nikwamba ngayi ndayano za Nyambi zinakwangana. Ndaba ngayi kaliha bantu nimwabo bahemuwa ku mushobo wa Ishalela banengi Baishalela bakupwisha.

⁷ Hinga bazukulu ba Abulahama, kaliha banengi bana ba Nyambi nimwabo. Ngoboni, Nyambi watongwezele Abulahama ngayi, “Bana ba Ishake nibo bakutumbiwa bazukululyobe.”

⁸ Kaliha ngayi nimwabo bana ba Abulahama banengi bana ba Nyambi byo, ngoboni bana ba shikulupisho nibo bakulabiwa ngayi bazululyendi.

⁹ Ndaba Nyambi wakulupishile ngayi, “Nikaboka ha shikati eshe, kami Shala ukabeleka mwana.”

¹⁰ Kami kaliha eshe tuhu, ngoboni bana babili ba Lembeka bekalile na tatiyabo umo, nkaka yetu Ishake.

¹¹ Ndaba aba bambuyu oho shilolo bahemuwe, kami oho shilolo batende shuma shashiwahe hinge shashibi, shengile shifungo sha Nyambi ngayi biya anashingi bitendiwe, byatendiwile kaliha ndaba ya milimo ya muntu ngoboni ndaba Nyambi unamwihana.

¹² Pe Nyambi watongwezele Lembeka ngayi, “Wa mukulwane ukatendela milimo wa kanuke.”

¹³ Ngonehi kwatikitiwa ngayi, “Yakobo namuhakile, ngoboni Ishau namuzimbile.”

¹⁴ Haya tukamba bishini? Kati tukamba ngayi Nyambi wakatapulula ndi? Byo, kaliha noho.

¹⁵ Ndaba wambile kuli Moshesha ngayi, “Nikekala na nceshe kuli ou nikayuvwila nceshe, kami nikekala na shikeketima kuli ou nikayuvwila shikeketima.”

¹⁶ Nohobene shuma shashinene kaliha ebye muntu akushinga, hinge ebye muntu akutenda, ngoboni shinene nceshe za Nyambi.

¹⁷ Nehi kwatikitiwa ngayi Nyambi watongwezele Mwene Falo ngayi, “Nakwingi mwene, ngayi nimoneshe ngovu zami, kami ngayi lizina lyami litumbalale hano hanci nimwaho.”

¹⁸ Nohobene Nyambi uli na nceshe kuli ou akuyuvwila nceshe, kami ukukaluhisha mutima wa nou akushinga kukaluhisha.

Wukali na nceshe za Nyambi

¹⁹ Kampe wamina ukunyipula ngayi, “Ndabangani Nyambi ashili kutunyanca? Kati yani unakana shifungo sha Nyambi?”

²⁰ Ngoboni obe uli muntu tuhu, obeyani ulinakukanangana Nyambi? Kati nyungu ya lima yikamba kuli ou wayibumbile ngayi, “Bishini wantendele nehe?”

²¹ Mukakubumba zinyungu uli na ngovu za kuliyavwisha liya lima, ukutwesha kubumbaho zinyungu zibili, ukubumbaho nyungu ya kuliyavwisha bikati byamina, na nyungu ya kuliyavwisha bikati nimwabyo.

²² Na Nyambi kami nisho ali. Washingile kumonesha wukali wendi, na kulimukisha ngovu zendi. Ndaba ya noho walehelele, na kutatilila shikuma bantu aba apilaminine, aba bafwaninine kunonga.

²³ Nyambi washingile ngayi wuheti wa wuwahe wendi wawingi ulimukiwe kukwetu etu ayuvwilile nceshe, etu awahishile mwaka ngayi tutambule wuwahe wendi.

²⁴ Ndaba etubene Nyambi anehana, kaliha ku Bayunda tuhu, ngoboni kami na ku Bakamatunga.

²⁵ Nehi Nyambi ambile kuli Hoshiya ngayi, “Aba babulile kwinga bantu bami nikabatumba ngayi, ‘Bantu bami.’ Litunga nabulile kuhaka, nika litumba ngayi, ‘Lyakuhakiwa.’

²⁶ Kami kuya babatoyele ngayi, ‘Enu kaliha muli bantu bami,’ niko bakatumbiwa ngayi, ‘Bana ba Nyambi wakuyoya.”

²⁷ Ishaya kami wabilikizile bya Ishalela ngayi, “Baishalela hinge bakekala babengi ngonehe lihekelela lya liwate, ngoboni babashe bakapuluka,

²⁸ ndaba Nyambi ukayata bantu hano hanci. Kami ukatenda nawanguwangu na kumanishilila.”

²⁹ Nehi ambile Ishaya mwaka ngayi, “Shinga Mwene Mpandashilanga kaliha watushiyilile bazukulu, shinga twekalile ngonehe Shondoma na Ngomola.”

Paulu ukulombelela Ishalela

³⁰ Haya tukamba bishini? Twambe ngayi Bakamatunga baya babulile kukonkezeka kwoloka, banawana kwoloka, ndaba ya kukulupila.

³¹ Ngoboni Baishalela bezekele kwinga bakwoloka ku meho a Nyambi, bakwangile.

³² Ndabangani? Ndaba kaliha bashingile kuwahililisha Nyambi na kukulupila, ngoboni bahanganikile ngayi bakutwesha kumuwahililisha Nyambi na milimo. Bapukalile ha “limanya lya kupukalisha,”

³³ nehi kwatikitiwa ngayi, “Monenu, nikulangika mu Ziyone limanya likapukalisha bantu, na limanya likawisha bantu. Ngoboni ou ukakulupila mumwendi kukayuvwa lisheni wufwako.”