Baloma 8 - Kulimama Kwakupya

Wumi ukuwaniwa mu Moyo

¹ Nohobene kowa kuyatiwa kukwabo bali muli Yeshu Kilishitu, aba bakubula kwenda mu biheka bya wuntu.

² Ndaba ndayano za Moyo Wakuyela, zakutupanika wumi muli Yeshu Kilishitu, zinancobololo ku ndayano za wubi na za lufu.

³ Nyambi watendele ebye Ndayano za Moshesha zakwangile kutenda, ndaba ya kupopa kwa bantu. Nyambi unayata wubi uli mu zinyutu za bantu ha kutuma Mwanendi ou wezile mu shifwekesha sha muntu wa mubi, ngayi na lutu luyo atweshe kumanisha uya wubi.

⁴ Nyambi watendele ebye ngayi etu tukuyoya mu moyo, tukubula kwenda mu biheka bya wuntu tutweshe kulama ndayano zakuyela.

⁵ Ndaba nibo bakutenda biheka bya wuntu bakulifulankana byuma bya wuntu, ngoboni nibo bakwenda mu biheka bya Moyo bakulifulankana byuma bya Moyo.

⁶ Ndaba kulifulankana bya wuntu kukuleta lufu, ngoboni kulifulankana bya Moyo kukuleta wumi na kumwena.

⁷ Ndaba bakakulifulankana bya wuntu benga bamalamo kuli Nyambi, bantu banoho bafwako kwombatala ndayano za Nyambi, mwashikuma kutwesha kuzombatala bafwako.

⁸ Nohobene nibo bakuyoya mu wuntu kutwesha kuwahililisha Nyambi bafwako.

⁹ Ngoboni enu kuyoya mu wuntu mufwako, mukuyoya mu Moyo, ndi Moyo wa Nyambi ukwikala mumwenu. Ngoboni ndi muntu wufwawo Moyo wa Kilishitu, pe niye kaliha Mukakilishitu.

¹⁰ Kami ndi Kilishitu ukuyoya mumwenu, hinge ndi zinyutu zenu zikufwa ndaba ya wubi, ngoboni Moyo wenu ukekala na wumi ndaba yakwoloka.

¹¹ Ndi Moyo wa Nyambi ou washangwile Yeshu ku bafu ukwikala mumwenu, ou washangwile Kilishitu ku bafu ukayoyesha zinyutu zenu za kufwa, na Moyo wendi ukwikala mumwenu.

¹² Nohobene bawushinda, tuli na mukuli, kaliha mukuli wakutenda byabibi, ngoboni kutenda shamutima wendi.

¹³ Ndaba ndi mukuyoya mu biheka byabibi bya wuntu, mukafwa. Ngoboni ndi na Moyo mukaziha milimo yayibi ya wuntu, pe mukayoya.

¹⁴ Nimwabo aba bakutwamininiwa na Moyo, banengi bana ba Nyambi.

¹⁵ Ndaba kaliha mwatambwile Moyo ukumitwala mu wulungo wa kubokela ku bowa, ngoboni mwatambwile Moyo unamingishi bana ba Nyambi, ou ukututweshesha kulambilila ngayi, “Tate! Tate.”

¹⁶ Moyo wa Nyambi niwo ukutupaka ngayi tuli bana ba Nyambi.

¹⁷ Ndi tuli bana ba Nyambi, tukatambula likona hamo na bantu anawahishili. Pe tukakona hamo na Kilishitu, ndaba ngayi ndi tukuyanda na Kilishitu, tukatambula likona hamo nendi.

Wuwahe wa kumbili

¹⁸ Nikuhanganika ngayi makando a shikati shino afwako kutwesha kulyezeka na wuwahe ou Nyambi akamonekesha kukwetu.

¹⁹ Ebye byalengiwa nimwabyo binakutatilila ngayi Nyambi aholole bana bendi.

²⁰ Ndaba ebye byalengiwa byanyanciwile, kaliha nisho byashingile, ngoboni Nyambi niye wafungilesho. Hinge noho kuli kulumbeza,

²¹ ngayi mutena wamina byalengiwa bikashoboloka kuwulungo wa kubola, pe bikawana kushoboloka kwakuwahe kwa bana ba Nyambi.

²² Tukulimuka ngayi kukuma na shikati shino byalengiwa nimwabyo bilinakushunga hamo na kuyuvwa makando, makando akulifweka na shikati sha mbuyama oho akushampuluka.

²³ Kaliha byalengiwa tuhu, ngoboni nanetu tuli na mikabo ya kutatika ya Moyo, ha shikati shino tukushunga mu mutima, oho tukutatilila Nyambi kutulamwina na kutwinga bana bendi.

²⁴ Nyambi unatupulwishi na kulumbeza, ngoboni kulumbeza kwakumoneka, kaliha kulumbeza, ndaba osho muntu akumona ukushilumbeza nahiti?

²⁵ Ngoboni ndi tukulumbeza osho tukubula kumona, tukushitatilila na lunzewe.

²⁶ Nahiyo Moyo kami ukutuyavwa mukupopa kwetu, ndaba kulimuka ebye tukufwanina kulombela tufwako, ngoboni Moyo ukutuyavwa kulombela na kushunga kwakubula kutwesha kwambiwa.

²⁷ Kami Nyambi ukumona bili mu mitima ya bantu, ukulimuka bihanganiko bya Moyo, ndaba Moyo ukulombelela bakakwitabila ngo shamutima wa Nyambi.

²⁸ Kami tukulimuka ngayi Nyambi, mu byuma nimwabyo ukutendabyo shiwahe kukwabo bakumuhaka, kukwabo banehaniwi ngo shifungo shendi.

²⁹ Ndaba bantu aba Nyambi ahatile mwaka, wabahatile mwaka ngayi batendiwe ngo mu shifwekesha sha Mwanendi, ngayi niye enge mweli mukati ka bakonzobendi babengi.

³⁰ Nyambi aba ahatile, wabehanine, aba Nyambi ehanine, wabaolokeshele, aba Nyambi aolokeshele, wabatapilile ku wuwahe wendi.

Shishemo sha Nyambi muli Yeshu Kilishitu

³¹ Kati tukamba bishini ku byuma ebye? Ndi Nyambi unatwimanini, yani ukutwesha kutulwisha?

³² Niye wabulile kukanisha Mwanendi, ngoboni wamutupwile ndaba yetu nimwetu, pe ukabula nahiti kutupanika hamo nendi byuma nimwabyo?

³³ Yani ukabapana mulandu aba anahata Nyambi? Kowa, ndaba unabamono ngayi bakwoloka.

³⁴ Yani ou ukabayata? Kowa, ndaba Yeshu Kilishitu niye wafwile, washangukile ku bafu, ou uli ku liboko lya shilyo lya Nyambi, ou kami ukutulombelela.

³⁵ Yani ukatutapulula ku shishemo sha Kilishitu? Kampe makalikiza, hinge malwa, hinge byezeko, hinge nzala, hinge wuvu, hinge malamo, hinge lufu ndi?

³⁶ Nehi kwatikitiwa ngayi, “Ndaba yobe shikati nimwasho bakushinga kutuziha tukulabiwa ngonehe bambelele bakuya ku shilaha.”

³⁷ Ngoboni, mu byuma nimwabyo ebye tunakupitakana kupitila mumwendi watuhakile.

³⁸ Ndaba nakashuku ngayi kowa shikatutapulula ku shishemo sha Nyambi. Hinge lufu, hinge wumi, hinge mangeloyi, hinge batulela, hinge byuma biliko, hinge byuma bikeza, hinge bya ngovu byamina.

³⁹ Hinge wutali wa kuya muyilu, hinge kunonka, hinge bya hano hanci, hinge shibumbwabumbwa shamina shakulengiwa, bifwako kutwesha kututapulula ku shishemo sha Nyambi, eshe tuli nasho muli Yeshu Kilishitu Mwene wetu.