Baloma 4 - Kulimama Kwakupya

Kuhembwiliza Abulahama

¹ Niho tukamba bishini bya tatiyetu Abulahama? Unawana bishini ku wuntu?

² Ndaba ndi Abulahama waolokeshiwile na milimo atendelenga, shinga uli na shuma sha kuliyemeza. Ngoboni ku meho a Nyambi wufwako kuliyemeza.

³ Ndaba kwatikitiwa ngayi, “Abulahama wakulupilile Nyambi, pe ndaba ya kukulupila, Nyambi wamumonene ngayi wakwoloka.”

⁴ Muntu atenda milimo ukuhola. Kuhola kwamba tufwako ngayi nisho shishemo, ngoboni tukwamba biya muntu afwanini kuhola ku milimo anatende.

⁵ Ngoboni wakubula kutenda milimo, akukulupila tuhu Nyambi ou ukwolokesha bakawubi, kukulupila kwendi kukulabiwa ngayi wakwoloka.

⁶ Ndavita wambile kami ngayi ulina mfuywezi muntu ou Nyambi akumona ngayi wakwoloka kwakubula milimo. Ndavita wambile ngayi,

⁷ “Bali na mfuywezi bantu aba Nyambi akuyatila wubi wabo, aba wubi wabo unafwikiwi!

⁸ Ulina mfuywezi muntu ou Mwene akabula kulabila wubi wendi.”

⁹ Kati mfuywezi za bakamukanda tuhu ndi? Kati kaliha za bakakubula kuya ku mukanda kami ndi? Mfuywezi zabo kami nabo babula kuya ku mukanda, ndaba kwatikitiwa ngayi, “Abulahama wakulupilile Nyambi, pe ndaba ya kukulupila, Nyambi wamumonene ngayi wakwoloka.”

¹⁰ Kati byatendiwile mutena ngani? Kati hinga aya ku mukanda ndi wufwako? Kaliha hinga aya ku mukanda, ngoboni oho shilolo ayeko.

¹¹ Watambwile shilimukisho sha mukanda, shengile limango lyakwoloka kwa kukulupila ekalile nakwo oho shilolo aye ku mukanda. Ngayi Abulahama enge tata nimwabo bakakukulupila muli Nyambi, kami Nyambi unabatambulu ngayi bakwoloka, hinge ndi banabulu kuya ku mukanda.

¹² Kami nengi tata nimwabo bakamukanda, kaliha bakamukanda tuhu, ngoboni nanaba balinakwenda mu ntambo za kukulupila oku kwa tatiyetu Abulahama oku ekalile nakwo oho shilolo aye ku mukanda.

Bikulupisho bya Nyambi bikutambuliwa kupitila mu kukulupila

¹³ Abulahama na bazukulyendi batambwile kuli Nyambi shikulupisho sha kaye ngayi kakenga kabo. Watambwile shikulupisho eshe kaliha ndaba ya kulama ndayano, ngoboni ndaba yakwoloka kwa kukulupila.

¹⁴ Ndaba shinga ebye akulupishile Nyambi bikapanikiwa aba bakulama ndayano, pe kukulupila kwa muntu kowa ebye shikutontoloka, kami na shikulupisho sha Nyambi, pe kuyavwa shifwako.

¹⁵ Ndayano zikuleta wukali wa Nyambi, ndaba kwabula ndayano, kowa kukiluka ndayano kami.

¹⁶ Nohobene, shikulupisho shezanga na kukulupila, ngayi winge wana ukufuma kuli Nyambi, ngayi shikulupisho bakashitambule bana ba Abulahama, kaliha tuhu bayo bakulama Ndayano za Moshesha, ngoboni ku baya nimwabo bakukulupila nehi Abulahama. Niye tatiyetu nimwetu.

¹⁷ Nehi kwatikitiwa ngayi, “Nakwingi tata bantu babengi” Shikulupisho eshe Abulahama washitambwile kuli Nyambi ou akulupilile. Nyambi washangulanga bafu na kulenga byuma.

¹⁸ Nyambi wambile ngayi, “Banabobe bakavula.” Hinga ngayi ebye byengile byakubula kulumbeza, Abulahama wakulupilile ngayi ukenga tata bantu babengi.

¹⁹ Abulahama wekalile na myaka yakushinga kukuma ku mwanda, kami wahanganikile ngayi lutu lwendi lwengile ngo lwakufwa na mukazendi Shala kukela na bana wufwako.

²⁰ Kaliha wekalile na nkani na shikulupisho sha Nyambi. Kukulupila kwendi kwamushumankanishile kami wayemezele Nyambi.

²¹ Hinga akulupila ngayi Nyambi ukatenda ebye akulupishile,

²² ndaba ya kukulupila, “Nyambi wamumonene ngayi wakwoloka.”

²³ Mazu atikitiwa ngayi, “Nyambi wamumonene ngayi wakwoloka,” kaliha atikitiwile kukwendi tuhu,

²⁴ ngoboni akwamba na kukwetu tukuwaniwa kwinga bakwoloka ndi tukukulupila muli Nyambi, ou washangwile Yeshu Mwene wetu ku bafu.

²⁵ Yeshu wapanikiwile ngayi afwe ndaba ya wubi wetu, pe washangukile ku bafu ngayi twinge bakwoloka mumwendi.