Baloma 16 - Kulimama Kwakupya

Kushangwisha kwa Paulu

¹ Nikumilimukisha bya Fwembi, mpanzetu, ou mukakuyavwa wa mu litengo lya mu Shenkeliya.

² Mumutambule mu lizina lya Mwene, ngo shinafwanini bakakwitabila. Kami mumuyavwe byuma nimwabyo ebye anabulu, ndaba niye unayavwa shikuma bantu babengi, hamo nanami.

³ Shangwishenu Pulishila na Akwila aba ninatende nabo hamo mulimo wa Yeshu Kilishitu.

⁴ Baliwahishilile kufwa ndaba ya wumi wami. Kaliha ami tuhu nikukambilila kukwabo, ngoboni na matengo nimwawo a Bakamatunga.

⁵ Shangwishenu kami na litengo lya bantu baya bakungulukilanga mu litala lyabo. Muncangwishile Epaneta muhoniwami, ou wengile muntu wa kutatika mu litunga lya Esha kukulupila Kilishitu.

⁶ Shangwishenu Maliya, ou watendele milimo shikuma hakatikenu.

⁷ Shangwishenu kami Andilonikashi na Njuniya, baminami Bayunda baya bekalile nanami mu tolongo, kami banatumbalala hakati ka bantumwana, aba batatikile kwinga Bakayeshu oho ami shilolo nikulupile.

⁸ Shangwishenu Ampiliyatashi, muhoniwami muli Mwene.

⁹ Shangwishenu Ambanashi, minetu mu mulimo wa Kilishitu, na Shitakishi, muhoniwami.

¹⁰ Shangwishenu Apeleshi mukakuyemeziwa muli Kilishitu. Shangwishenu bakalitala lya Alishitobuleshi.

¹¹ Shangwishenu Holondiyane, minami Kayunda. Shangwishenu bakalitala lya Nakishashi, bali muli Mwene.

¹² Shangwishenu Talifwena na Talifwosha, bambuyama bakakutenda shikuma milimo muli Mwene. Shangwishenu Peshishi muhoniwami wakuhakiwa, mbuyama wamina wapitakanishile kutenda shikuma milimo muli Mwene.

¹³ Shangwishenu Lufwushi, mukakuhatiwa muli Mwene, shangwishenu na mandiyendi, ou wengile ngo mawa.

¹⁴ Shangwishenu Ashinkilitashi na Fwilengoni na Hemushi na Patulombashi na Hemashi na bawushinda baya bali nabo.

¹⁵ Shangwishenu Fwilolongashi na Njuliya na Neliyashi na mpanzendi na Olimpashi na bakakwitabila nimwabo baya bali nabo.

¹⁶ Lishangwishenu umo na wamina na kulizupeza kwakuyela. Matengo nimwawo a Kilishitu akumishangwisha.

Mazu a mamaninino

¹⁷ Wuluno bawushinda nikumikowamina ngayi keyenu na bantu aba bakumitapulula na kumipukalisha, aba bakukana kulongesha oku munalilongeshe. Babengukenu!

¹⁸ Ndaba obo bakwinga noho, kaliha bakutendela milimo Mwene wetu Yeshu Kilishitu, ngoboni bakutendela mavumo abo tuhu. Na mazu amawahe na nyambilo ya kubengezeka bakwongeza ba ka mitima ya kufutuka wangu.

¹⁹ Bantu nimwabo, banayuvwu eshe munombatala ku ncango zaziwahe. Nohobene ninawahilili ndaba yanenu. Ngoboni nikushinga ngayi mwinge bakakukeya ku byabiwahe, pe mwinge bakuyeba ku byuma byabibi.

²⁰ Pe Nyambi ou wapananga kumwena ukanyankupa kucancola Shatana kunceto ya mawulu wenu. Nceshe za Mwene wetu Yeshu Kilishitu zikale nenu.

²¹ Timoteo ou minami nikutenda nendi milimo ukumishangwisha, na Lushiya na Yashoni na Shoshipata baminami Bayunda nanibo kami bakumishangwisha.

²² Ami Tetiyashi, mukakutikita elye lin̄wati, nikumishangwisha muli Mwene.

²³ Ngayushi ou wantambwile, uya mu litala lyendi bakungulukilanga bakalitengo, ukumishangwisha. Elashitashi mukakukoweza wuheti wa mu munzi ukumishangwisha, na Kwotashi kawushinda wetu ukumishangwisha.

²⁴ Nceshe za Mwene wetu Yeshu Kilishitu zikale nenu nimwenu Ameni.

Malombelo a kuyemeza a mamaninino

²⁵ Tuyemezenu Nyambi! Niye uli na ngovu za kumishumisha mu kukulupila, kwezekesha na ncango zaziwahe nashimikilile za lukuwa lwa Yeshu Kilishitu, na kwezekesha na kuholoka kwa ncimpi zaholekiwile shikati shashitali kufuma ku mwaka.

²⁶ Ngoboni wuluno zinamoneke, kami biya byatikitiwa na bamiluwe ngo ku ndayano za Nyambi wa mwayile myaka binalimukiwi ku matunga nimwao, ngayi nimwabo bakulupile na kwombatala.

²⁷ Kuli Nyambi tuhu mukangana nimwazo, kwikale wuwahe wa mwayile myaka kupitila muli Yeshu Kilishitu! Ameni.